| Library / Tipiṭaka / તિપિટક • Tipiṭaka / ખુદ્દસિક્ખા-મૂલસિક્ખા • Khuddasikkhā-mūlasikkhā |
૧૭. આપુચ્છકરણનિદ્દેસવણ્ણના
17. Āpucchakaraṇaniddesavaṇṇanā
૧૬૧. આપુચ્છકરણન્તિ આપુચ્છાય કરણં. અનજ્ઝિટ્ઠોવાતિ અનાણત્તોવ, અયાચિતો એવ વા. ન ચ વિસ્સજેતિ પુચ્છિતપઞ્હં ન વિસ્સજ્જેય્ય ચ, આપુચ્છિત્વા વા યાચિતો વા યથાવુત્તમેતં કાતું લભતીતિ અધિપ્પાયો.
161.Āpucchakaraṇanti āpucchāya karaṇaṃ. Anajjhiṭṭhovāti anāṇattova, ayācito eva vā. Na ca vissajeti pucchitapañhaṃ na vissajjeyya ca, āpucchitvā vā yācito vā yathāvuttametaṃ kātuṃ labhatīti adhippāyo.
૧૬૨. આપુચ્છિત્વા કથેન્તસ્સાતિ અત્તનો વુડ્ઢં આપુચ્છિત્વા ધમ્માદિકં ભાસન્તસ્સ. પુન વુડ્ઢતરાગમેતિ પુન અઞ્ઞસ્સ વુડ્ઢતરસ્સ આગમને સતીતિ અત્થો. પુનઆપુચ્છનં નત્થીતિ ભાસિતબ્બં ઠપેત્વા પુન આપુચ્છનકિચ્ચં નત્થીતિ અત્થો. સઙ્ઘત્થેરે અસતિ આરદ્ધમ્પિ અટ્ઠપેત્વા કથેન્તસ્સાપિ એસેવ નયો. ભત્તગ્ગે અનુમોદતો ચ આપુચ્છનં નત્થીતિ સમ્બન્ધો. અનુમોદતોતિ દાયકેહિ યાચિતસ્સ તંતંપુઞ્ઞાનુમોદનવસેન ધમ્મકથં કરોતો ચ. અનુમોદનઞ્ચ થેરાધેય્યં. ‘‘અનુજાનામિ, ભિક્ખવે થેરેન ભિક્ખુના ભત્તગ્ગે અનુમોદિતુ’’ન્તિ (ચૂળવ॰ ૩૬૨) હિ વુત્તં. ‘‘સચે મનુસ્સા અત્તનો અભિરુચિકેન એકેન અનુમોદનં કારેન્તિ, નેવ તસ્સ અનુમોદતો આપત્તિ, ન મહાથેરસ્સ ભારો હોતિ. ઉપનિસિન્નકથાયમેવ હિ મનુસ્સેસુ કથાપેન્તેસુ મહાથેરો આપુચ્છિતબ્બો’’તિ અટ્ઠકથાયં (ચુળવ॰ અટ્ઠ॰ ૩૬૨) વુત્તં.
162.Āpucchitvākathentassāti attano vuḍḍhaṃ āpucchitvā dhammādikaṃ bhāsantassa. Puna vuḍḍhatarāgameti puna aññassa vuḍḍhatarassa āgamane satīti attho. Punaāpucchanaṃ natthīti bhāsitabbaṃ ṭhapetvā puna āpucchanakiccaṃ natthīti attho. Saṅghatthere asati āraddhampi aṭṭhapetvā kathentassāpi eseva nayo. Bhattagge anumodato ca āpucchanaṃ natthīti sambandho. Anumodatoti dāyakehi yācitassa taṃtaṃpuññānumodanavasena dhammakathaṃ karoto ca. Anumodanañca therādheyyaṃ. ‘‘Anujānāmi, bhikkhave therena bhikkhunā bhattagge anumoditu’’nti (cūḷava. 362) hi vuttaṃ. ‘‘Sace manussā attano abhirucikena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu mahāthero āpucchitabbo’’ti aṭṭhakathāyaṃ (cuḷava. aṭṭha. 362) vuttaṃ.
૧૬૩. વુડ્ઢેન એકવિહારકે વસન્તો ચાતિ સમ્બન્ધો. વુડ્ઢેનાતિ વુડ્ઢેન સદ્ધિં. એકવિહારકેતિ સવનૂપચારે ખુદ્દકવિહારે, ન મહાવિહારે. કુચ્છિતત્થે હિ કપ્પચ્ચયો. ન સજ્ઝાયેય્યાતિ સજ્ઝાયનં ન કરેય્ય.
163. Vuḍḍhena ekavihārake vasanto cāti sambandho. Vuḍḍhenāti vuḍḍhena saddhiṃ. Ekavihāraketi savanūpacāre khuddakavihāre, na mahāvihāre. Kucchitatthe hi kappaccayo. Na sajjhāyeyyāti sajjhāyanaṃ na kareyya.
૧૬૪. ‘‘ધમ્મં ન ભાસયે’’તિઆદીસુ અનાપુચ્છાતિ સમ્બન્ધિતબ્બં. ન ચ વિજ્ઝપેતિ ન ચ નિબ્બાયેય્ય. વાતપાનઞ્ચ આલોકસન્ધિફલકં કવાટઞ્ચ દ્વારફલકં વાતપાનકવાટં વા ન વિવરેય્ય ન થકેય્ય ચાતિ ન-કારો સબ્બત્થ યોજેતબ્બો.
164.‘‘Dhammaṃ na bhāsaye’’tiādīsu anāpucchāti sambandhitabbaṃ. Na ca vijjhapeti na ca nibbāyeyya. Vātapānañca ālokasandhiphalakaṃ kavāṭañca dvāraphalakaṃ vātapānakavāṭaṃ vā na vivareyya na thakeyya cāti na-kāro sabbattha yojetabbo.
૧૬૫. એકચઙ્કમે વુડ્ઢેન ચઙ્કમન્તોપિ યેન વુડ્ઢો, તેન પરિવત્તયેતિ યોજના. યેન તેનાતિ ભુમ્મત્થે કરણવચનં, યત્થ વુડ્ઢો, તત્થાતિ અત્થો, વુડ્ઢં ઓહાય અઞ્ઞતો ન ગન્તબ્બન્તિ અધિપ્પાયો. સોતિ નવકો. એનન્તિ વુડ્ઢં. સબ્બત્થ દુક્કટં. અયઞ્હિ ખન્ધકધમ્મતા યત્થ ન-કારેન પટિસેધો, તત્થ દુક્કટન્તિ.
165. Ekacaṅkame vuḍḍhena caṅkamantopi yena vuḍḍho, tena parivattayeti yojanā. Yena tenāti bhummatthe karaṇavacanaṃ, yattha vuḍḍho, tatthāti attho, vuḍḍhaṃ ohāya aññato na gantabbanti adhippāyo. Soti navako. Enanti vuḍḍhaṃ. Sabbattha dukkaṭaṃ. Ayañhi khandhakadhammatā yattha na-kārena paṭisedho, tattha dukkaṭanti.
આપુચ્છકરણનિદ્દેસવણ્ણના નિટ્ઠિતા.
Āpucchakaraṇaniddesavaṇṇanā niṭṭhitā.
