| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
১৬. ৰচ্চপস্সাৰট্ঠানিকনিদ্দেসৰণ্ণনা
16. Vaccapassāvaṭṭhānikaniddesavaṇṇanā
১৫৬. ৰচ্চপস্সাৰট্ঠানিকন্তি ঠানম্হি ঠানে ৰা ভৰং ৰচ্চপস্সাৰট্ঠানিকং। যথাৰুড্ঢং ৰচ্চং ন করেয্যাতি সম্বন্ধো। যে যে ৰুড্ঢা যথাৰুড্ঢং, আগতপ্পটিপাটিং হিত্ৰা ৰুড্ঢপ্পটিপাটিযাতি অত্থো। ৰচ্চন্তি উপলক্খণমত্তং, পস্সাৰঞ্চ নহানঞ্চ ন করেয্যাতি অধিপ্পাযো। তদেৰ সমত্থেতি ‘‘যাতানুপুব্বিযা’’তিআদিনা। যাতানুপুব্বিযাতি যাতানং গতানং অনুপুব্বি অনুক্কমো যাতানুপুব্বি, তায। ৰচ্চ…পে॰… তিত্থঞ্চাতি এতং তযং লব্ভতীতি অত্থো, ভিক্খুনাতি ৰিঞ্ঞাযতি।
156.Vaccapassāvaṭṭhānikanti ṭhānamhi ṭhāne vā bhavaṃ vaccapassāvaṭṭhānikaṃ. Yathāvuḍḍhaṃ vaccaṃ na kareyyāti sambandho. Ye ye vuḍḍhā yathāvuḍḍhaṃ, āgatappaṭipāṭiṃ hitvā vuḍḍhappaṭipāṭiyāti attho. Vaccanti upalakkhaṇamattaṃ, passāvañca nahānañca na kareyyāti adhippāyo. Tadeva samattheti ‘‘yātānupubbiyā’’tiādinā. Yātānupubbiyāti yātānaṃ gatānaṃ anupubbi anukkamo yātānupubbi, tāya. Vacca…pe… titthañcāti etaṃ tayaṃ labbhatīti attho, bhikkhunāti viññāyati.
১৫৭. উব্ভজিত্ৰা চ সহসা চ নো পৰিসেয্যাতি সম্বন্ধো। উব্ভজিত্ৰাতি চীৰরং দূরতোৰ উক্খিপিত্ৰা। সহসাতি সীঘং। উক্কাসিত্ৰা পৰিসেয্যাতি যোজনা।
157. Ubbhajitvā ca sahasā ca no paviseyyāti sambandho. Ubbhajitvāti cīvaraṃ dūratova ukkhipitvā. Sahasāti sīghaṃ. Ukkāsitvā paviseyyāti yojanā.
১৫৮. ৰচ্চপস্সাৰদোণীনং বহীতি সম্বন্ধো। উভযন্তি ৰচ্চম্পি পস্সাৰম্পি।
158. Vaccapassāvadoṇīnaṃ bahīti sambandho. Ubhayanti vaccampi passāvampi.
১৫৯. কূপেতি ৰচ্চাৰাটে। কট্ঠন্তি অৰলেখনকট্ঠং। ফরুসেনাতি খরেন অৰলেখনকট্ঠেন। উহতঞ্চাপীতি অত্তনা ৰা পরেন ৰা উহতঞ্চাপি ৰচ্চমক্খিতঞ্চাপীতি অত্থো। ধোৰযেতি সতি উদকে, উদকে অসতি কট্ঠেনপি সোধেয্য।
159.Kūpeti vaccāvāṭe. Kaṭṭhanti avalekhanakaṭṭhaṃ. Pharusenāti kharena avalekhanakaṭṭhena. Uhatañcāpīti attanā vā parena vā uhatañcāpi vaccamakkhitañcāpīti attho. Dhovayeti sati udake, udake asati kaṭṭhenapi sodheyya.
১৬০. ন নিক্খমেতি ন নিক্খমেয্য। চপু চপূতি অনুকরণং, ৰিচ্ছাযং দ্ৰিত্তে চপু চপু কত্ৰাতি কিরিযাৰিসেসনং। নাচমেয্যাতি ন ধোৰেয্য। সতি পন উদকে আচমিতব্বং, অসতি যেন কেনচি পুঞ্ছিত্ৰা গন্তব্বং, সব্বসাধারণট্ঠানে চ আচমনকুম্ভিযা উদকং ন সেসেতব্বং। উক্লাপন্তি কচৰরং। ৰিসোধযেতি ৰিহারসোধনে ৰিয ৰচ্চপস্সাৰকুটিযো, পরিৰেণকোট্ঠকে চ সম্মজ্জেয্য। সব্বত্থেৰ চ পন ৰত্তভেদে দুক্কটং।
160.Na nikkhameti na nikkhameyya. Capu capūti anukaraṇaṃ, vicchāyaṃ dvitte capu capu katvāti kiriyāvisesanaṃ. Nācameyyāti na dhoveyya. Sati pana udake ācamitabbaṃ, asati yena kenaci puñchitvā gantabbaṃ, sabbasādhāraṇaṭṭhāne ca ācamanakumbhiyā udakaṃ na sesetabbaṃ. Uklāpanti kacavaraṃ. Visodhayeti vihārasodhane viya vaccapassāvakuṭiyo, pariveṇakoṭṭhake ca sammajjeyya. Sabbattheva ca pana vattabhede dukkaṭaṃ.
ৰচ্চপস্সাৰট্ঠানিকনিদ্দেসৰণ্ণনা নিট্ঠিতা।
Vaccapassāvaṭṭhānikaniddesavaṇṇanā niṭṭhitā.
