| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
16. වච්චපස්සාවට්ඨානිකනිද්දෙසවණ්ණනා
16. Vaccapassāvaṭṭhānikaniddesavaṇṇanā
156. වච්චපස්සාවට්ඨානිකන්ති ඨානම්හි ඨානෙ වා භවං වච්චපස්සාවට්ඨානිකං. යථාවුඩ්ඪං වච්චං න කරෙය්යාති සම්බන්ධො. යෙ යෙ වුඩ්ඪා යථාවුඩ්ඪං, ආගතප්පටිපාටිං හිත්වා වුඩ්ඪප්පටිපාටියාති අත්ථො. වච්චන්ති උපලක්ඛණමත්තං, පස්සාවඤ්ච නහානඤ්ච න කරෙය්යාති අධිප්පායො. තදෙව සමත්ථෙති ‘‘යාතානුපුබ්බියා’’තිආදිනා. යාතානුපුබ්බියාති යාතානං ගතානං අනුපුබ්බි අනුක්කමො යාතානුපුබ්බි, තාය. වච්ච…පෙ.… තිත්ථඤ්චාති එතං තයං ලබ්භතීති අත්ථො, භික්ඛුනාති විඤ්ඤායති.
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
157. උබ්භජිත්වා ච සහසා ච නො පවිසෙය්යාති සම්බන්ධො. උබ්භජිත්වාති චීවරං දූරතොව උක්ඛිපිත්වා. සහසාති සීඝං. උක්කාසිත්වා පවිසෙය්යාති යොජනා.
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
158. වච්චපස්සාවදොණීනං බහීති සම්බන්ධො. උභයන්ති වච්චම්පි පස්සාවම්පි.
158. Vaccapassāvadoṇīnaṃ bahīti sambandho. Ubhayanti vaccampi passāvampi.
159. කූපෙති වච්චාවාටෙ. කට්ඨන්ති අවලෙඛනකට්ඨං. ඵරුසෙනාති ඛරෙන අවලෙඛනකට්ඨෙන. උහතඤ්චාපීති අත්තනා වා පරෙන වා උහතඤ්චාපි වච්චමක්ඛිතඤ්චාපීති අත්ථො. ධොවයෙති සති උදකෙ, උදකෙ අසති කට්ඨෙනපි සොධෙය්ය.
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
160. න නික්ඛමෙති න නික්ඛමෙය්ය. චපු චපූති අනුකරණං, විච්ඡායං ද්විත්තෙ චපු චපු කත්වාති කිරියාවිසෙසනං. නාචමෙය්යාති න ධොවෙය්ය. සති පන උදකෙ ආචමිතබ්බං, අසති යෙන කෙනචි පුඤ්ඡිත්වා ගන්තබ්බං, සබ්බසාධාරණට්ඨානෙ ච ආචමනකුම්භියා උදකං න සෙසෙතබ්බං. උක්ලාපන්ති කචවරං. විසොධයෙති විහාරසොධනෙ විය වච්චපස්සාවකුටියො, පරිවෙණකොට්ඨකෙ ච සම්මජ්ජෙය්ය. සබ්බත්ථෙව ච පන වත්තභෙදෙ දුක්කටං.
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
වච්චපස්සාවට්ඨානිකනිද්දෙසවණ්ණනා නිට්ඨිතා.
Vaccapassāvaṭṭhānikaniddesavaṇṇanā niṭṭhitā.
