| Library / Tipiṭaka / ತಿಪಿಟಕ • Tipiṭaka / ಥೇರಗಾಥಾಪಾಳಿ • Theragāthāpāḷi |
೬. ಛಕ್ಕನಿಪಾತೋ
6. Chakkanipāto
೧. ಉರುವೇಳಕಸ್ಸಪತ್ಥೇರಗಾಥಾ
1. Uruveḷakassapattheragāthā
೩೭೫.
375.
‘‘ದಿಸ್ವಾನ ಪಾಟಿಹೀರಾನಿ, ಗೋತಮಸ್ಸ ಯಸಸ್ಸಿನೋ।
‘‘Disvāna pāṭihīrāni, gotamassa yasassino;
ನ ತಾವಾಹಂ ಪಣಿಪತಿಂ, ಇಸ್ಸಾಮಾನೇನ ವಞ್ಚಿತೋ॥
Na tāvāhaṃ paṇipatiṃ, issāmānena vañcito.
೩೭೬.
376.
‘‘ಮಮ ಸಙ್ಕಪ್ಪಮಞ್ಞಾಯ, ಚೋದೇಸಿ ನರಸಾರಥಿ।
‘‘Mama saṅkappamaññāya, codesi narasārathi;
ತತೋ ಮೇ ಆಸಿ ಸಂವೇಗೋ, ಅಬ್ಭುತೋ ಲೋಮಹಂಸನೋ॥
Tato me āsi saṃvego, abbhuto lomahaṃsano.
೩೭೭.
377.
‘‘ಪುಬ್ಬೇ ಜಟಿಲಭೂತಸ್ಸ, ಯಾ ಮೇ ಸಿದ್ಧಿ ಪರಿತ್ತಿಕಾ।
‘‘Pubbe jaṭilabhūtassa, yā me siddhi parittikā;
೩೭೮.
378.
‘‘ಪುಬ್ಬೇ ಯಞ್ಞೇನ ಸನ್ತುಟ್ಠೋ, ಕಾಮಧಾತುಪುರಕ್ಖತೋ।
‘‘Pubbe yaññena santuṭṭho, kāmadhātupurakkhato;
ಪಚ್ಛಾ ರಾಗಞ್ಚ ದೋಸಞ್ಚ, ಮೋಹಞ್ಚಾಪಿ ಸಮೂಹನಿಂ॥
Pacchā rāgañca dosañca, mohañcāpi samūhaniṃ.
೩೭೯.
379.
‘‘ಪುಬ್ಬೇನಿವಾಸಂ ಜಾನಾಮಿ, ದಿಬ್ಬಚಕ್ಖು ವಿಸೋಧಿತಂ।
‘‘Pubbenivāsaṃ jānāmi, dibbacakkhu visodhitaṃ;
ಇದ್ಧಿಮಾ ಪರಚಿತ್ತಞ್ಞೂ, ದಿಬ್ಬಸೋತಞ್ಚ ಪಾಪುಣಿಂ॥
Iddhimā paracittaññū, dibbasotañca pāpuṇiṃ.
೩೮೦.
380.
‘‘ಯಸ್ಸ ಚತ್ಥಾಯ ಪಬ್ಬಜಿತೋ, ಅಗಾರಸ್ಮಾನಗಾರಿಯಂ।
‘‘Yassa catthāya pabbajito, agārasmānagāriyaṃ;
ಸೋ ಮೇ ಅತ್ಥೋ ಅನುಪ್ಪತ್ತೋ, ಸಬ್ಬಸಂಯೋಜನಕ್ಖಯೋ’’ತಿ॥
So me attho anuppatto, sabbasaṃyojanakkhayo’’ti.
… ಉರುವೇಳಕಸ್ಸಪೋ ಥೇರೋ…।
… Uruveḷakassapo thero….
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರಗಾಥಾ-ಅಟ್ಠಕಥಾ • Theragāthā-aṭṭhakathā / ೧. ಉರುವೇಲಕಸ್ಸಪತ್ಥೇರಗಾಥಾವಣ್ಣನಾ • 1. Uruvelakassapattheragāthāvaṇṇanā
