| Library / Tipiṭaka / તિપિટક • Tipiṭaka / ખુદ્દસિક્ખા-મૂલસિક્ખા • Khuddasikkhā-mūlasikkhā |
૧૬. વચ્ચપસ્સાવટ્ઠાનિકનિદ્દેસવણ્ણના
16. Vaccapassāvaṭṭhānikaniddesavaṇṇanā
૧૫૬. વચ્ચપસ્સાવટ્ઠાનિકન્તિ ઠાનમ્હિ ઠાને વા ભવં વચ્ચપસ્સાવટ્ઠાનિકં. યથાવુડ્ઢં વચ્ચં ન કરેય્યાતિ સમ્બન્ધો. યે યે વુડ્ઢા યથાવુડ્ઢં, આગતપ્પટિપાટિં હિત્વા વુડ્ઢપ્પટિપાટિયાતિ અત્થો. વચ્ચન્તિ ઉપલક્ખણમત્તં, પસ્સાવઞ્ચ નહાનઞ્ચ ન કરેય્યાતિ અધિપ્પાયો. તદેવ સમત્થેતિ ‘‘યાતાનુપુબ્બિયા’’તિઆદિના. યાતાનુપુબ્બિયાતિ યાતાનં ગતાનં અનુપુબ્બિ અનુક્કમો યાતાનુપુબ્બિ, તાય. વચ્ચ…પે॰… તિત્થઞ્ચાતિ એતં તયં લબ્ભતીતિ અત્થો, ભિક્ખુનાતિ વિઞ્ઞાયતિ.
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
૧૫૭. ઉબ્ભજિત્વા ચ સહસા ચ નો પવિસેય્યાતિ સમ્બન્ધો. ઉબ્ભજિત્વાતિ ચીવરં દૂરતોવ ઉક્ખિપિત્વા. સહસાતિ સીઘં. ઉક્કાસિત્વા પવિસેય્યાતિ યોજના.
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
૧૫૮. વચ્ચપસ્સાવદોણીનં બહીતિ સમ્બન્ધો. ઉભયન્તિ વચ્ચમ્પિ પસ્સાવમ્પિ.
158. Vaccapassāvadoṇīnaṃ bahīti sambandho. Ubhayanti vaccampi passāvampi.
૧૫૯. કૂપેતિ વચ્ચાવાટે. કટ્ઠન્તિ અવલેખનકટ્ઠં. ફરુસેનાતિ ખરેન અવલેખનકટ્ઠેન. ઉહતઞ્ચાપીતિ અત્તના વા પરેન વા ઉહતઞ્ચાપિ વચ્ચમક્ખિતઞ્ચાપીતિ અત્થો. ધોવયેતિ સતિ ઉદકે, ઉદકે અસતિ કટ્ઠેનપિ સોધેય્ય.
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
૧૬૦. ન નિક્ખમેતિ ન નિક્ખમેય્ય. ચપુ ચપૂતિ અનુકરણં, વિચ્છાયં દ્વિત્તે ચપુ ચપુ કત્વાતિ કિરિયાવિસેસનં. નાચમેય્યાતિ ન ધોવેય્ય. સતિ પન ઉદકે આચમિતબ્બં, અસતિ યેન કેનચિ પુઞ્છિત્વા ગન્તબ્બં, સબ્બસાધારણટ્ઠાને ચ આચમનકુમ્ભિયા ઉદકં ન સેસેતબ્બં. ઉક્લાપન્તિ કચવરં. વિસોધયેતિ વિહારસોધને વિય વચ્ચપસ્સાવકુટિયો, પરિવેણકોટ્ઠકે ચ સમ્મજ્જેય્ય. સબ્બત્થેવ ચ પન વત્તભેદે દુક્કટં.
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
વચ્ચપસ્સાવટ્ઠાનિકનિદ્દેસવણ્ણના નિટ્ઠિતા.
Vaccapassāvaṭṭhānikaniddesavaṇṇanā niṭṭhitā.
