| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
১৭. আপুচ্ছকরণনিদ্দেসৰণ্ণনা
17. Āpucchakaraṇaniddesavaṇṇanā
১৬১. আপুচ্ছকরণন্তি আপুচ্ছায করণং। অনজ্ঝিট্ঠোৰাতি অনাণত্তোৰ, অযাচিতো এৰ ৰা। ন চ ৰিস্সজেতি পুচ্ছিতপঞ্হং ন ৰিস্সজ্জেয্য চ, আপুচ্ছিত্ৰা ৰা যাচিতো ৰা যথাৰুত্তমেতং কাতুং লভতীতি অধিপ্পাযো।
161.Āpucchakaraṇanti āpucchāya karaṇaṃ. Anajjhiṭṭhovāti anāṇattova, ayācito eva vā. Na ca vissajeti pucchitapañhaṃ na vissajjeyya ca, āpucchitvā vā yācito vā yathāvuttametaṃ kātuṃ labhatīti adhippāyo.
১৬২. আপুচ্ছিত্ৰা কথেন্তস্সাতি অত্তনো ৰুড্ঢং আপুচ্ছিত্ৰা ধম্মাদিকং ভাসন্তস্স। পুন ৰুড্ঢতরাগমেতি পুন অঞ্ঞস্স ৰুড্ঢতরস্স আগমনে সতীতি অত্থো। পুনআপুচ্ছনং নত্থীতি ভাসিতব্বং ঠপেত্ৰা পুন আপুচ্ছনকিচ্চং নত্থীতি অত্থো। সঙ্ঘত্থেরে অসতি আরদ্ধম্পি অট্ঠপেত্ৰা কথেন্তস্সাপি এসেৰ নযো। ভত্তগ্গে অনুমোদতো চ আপুচ্ছনং নত্থীতি সম্বন্ধো। অনুমোদতোতি দাযকেহি যাচিতস্স তংতংপুঞ্ঞানুমোদনৰসেন ধম্মকথং করোতো চ। অনুমোদনঞ্চ থেরাধেয্যং। ‘‘অনুজানামি, ভিক্খৰে থেরেন ভিক্খুনা ভত্তগ্গে অনুমোদিতু’’ন্তি (চূল়ৰ॰ ৩৬২) হি ৰুত্তং। ‘‘সচে মনুস্সা অত্তনো অভিরুচিকেন একেন অনুমোদনং কারেন্তি, নেৰ তস্স অনুমোদতো আপত্তি, ন মহাথেরস্স ভারো হোতি। উপনিসিন্নকথাযমেৰ হি মনুস্সেসু কথাপেন্তেসু মহাথেরো আপুচ্ছিতব্বো’’তি অট্ঠকথাযং (চুল়ৰ॰ অট্ঠ॰ ৩৬২) ৰুত্তং।
162.Āpucchitvākathentassāti attano vuḍḍhaṃ āpucchitvā dhammādikaṃ bhāsantassa. Puna vuḍḍhatarāgameti puna aññassa vuḍḍhatarassa āgamane satīti attho. Punaāpucchanaṃ natthīti bhāsitabbaṃ ṭhapetvā puna āpucchanakiccaṃ natthīti attho. Saṅghatthere asati āraddhampi aṭṭhapetvā kathentassāpi eseva nayo. Bhattagge anumodato ca āpucchanaṃ natthīti sambandho. Anumodatoti dāyakehi yācitassa taṃtaṃpuññānumodanavasena dhammakathaṃ karoto ca. Anumodanañca therādheyyaṃ. ‘‘Anujānāmi, bhikkhave therena bhikkhunā bhattagge anumoditu’’nti (cūḷava. 362) hi vuttaṃ. ‘‘Sace manussā attano abhirucikena ekena anumodanaṃ kārenti, neva tassa anumodato āpatti, na mahātherassa bhāro hoti. Upanisinnakathāyameva hi manussesu kathāpentesu mahāthero āpucchitabbo’’ti aṭṭhakathāyaṃ (cuḷava. aṭṭha. 362) vuttaṃ.
১৬৩. ৰুড্ঢেন একৰিহারকে ৰসন্তো চাতি সম্বন্ধো। ৰুড্ঢেনাতি ৰুড্ঢেন সদ্ধিং। একৰিহারকেতি সৰনূপচারে খুদ্দকৰিহারে, ন মহাৰিহারে। কুচ্ছিতত্থে হি কপ্পচ্চযো। ন সজ্ঝাযেয্যাতি সজ্ঝাযনং ন করেয্য।
163. Vuḍḍhena ekavihārake vasanto cāti sambandho. Vuḍḍhenāti vuḍḍhena saddhiṃ. Ekavihāraketi savanūpacāre khuddakavihāre, na mahāvihāre. Kucchitatthe hi kappaccayo. Na sajjhāyeyyāti sajjhāyanaṃ na kareyya.
১৬৪. ‘‘ধম্মং ন ভাসযে’’তিআদীসু অনাপুচ্ছাতি সম্বন্ধিতব্বং। ন চ ৰিজ্ঝপেতি ন চ নিব্বাযেয্য। ৰাতপানঞ্চ আলোকসন্ধিফলকং কৰাটঞ্চ দ্ৰারফলকং ৰাতপানকৰাটং ৰা ন ৰিৰরেয্য ন থকেয্য চাতি ন-কারো সব্বত্থ যোজেতব্বো।
164.‘‘Dhammaṃ na bhāsaye’’tiādīsu anāpucchāti sambandhitabbaṃ. Na ca vijjhapeti na ca nibbāyeyya. Vātapānañca ālokasandhiphalakaṃ kavāṭañca dvāraphalakaṃ vātapānakavāṭaṃ vā na vivareyya na thakeyya cāti na-kāro sabbattha yojetabbo.
১৬৫. একচঙ্কমে ৰুড্ঢেন চঙ্কমন্তোপি যেন ৰুড্ঢো, তেন পরিৰত্তযেতি যোজনা। যেন তেনাতি ভুম্মত্থে করণৰচনং, যত্থ ৰুড্ঢো, তত্থাতি অত্থো, ৰুড্ঢং ওহায অঞ্ঞতো ন গন্তব্বন্তি অধিপ্পাযো। সোতি নৰকো। এনন্তি ৰুড্ঢং। সব্বত্থ দুক্কটং। অযঞ্হি খন্ধকধম্মতা যত্থ ন-কারেন পটিসেধো, তত্থ দুক্কটন্তি।
165. Ekacaṅkame vuḍḍhena caṅkamantopi yena vuḍḍho, tena parivattayeti yojanā. Yena tenāti bhummatthe karaṇavacanaṃ, yattha vuḍḍho, tatthāti attho, vuḍḍhaṃ ohāya aññato na gantabbanti adhippāyo. Soti navako. Enanti vuḍḍhaṃ. Sabbattha dukkaṭaṃ. Ayañhi khandhakadhammatā yattha na-kārena paṭisedho, tattha dukkaṭanti.
আপুচ্ছকরণনিদ্দেসৰণ্ণনা নিট্ঠিতা।
Āpucchakaraṇaniddesavaṇṇanā niṭṭhitā.
