| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৯. উত্তরিকরণীযপঞ্হো
9. Uttarikaraṇīyapañho
৯. ‘‘ভন্তে নাগসেন, তুম্হে ভণথ ‘যং কিঞ্চি করণীযং তথাগতস্স, সব্বং তং বোধিযা যেৰ মূলে পরিনিট্ঠিতং, নত্থি তথাগতস্স উত্তরিং করণীযং, কতস্স ৰা পতিচযো’তি, ইদঞ্চ তেমাসং পটিসল্লানং দিস্সতি। যদি, ভন্তে নাগসেন, যং কিঞ্চি করণীযং তথাগতস্স, সব্বং তং বোধিযা যেৰ মূলে পরিনিট্ঠিতং, নত্থি তথাগতস্স উত্তরিং করণীযং, কতস্স ৰা পতিচযো, তেন হি ‘তেমাসং পটিসল্লীনো’তি যং ৰচনং, তং মিচ্ছা। যদি তেমাসং পটিসল্লীনো, তেন হি ‘যং কিঞ্চি করণীযং, তথাগতস্স, সব্বং তং বোধিযা যেৰ মূলে পরিনিট্ঠিত’ন্তি তম্পি ৰচনং মিচ্ছা । নত্থি কতকরণীযস্স পটিসল্লানং, সকরণীযস্সেৰ পটিসল্লানং যথা নাম ব্যাধিতস্সেৰ ভেসজ্জেন করণীযং হোতি, অব্যাধিতস্স কিং ভেসজ্জেন। ছাতস্সেৰ ভোজনেন করণীযং হোতি, অছাতস্স কিং ভোজনেন। এৰমেৰ খো, ভন্তে নাগসেন, নত্থি কতকরণীযস্স পটিসল্লানং, সকরণীযস্সেৰ পটিসল্লানং। অযম্পি উভতো কোটিকো পঞ্হো তৰানুপ্পত্তো, সো তযা নিব্বাহিতব্বো’’তি।
9. ‘‘Bhante nāgasena, tumhe bhaṇatha ‘yaṃ kiñci karaṇīyaṃ tathāgatassa, sabbaṃ taṃ bodhiyā yeva mūle pariniṭṭhitaṃ, natthi tathāgatassa uttariṃ karaṇīyaṃ, katassa vā paticayo’ti, idañca temāsaṃ paṭisallānaṃ dissati. Yadi, bhante nāgasena, yaṃ kiñci karaṇīyaṃ tathāgatassa, sabbaṃ taṃ bodhiyā yeva mūle pariniṭṭhitaṃ, natthi tathāgatassa uttariṃ karaṇīyaṃ, katassa vā paticayo, tena hi ‘temāsaṃ paṭisallīno’ti yaṃ vacanaṃ, taṃ micchā. Yadi temāsaṃ paṭisallīno, tena hi ‘yaṃ kiñci karaṇīyaṃ, tathāgatassa, sabbaṃ taṃ bodhiyā yeva mūle pariniṭṭhita’nti tampi vacanaṃ micchā . Natthi katakaraṇīyassa paṭisallānaṃ, sakaraṇīyasseva paṭisallānaṃ yathā nāma byādhitasseva bhesajjena karaṇīyaṃ hoti, abyādhitassa kiṃ bhesajjena. Chātasseva bhojanena karaṇīyaṃ hoti, achātassa kiṃ bhojanena. Evameva kho, bhante nāgasena, natthi katakaraṇīyassa paṭisallānaṃ, sakaraṇīyasseva paṭisallānaṃ. Ayampi ubhato koṭiko pañho tavānuppatto, so tayā nibbāhitabbo’’ti.
‘‘যং কিঞ্চি, মহারাজ, করণীযং তথাগতস্স, সব্বং তং বোধিযা যেৰ মূলে পরিনিট্ঠিতং, নত্থি তথাগতস্স উত্তরিং করণীযং, কতস্স ৰা পতিচযো, ভগৰা চ তেমাসং পটিসল্লীনো, পটিসল্লানং খো, মহারাজ, বহুগুণং, সব্বেপি তথাগতা পটিসল্লীযিত্ৰা সব্বঞ্ঞুতং পত্তা, তং তে সুকতগুণমনুস্সরন্তা পটিসল্লানং সেৰন্তি। যথা, মহারাজ, পুরিসো রঞ্ঞো সন্তিকা লদ্ধৰরো পটিলদ্ধভোগো তং সুকতগুণমনুস্সরন্তো অপরাপরং রঞ্ঞো উপট্ঠানং এতি। এৰমেৰ খো, মহারাজ, সব্বেপি তথাগতা পটিসল্লীযিত্ৰা সব্বঞ্ঞুতং পত্তা, তং তে সুকতগুণমনুস্সরন্তা পটিসল্লানং সেৰন্তি।
‘‘Yaṃ kiñci, mahārāja, karaṇīyaṃ tathāgatassa, sabbaṃ taṃ bodhiyā yeva mūle pariniṭṭhitaṃ, natthi tathāgatassa uttariṃ karaṇīyaṃ, katassa vā paticayo, bhagavā ca temāsaṃ paṭisallīno, paṭisallānaṃ kho, mahārāja, bahuguṇaṃ, sabbepi tathāgatā paṭisallīyitvā sabbaññutaṃ pattā, taṃ te sukataguṇamanussarantā paṭisallānaṃ sevanti. Yathā, mahārāja, puriso rañño santikā laddhavaro paṭiladdhabhogo taṃ sukataguṇamanussaranto aparāparaṃ rañño upaṭṭhānaṃ eti. Evameva kho, mahārāja, sabbepi tathāgatā paṭisallīyitvā sabbaññutaṃ pattā, taṃ te sukataguṇamanussarantā paṭisallānaṃ sevanti.
‘‘যথা ৰা পন, মহারাজ, পুরিসো আতুরো দুক্খিতো বাল়্হগিলানো ভিসক্কমুপসেৰিত্ৰা সোত্থিমনুপ্পত্তো তং সুকতগুণমনুস্সরন্তো অপরাপরং ভিসক্কমুপসেৰতি। এৰমেৰ খো, মহারাজ, সব্বেপি তথাগতা পটিসল্লীযিত্ৰা সব্বঞ্ঞুতং পত্তা, তং তে সুকতগুণমনুস্সরন্তা পটিসল্লানং সেৰন্তি।
‘‘Yathā vā pana, mahārāja, puriso āturo dukkhito bāḷhagilāno bhisakkamupasevitvā sotthimanuppatto taṃ sukataguṇamanussaranto aparāparaṃ bhisakkamupasevati. Evameva kho, mahārāja, sabbepi tathāgatā paṭisallīyitvā sabbaññutaṃ pattā, taṃ te sukataguṇamanussarantā paṭisallānaṃ sevanti.
‘‘অট্ঠৰীসতি খো পনিমে, মহারাজ, পটিসল্লানগুণা, যে গুণে সমনুস্সরন্তা 1 তথাগতা পটিসল্লানং সেৰন্তি। কতমে অট্ঠৰীসতি? ইধ, মহারাজ, পটিসল্লানং পটিসল্লীযমানং অত্তানং রক্খতি, আযুং ৰড্ঢেতি, বলং দেতি, ৰজ্জং পিদহতি, অযসমপনেতি, যসমুপনেতি, অরতিং ৰিনোদেতি, রতিমুপদহতি, ভযমপনেতি, ৰেসারজ্জং করোতি, কোসজ্জমপনেতি, ৰীরিযমভিজনেতি, রাগমপনেতি, দোসমপনেতি, মোহমপনেতি, মানং নিহন্তি, ৰিতক্কং ভঞ্জতি, চিত্তং একগ্গং করোতি, মানসং স্নেহযতি 2, হাসং জনেতি, গরুকং করোতি, লাভমুপ্পাদযতি, নমস্সিযং করোতি , পীতিং পাপেতি, পামোজ্জং করোতি, সঙ্খারানং সভাৰং দস্সযতি, ভৰপ্পটিসন্ধিং উগ্ঘাটেতি, সব্বসামঞ্ঞং দেতি। ইমে খো, মহারাজ, অট্ঠৰীসতি পটিসল্লানগুণা, যে গুণে সমনুস্সরন্তা তথাগতা পটিসল্লানং সেৰন্তি।
‘‘Aṭṭhavīsati kho panime, mahārāja, paṭisallānaguṇā, ye guṇe samanussarantā 3 tathāgatā paṭisallānaṃ sevanti. Katame aṭṭhavīsati? Idha, mahārāja, paṭisallānaṃ paṭisallīyamānaṃ attānaṃ rakkhati, āyuṃ vaḍḍheti, balaṃ deti, vajjaṃ pidahati, ayasamapaneti, yasamupaneti, aratiṃ vinodeti, ratimupadahati, bhayamapaneti, vesārajjaṃ karoti, kosajjamapaneti, vīriyamabhijaneti, rāgamapaneti, dosamapaneti, mohamapaneti, mānaṃ nihanti, vitakkaṃ bhañjati, cittaṃ ekaggaṃ karoti, mānasaṃ snehayati 4, hāsaṃ janeti, garukaṃ karoti, lābhamuppādayati, namassiyaṃ karoti , pītiṃ pāpeti, pāmojjaṃ karoti, saṅkhārānaṃ sabhāvaṃ dassayati, bhavappaṭisandhiṃ ugghāṭeti, sabbasāmaññaṃ deti. Ime kho, mahārāja, aṭṭhavīsati paṭisallānaguṇā, ye guṇe samanussarantā tathāgatā paṭisallānaṃ sevanti.
‘‘অপি চ খো, মহারাজ, তথাগতা সন্তং সুখং সমাপত্তিরতিং অনুভৰিতুকামা পটিসল্লানং সেৰন্তি পরিযোসিতসঙ্কপ্পা। চতূহি খো, মহারাজ, কারণেহি তথাগতা পটিসল্লানং সেৰন্তি। কতমেহি চতূহি? ৰিহারফাসুতাযপি, মহারাজ, তথাগতা পটিসল্লানং সেৰন্তি, অনৰজ্জগুণবহুলতাযপি তথাগতা পটিসল্লানং সেৰন্তি, অসেসঅরিযৰীথিতোপি তথাগতা পটিসল্লানং সেৰন্তি, সব্ববুদ্ধানং থুতথোমিতৰণ্ণিতপসত্থতোপি তথাগতা পটিসল্লানং সেৰন্তি। ইমেহি খো, মহারাজ, চতূহি কারণেহি তথাগতা পটিসল্লানং সেৰন্তি। ইতি খো, মহারাজ, তথাগতা পটিসল্লানং সেৰন্তি ন সকরণীযতায, ন কতস্স ৰা পতিচযায, অথ খো গুণৰিসেসদস্সাৰিতায তথাগতা পটিসল্লানং সেৰন্তী’’তি। ‘‘সাধু, ভন্তে নাগসেন, এৰমেতং তথা সম্পটিচ্ছামী’’তি।
‘‘Api ca kho, mahārāja, tathāgatā santaṃ sukhaṃ samāpattiratiṃ anubhavitukāmā paṭisallānaṃ sevanti pariyositasaṅkappā. Catūhi kho, mahārāja, kāraṇehi tathāgatā paṭisallānaṃ sevanti. Katamehi catūhi? Vihāraphāsutāyapi, mahārāja, tathāgatā paṭisallānaṃ sevanti, anavajjaguṇabahulatāyapi tathāgatā paṭisallānaṃ sevanti, asesaariyavīthitopi tathāgatā paṭisallānaṃ sevanti, sabbabuddhānaṃ thutathomitavaṇṇitapasatthatopi tathāgatā paṭisallānaṃ sevanti. Imehi kho, mahārāja, catūhi kāraṇehi tathāgatā paṭisallānaṃ sevanti. Iti kho, mahārāja, tathāgatā paṭisallānaṃ sevanti na sakaraṇīyatāya, na katassa vā paticayāya, atha kho guṇavisesadassāvitāya tathāgatā paṭisallānaṃ sevantī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
উত্তরিকরণীযপঞ্হো নৰমো।
Uttarikaraṇīyapañho navamo.
Footnotes:
