| Library / Tipiṭaka / តិបិដក • Tipiṭaka / ថេរីគាថា-អដ្ឋកថា • Therīgāthā-aṭṭhakathā |
១៥. ឧត្តរាថេរីគាថាវណ្ណនា
15. Uttarātherīgāthāvaṇṇanā
កាយេន សំវុតា អាសិន្តិ ឧត្តរាយ ថេរិយា គាថា។ តស្សាបិ វត្ថុ តិស្សាថេរិយា វត្ថុសទិសំ។ សាបិ ហិ សក្យកុលប្បសុតា ពោធិសត្តស្ស ឱរោធភូតា មហាបជាបតិគោតមិយា សទ្ធិំ និក្ខន្តា ឱភាសគាថាយ អរហត្តំ បត្វា បន –
Kāyena saṃvutā āsinti uttarāya theriyā gāthā. Tassāpi vatthu tissātheriyā vatthusadisaṃ. Sāpi hi sakyakulappasutā bodhisattassa orodhabhūtā mahāpajāpatigotamiyā saddhiṃ nikkhantā obhāsagāthāya arahattaṃ patvā pana –
១៥.
15.
‘‘កាយេន សំវុតា អាសិំ, វាចាយ ឧទ ចេតសា;
‘‘Kāyena saṃvutā āsiṃ, vācāya uda cetasā;
សមូលំ តណ្ហមព្ពុយ្ហ, សីតិភូតាម្ហិ និព្ពុតា’’តិ។ –
Samūlaṃ taṇhamabbuyha, sītibhūtāmhi nibbutā’’ti. –
ឧទានវសេន តមេវ គាថំ អភាសិ។
Udānavasena tameva gāthaṃ abhāsi.
តត្ថ កាយេន សំវុតា អាសិន្តិ កាយិកេន សំវរេន សំវុតា អហោសិំ។ វាចាយាតិ វាចសិកេន សំវរេន សំវុតា អាសិន្តិ យោជនា, បទទ្វយេនាបិ សីលសំវរមាហ។ ឧទាតិ អថ។ ចេតសាតិ សមាធិចិត្តេន, ឯតេន វិបស្សនាភាវនមាហ។ សមូលំ តណ្ហមព្ពុយ្ហាតិ សានុសយំ, សហ វា អវិជ្ជាយ តណ្ហំ ឧទ្ធរិត្វា។ អវិជ្ជាយ ហិ បដិច្ឆាទិតាទីនវេ ភវត្តយេ តណ្ហា ឧប្បជ្ជតិ។
Tattha kāyena saṃvutā āsinti kāyikena saṃvarena saṃvutā ahosiṃ. Vācāyāti vācasikena saṃvarena saṃvutā āsinti yojanā, padadvayenāpi sīlasaṃvaramāha. Udāti atha. Cetasāti samādhicittena, etena vipassanābhāvanamāha. Samūlaṃ taṇhamabbuyhāti sānusayaṃ, saha vā avijjāya taṇhaṃ uddharitvā. Avijjāya hi paṭicchāditādīnave bhavattaye taṇhā uppajjati.
អបរោ នយោ – កាយេន សំវុតាតិ សម្មាកម្មន្តេន សព្ពសោ មិច្ឆាកម្មន្តស្ស បហានា មគ្គសំវរេនេវ កាយេន សំវុតា អាសិំ។ វាចាយាតិ សម្មាវាចាយ សព្ពសោ មិច្ឆាវាចាយ បហានា មគ្គសំវរេនេវ វាចាយ សំវុតា អាសិន្តិ អត្ថោ។ ចេតសាតិ សមាធិនា។ ចេតោសីសេន ហេត្ថ សម្មាសមាធិ វុត្តោ, សម្មាសមាធិគ្គហណេនេវ មគ្គលក្ខណេន ឯកលក្ខណា សម្មាទិដ្ឋិអាទយោ មគ្គធម្មា គហិតាវ ហោន្តីតិ, មគ្គសំវរេន អភិជ្ឈាទិកស្ស អសំវរស្ស អនវសេសតោ បហានំ ទស្សិតំ ហោតិ។ តេនេវាហ ‘‘សមូលំ តណ្ហមព្ពុយ្ហា’’តិ។ សីតិភូតាម្ហិ និព្ពុតាតិ សព្ពសោ កិលេសបរិឡាហាភាវេន សីតិភាវប្បត្តា អនុបាទិសេសាយ និព្ពានធាតុយា និព្ពុតា អម្ហីតិ។
Aparo nayo – kāyena saṃvutāti sammākammantena sabbaso micchākammantassa pahānā maggasaṃvareneva kāyena saṃvutā āsiṃ. Vācāyāti sammāvācāya sabbaso micchāvācāya pahānā maggasaṃvareneva vācāya saṃvutā āsinti attho. Cetasāti samādhinā. Cetosīsena hettha sammāsamādhi vutto, sammāsamādhiggahaṇeneva maggalakkhaṇena ekalakkhaṇā sammādiṭṭhiādayo maggadhammā gahitāva hontīti, maggasaṃvarena abhijjhādikassa asaṃvarassa anavasesato pahānaṃ dassitaṃ hoti. Tenevāha ‘‘samūlaṃ taṇhamabbuyhā’’ti. Sītibhūtāmhi nibbutāti sabbaso kilesapariḷāhābhāvena sītibhāvappattā anupādisesāya nibbānadhātuyā nibbutā amhīti.
ឧត្តរាថេរីគាថាវណ្ណនា និដ្ឋិតា។
Uttarātherīgāthāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / ថេរីគាថាបាឡិ • Therīgāthāpāḷi / ១៥. ឧត្តរាថេរីគាថា • 15. Uttarātherīgāthā
