| Library / Tipiṭaka / ತಿಪಿಟಕ • Tipiṭaka / ಜಾತಕ-ಅಟ್ಠಕಥಾ • Jātaka-aṭṭhakathā |
[೧೫೪] ೪. ಉರಗಜಾತಕವಣ್ಣನಾ
[154] 4. Uragajātakavaṇṇanā
ಇಧೂರಗಾನಂ ಪವರೋ ಪವಿಟ್ಠೋತಿ ಇದಂ ಸತ್ಥಾ ಜೇತವನೇ ವಿಹರನ್ತೋ ಸೇಣಿಭಣ್ಡನಂ ಆರಬ್ಭ ಕಥೇಸಿ। ಕೋಸಲರಞ್ಞೋ ಕಿರ ಸೇವಕಾ ಸೇಣಿಪಮುಖಾ ದ್ವೇ ಮಹಾಮತ್ತಾ ಅಞ್ಞಮಞ್ಞಂ ದಿಟ್ಠಟ್ಠಾನೇ ಕಲಹಂ ಕರೋನ್ತಿ, ತೇಸಂ ವೇರಿಭಾವೋ ಸಕಲನಗರೇ ಪಾಕಟೋ ಜಾತೋ। ತೇ ನೇವ ರಾಜಾ, ನ ಞಾತಿಮಿತ್ತಾ ಸಮಗ್ಗೇ ಕಾತುಂ ಸಕ್ಖಿಂಸು। ಅಥೇಕದಿವಸಂ ಸತ್ಥಾ ಪಚ್ಚೂಸಸಮಯೇ ಬೋಧನೇಯ್ಯಬನ್ಧವೇ ಓಲೋಕೇನ್ತೋ ತೇಸಂ ಉಭಿನ್ನಮ್ಪಿ ಸೋತಾಪತ್ತಿಮಗ್ಗಸ್ಸ ಉಪನಿಸ್ಸಯಂ ದಿಸ್ವಾ ಪುನದಿವಸೇ ಏಕಕೋವ ಸಾವತ್ಥಿಯಂ ಪಿಣ್ಡಾಯ ಪವಿಸಿತ್ವಾ ತೇಸು ಏಕಸ್ಸ ಗೇಹದ್ವಾರೇ ಅಟ್ಠಾಸಿ। ಸೋ ನಿಕ್ಖಮಿತ್ವಾ ಪತ್ತಂ ಗಹೇತ್ವಾ ಸತ್ಥಾರಂ ಅನ್ತೋನಿವೇಸನಂ ಪವೇಸೇತ್ವಾ ಆಸನಂ ಪಞ್ಞಪೇತ್ವಾ ನಿಸೀದಾಪೇಸಿ। ಸತ್ಥಾ ನಿಸೀದಿತ್ವಾ ತಸ್ಸ ಮೇತ್ತಾಭಾವನಾಯ ಆನಿಸಂಸಂ ಕಥೇತ್ವಾ ಕಲ್ಲಚಿತ್ತತಂ ಞತ್ವಾ ಸಚ್ಚಾನಿ ಪಕಾಸೇಸಿ, ಸೋ ಸಚ್ಚಪರಿಯೋಸಾನೇ ಸೋತಾಪತ್ತಿಫಲೇ ಪತಿಟ್ಠಹಿ।
Idhūragānaṃ pavaro paviṭṭhoti idaṃ satthā jetavane viharanto seṇibhaṇḍanaṃ ārabbha kathesi. Kosalarañño kira sevakā seṇipamukhā dve mahāmattā aññamaññaṃ diṭṭhaṭṭhāne kalahaṃ karonti, tesaṃ veribhāvo sakalanagare pākaṭo jāto. Te neva rājā, na ñātimittā samagge kātuṃ sakkhiṃsu. Athekadivasaṃ satthā paccūsasamaye bodhaneyyabandhave olokento tesaṃ ubhinnampi sotāpattimaggassa upanissayaṃ disvā punadivase ekakova sāvatthiyaṃ piṇḍāya pavisitvā tesu ekassa gehadvāre aṭṭhāsi. So nikkhamitvā pattaṃ gahetvā satthāraṃ antonivesanaṃ pavesetvā āsanaṃ paññapetvā nisīdāpesi. Satthā nisīditvā tassa mettābhāvanāya ānisaṃsaṃ kathetvā kallacittataṃ ñatvā saccāni pakāsesi, so saccapariyosāne sotāpattiphale patiṭṭhahi.
ಸತ್ಥಾ ತಸ್ಸ ಸೋತಾಪನ್ನಭಾವಂ ಞತ್ವಾ ತಮೇವ ಪತ್ತಂ ಗಾಹಾಪೇತ್ವಾ ಉಟ್ಠಾಯ ಇತರಸ್ಸ ಗೇಹದ್ವಾರಂ ಅಗಮಾಸಿ। ಸೋಪಿ ನಿಕ್ಖಮಿತ್ವಾ ಸತ್ಥಾರಂ ವನ್ದಿತ್ವಾ ‘‘ಪವಿಸಥ, ಭನ್ತೇ’’ತಿ ಘರಂ ಪವೇಸೇತ್ವಾ ನಿಸೀದಾಪೇಸಿ। ಇತರೋಪಿ ಪತ್ತಂ ಗಹೇತ್ವಾ ಸತ್ಥಾರಾ ಸದ್ಧಿಂಯೇವ ಪಾವಿಸಿ। ಸತ್ಥಾ ತಸ್ಸ ಏಕಾದಸ ಮೇತ್ತಾನಿಸಂಸೇ ವಣ್ಣೇತ್ವಾ ಕಲ್ಲಚಿತ್ತತಂ ಞತ್ವಾ ಸಚ್ಚಾನಿ ಪಕಾಸೇಸಿ, ಸಚ್ಚಪರಿಯೋಸಾನೇ ಸೋಪಿ ಸೋತಾಪತ್ತಿಫಲೇ ಪತಿಟ್ಠಹಿ। ಇತಿ ತೇ ಉಭೋಪಿ ಸೋತಾಪನ್ನಾ ಹುತ್ವಾ ಅಞ್ಞಮಞ್ಞಂ ಅಚ್ಚಯಂ ದಸ್ಸೇತ್ವಾ ಖಮಾಪೇತ್ವಾ ಸಮಗ್ಗಾ ಸಮ್ಮೋದಮಾನಾ ಏಕಜ್ಝಾಸಯಾ ಅಹೇಸುಂ। ತಂ ದಿವಸಞ್ಞೇವ ಚ ಭಗವತೋ ಸಮ್ಮುಖಾವ ಏಕತೋ ಭುಞ್ಜಿಂಸು। ಸತ್ಥಾ ಭತ್ತಕಿಚ್ಚಂ ನಿಟ್ಠಾಪೇತ್ವಾ ವಿಹಾರಂ ಅಗಮಾಸಿ। ತೇ ಬಹೂನಿ ಮಾಲಾಗನ್ಧವಿಲೇಪನಾನಿ ಚೇವ ಸಪ್ಪಿಮಧುಫಾಣಿತಾದೀನಿ ಚ ಆದಾಯ ಸತ್ಥಾರಾ ಸದ್ಧಿಂಯೇವ ನಿಕ್ಖಮಿಂಸು। ಸತ್ಥಾ ಭಿಕ್ಖುಸಙ್ಘೇನ ವತ್ತೇ ದಸ್ಸಿತೇ ಸುಗತೋವಾದಂ ದತ್ವಾ ಗನ್ಧಕುಟಿಂ ಪಾವಿಸಿ।
Satthā tassa sotāpannabhāvaṃ ñatvā tameva pattaṃ gāhāpetvā uṭṭhāya itarassa gehadvāraṃ agamāsi. Sopi nikkhamitvā satthāraṃ vanditvā ‘‘pavisatha, bhante’’ti gharaṃ pavesetvā nisīdāpesi. Itaropi pattaṃ gahetvā satthārā saddhiṃyeva pāvisi. Satthā tassa ekādasa mettānisaṃse vaṇṇetvā kallacittataṃ ñatvā saccāni pakāsesi, saccapariyosāne sopi sotāpattiphale patiṭṭhahi. Iti te ubhopi sotāpannā hutvā aññamaññaṃ accayaṃ dassetvā khamāpetvā samaggā sammodamānā ekajjhāsayā ahesuṃ. Taṃ divasaññeva ca bhagavato sammukhāva ekato bhuñjiṃsu. Satthā bhattakiccaṃ niṭṭhāpetvā vihāraṃ agamāsi. Te bahūni mālāgandhavilepanāni ceva sappimadhuphāṇitādīni ca ādāya satthārā saddhiṃyeva nikkhamiṃsu. Satthā bhikkhusaṅghena vatte dassite sugatovādaṃ datvā gandhakuṭiṃ pāvisi.
ಭಿಕ್ಖೂ ಸಾಯನ್ಹಸಮಯೇ ಧಮ್ಮಸಭಾಯಂ ಸತ್ಥು ಗುಣಕಥಂ ಸಮುಟ್ಠಾಪೇಸುಂ ‘‘ಆವುಸೋ, ಸತ್ಥಾ ಅದನ್ತದಮಕೋ, ಯೇ ನಾಮ ದ್ವೇ ಮಹಾಮತ್ತೇ ಚಿರಂ ವಾಯಮಮಾನೋಪಿ ನೇವ ರಾಜಾ ಸಮಗ್ಗೇ ಕಾತುಂ ಸಕ್ಖಿ, ನ ಞಾತಿಮಿತ್ತಾದಯೋ ಸಕ್ಖಿಂಸು, ತೇ ಏಕದಿವಸೇನೇವ ತಥಾಗತೇನ ದಮಿತಾ’’ತಿ। ಸತ್ಥಾ ಆಗನ್ತ್ವಾ ‘‘ಕಾಯ ನುತ್ಥ, ಭಿಕ್ಖವೇ, ಏತರಹಿ ಕಥಾಯ ಸನ್ನಿಸಿನ್ನಾ’’ತಿ ಪುಚ್ಛಿತ್ವಾ ‘‘ಇಮಾಯ ನಾಮಾ’’ತಿ ವುತ್ತೇ ‘‘ನ, ಭಿಕ್ಖವೇ, ಇದಾನೇವಾಹಂ ಇಮೇ ದ್ವೇ ಜನೇ ಸಮಗ್ಗೇ ಅಕಾಸಿಂ, ಪುಬ್ಬೇಪೇತೇ ಮಯಾ ಸಮಗ್ಗಾ ಕತಾಯೇವಾ’’ತಿ ವತ್ವಾ ಅತೀತಂ ಆಹರಿ।
Bhikkhū sāyanhasamaye dhammasabhāyaṃ satthu guṇakathaṃ samuṭṭhāpesuṃ ‘‘āvuso, satthā adantadamako, ye nāma dve mahāmatte ciraṃ vāyamamānopi neva rājā samagge kātuṃ sakkhi, na ñātimittādayo sakkhiṃsu, te ekadivaseneva tathāgatena damitā’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idānevāhaṃ ime dve jane samagge akāsiṃ, pubbepete mayā samaggā katāyevā’’ti vatvā atītaṃ āhari.
ಅತೀತೇ ಬಾರಾಣಸಿಯಂ ಬ್ರಹ್ಮದತ್ತೇ ರಜ್ಜಂ ಕಾರೇನ್ತೇ ಬಾರಾಣಸಿಯಂ ಉಸ್ಸವೇ ಘೋಸಿತೇ ಮಹಾಸಮಜ್ಜಂ ಅಹೋಸಿ। ಬಹೂ ಮನುಸ್ಸಾ ಚೇವ ದೇವನಾಗಸುಪಣ್ಣಾದಯೋ ಚ ಸಮಜ್ಜದಸ್ಸನತ್ಥಂ ಸನ್ನಿಪತಿಂಸು। ತತ್ರೇಕಸ್ಮಿಂ ಠಾನೇ ಏಕೋ ನಾಗೋ ಚ ಸುಪಣ್ಣೋ ಚ ಸಮಜ್ಜಂ ಪಸ್ಸಮಾನಾ ಏಕತೋ ಅಟ್ಠಂಸು। ನಾಗೋ ಸುಪಣ್ಣಸ್ಸ ಸುಪಣ್ಣಭಾವಂ ಅಜಾನನ್ತೋ ಅಂಸೇ ಹತ್ಥಂ ಠಪೇಸಿ। ಸುಪಣ್ಣೋ ‘‘ಕೇನ ಮೇ ಅಂಸೇ ಹತ್ಥೋ ಠಪಿತೋ’’ತಿ ನಿವತ್ತಿತ್ವಾ ಓಲೋಕೇನ್ತೋ ನಾಗಂ ಸಞ್ಜಾನಿ। ನಾಗೋಪಿ ಓಲೋಕೇನ್ತೋ ಸುಪಣ್ಣಂ ಸಞ್ಜಾನಿತ್ವಾ ಮರಣಭಯತಜ್ಜಿತೋ ನಗರಾ ನಿಕ್ಖಮಿತ್ವಾ ನದೀಪಿಟ್ಠೇನ ಪಲಾಯಿ। ಸುಪಣ್ಣೋಪಿ ‘‘ತಂ ಗಹೇಸ್ಸಾಮೀ’’ತಿ ಅನುಬನ್ಧಿ। ತಸ್ಮಿಂ ಸಮಯೇ ಬೋಧಿಸತ್ತೋ ತಾಪಸೋ ಹುತ್ವಾ ತಸ್ಸಾ ನದಿಯಾ ತೀರೇ ಪಣ್ಣಸಾಲಾಯ ವಸಮಾನೋ ದಿವಾ ದರಥಪಟಿಪ್ಪಸ್ಸಮ್ಭನತ್ಥಂ ಉದಕಸಾಟಿಕಂ ನಿವಾಸೇತ್ವಾ ವಕ್ಕಲಂ ಬಹಿ ಠಪೇತ್ವಾ ನದಿಂ ಓತರಿತ್ವಾ ನ್ಹಾಯತಿ। ನಾಗೋ ‘‘ಇಮಂ ಪಬ್ಬಜಿತಂ ನಿಸ್ಸಾಯ ಜೀವಿತಂ ಲಭಿಸ್ಸಾಮೀ’’ತಿ ಪಕತಿವಣ್ಣಂ ವಿಜಹಿತ್ವಾ ಮಣಿಕ್ಖನ್ಧವಣ್ಣಂ ಮಾಪೇತ್ವಾ ವಕ್ಕಲನ್ತರಂ ಪಾವಿಸಿ। ಸುಪಣ್ಣೋ ಅನುಬನ್ಧಮಾನೋ ತಂ ತತ್ಥ ಪವಿಟ್ಠಂ ದಿಸ್ವಾ ವಕ್ಕಲೇ ಗರುಭಾವೇನ ಅಗ್ಗಹೇತ್ವಾ ಬೋಧಿಸತ್ತಂ ಆಮನ್ತೇತ್ವಾ ‘‘ಭನ್ತೇ, ಅಹಂ ಛಾತೋ, ತುಮ್ಹಾಕಂ ವಕ್ಕಲಂ ಗಣ್ಹಥ, ಇಮಂ ನಾಗಂ ಖಾದಿಸ್ಸಾಮೀ’’ತಿ ಇಮಮತ್ಥಂ ಪಕಾಸೇತುಂ ಪಠಮಂ ಗಾಥಮಾಹ –
Atīte bārāṇasiyaṃ brahmadatte rajjaṃ kārente bārāṇasiyaṃ ussave ghosite mahāsamajjaṃ ahosi. Bahū manussā ceva devanāgasupaṇṇādayo ca samajjadassanatthaṃ sannipatiṃsu. Tatrekasmiṃ ṭhāne eko nāgo ca supaṇṇo ca samajjaṃ passamānā ekato aṭṭhaṃsu. Nāgo supaṇṇassa supaṇṇabhāvaṃ ajānanto aṃse hatthaṃ ṭhapesi. Supaṇṇo ‘‘kena me aṃse hattho ṭhapito’’ti nivattitvā olokento nāgaṃ sañjāni. Nāgopi olokento supaṇṇaṃ sañjānitvā maraṇabhayatajjito nagarā nikkhamitvā nadīpiṭṭhena palāyi. Supaṇṇopi ‘‘taṃ gahessāmī’’ti anubandhi. Tasmiṃ samaye bodhisatto tāpaso hutvā tassā nadiyā tīre paṇṇasālāya vasamāno divā darathapaṭippassambhanatthaṃ udakasāṭikaṃ nivāsetvā vakkalaṃ bahi ṭhapetvā nadiṃ otaritvā nhāyati. Nāgo ‘‘imaṃ pabbajitaṃ nissāya jīvitaṃ labhissāmī’’ti pakativaṇṇaṃ vijahitvā maṇikkhandhavaṇṇaṃ māpetvā vakkalantaraṃ pāvisi. Supaṇṇo anubandhamāno taṃ tattha paviṭṭhaṃ disvā vakkale garubhāvena aggahetvā bodhisattaṃ āmantetvā ‘‘bhante, ahaṃ chāto, tumhākaṃ vakkalaṃ gaṇhatha, imaṃ nāgaṃ khādissāmī’’ti imamatthaṃ pakāsetuṃ paṭhamaṃ gāthamāha –
೭.
7.
‘‘ಇಧೂರಗಾನಂ ಪವರೋ ಪವಿಟ್ಠೋ, ಸೇಲಸ್ಸ ವಣ್ಣೇನ ಪಮೋಕ್ಖಮಿಚ್ಛಂ।
‘‘Idhūragānaṃ pavaro paviṭṭho, selassa vaṇṇena pamokkhamicchaṃ;
ಬ್ರಹ್ಮಞ್ಚ ವಣ್ಣಂ ಅಪಚಾಯಮಾನೋ, ಬುಭುಕ್ಖಿತೋ ನೋ ವಿತರಾಮಿ ಭೋತ್ತು’’ನ್ತಿ॥
Brahmañca vaṇṇaṃ apacāyamāno, bubhukkhito no vitarāmi bhottu’’nti.
ತತ್ಥ ಇಧೂರಗಾನಂ ಪವರೋ ಪವಿಟ್ಠೋತಿ ಇಮಸ್ಮಿಂ ವಕ್ಕಲೇ ಉರಗಾನಂ ಪವರೋ ನಾಗರಾಜಾ ಪವಿಟ್ಠೋ। ಸೇಲಸ್ಸ ವಣ್ಣೇನಾತಿ ಮಣಿವಣ್ಣೇನ, ಮಣಿಕ್ಖನ್ಧೋ ಹುತ್ವಾ ಪವಿಟ್ಠೋತಿ ಅತ್ಥೋ। ಪಮೋಕ್ಖಮಿಚ್ಛನ್ತಿ ಮಮ ಸನ್ತಿಕಾ ಮೋಕ್ಖಂ ಇಚ್ಛಮಾನೋ। ಬ್ರಹ್ಮಞ್ಚ ವಣ್ಣಂ ಅಪಚಾಯಮಾನೋತಿ ಅಹಂ ಪನ ತುಮ್ಹಾಕಂ ಬ್ರಹ್ಮವಣ್ಣಂ ಸೇಟ್ಠವಣ್ಣಂ ಪೂಜೇನ್ತೋ ಗರುಂ ಕರೋನ್ತೋ। ಬುಭುಕ್ಖಿತೋ ನೋ ವಿತರಾಮಿ ಭೋತ್ತುನ್ತಿ ಏತಂ ನಾಗಂ ವಕ್ಕಲನ್ತರಂ ಪವಿಟ್ಠಂ ಛಾತೋಪಿ ಸಮಾನೋ ಭಕ್ಖಿತುಂ ನ ಸಕ್ಕೋಮೀತಿ।
Tattha idhūragānaṃ pavaro paviṭṭhoti imasmiṃ vakkale uragānaṃ pavaro nāgarājā paviṭṭho. Selassa vaṇṇenāti maṇivaṇṇena, maṇikkhandho hutvā paviṭṭhoti attho. Pamokkhamicchanti mama santikā mokkhaṃ icchamāno. Brahmañca vaṇṇaṃ apacāyamānoti ahaṃ pana tumhākaṃ brahmavaṇṇaṃ seṭṭhavaṇṇaṃ pūjento garuṃ karonto. Bubhukkhito no vitarāmi bhottunti etaṃ nāgaṃ vakkalantaraṃ paviṭṭhaṃ chātopi samāno bhakkhituṃ na sakkomīti.
ಬೋಧಿಸತ್ತೋ ಉದಕೇ ಠಿತೋಯೇವ ಸುಪಣ್ಣರಾಜಸ್ಸ ಥುತಿಂ ಕತ್ವಾ ದುತಿಯಂ ಗಾಥಮಾಹ –
Bodhisatto udake ṭhitoyeva supaṇṇarājassa thutiṃ katvā dutiyaṃ gāthamāha –
೮.
8.
‘‘ಸೋ ಬ್ರಹ್ಮಗುತ್ತೋ ಚಿರಮೇವ ಜೀವ, ದಿಬ್ಯಾ ಚ ತೇ ಪಾತುಭವನ್ತು ಭಕ್ಖಾ।
‘‘So brahmagutto cirameva jīva, dibyā ca te pātubhavantu bhakkhā;
ಯೋ ಬ್ರಹ್ಮವಣ್ಣಂ ಅಪಚಾಯಮಾನೋ, ಬುಭುಕ್ಖಿತೋ ನೋ ವಿತರಾಸಿ ಭೋತ್ತು’’ನ್ತಿ॥
Yo brahmavaṇṇaṃ apacāyamāno, bubhukkhito no vitarāsi bhottu’’nti.
ತತ್ಥ ಸೋ ಬ್ರಹ್ಮಗುತ್ತೋತಿ ಸೋ ತ್ವಂ ಬ್ರಹ್ಮಗೋಪಿತೋ ಬ್ರಹ್ಮರಕ್ಖಿತೋ ಹುತ್ವಾ। ದಿಬ್ಯಾ ಚ ತೇ ಪಾತುಭವನ್ತು ಭಕ್ಖಾತಿ ದೇವತಾನಂ ಪರಿಭೋಗಾರಹಾ ಭಕ್ಖಾ ಚ ತವ ಪಾತುಭವನ್ತು, ಮಾ ಪಾಣಾತಿಪಾತಂ ಕತ್ವಾ ನಾಗಮಂಸಖಾದಕೋ ಅಹೋಸಿ।
Tattha so brahmaguttoti so tvaṃ brahmagopito brahmarakkhito hutvā. Dibyā ca te pātubhavantu bhakkhāti devatānaṃ paribhogārahā bhakkhā ca tava pātubhavantu, mā pāṇātipātaṃ katvā nāgamaṃsakhādako ahosi.
ಇತಿ ಬೋಧಿಸತ್ತೋ ಉದಕೇ ಠಿತೋವ ಅನುಮೋದನಂ ಕತ್ವಾ ಉತ್ತರಿತ್ವಾ ವಕ್ಕಲಂ ನಿವಾಸೇತ್ವಾ ತೇ ಉಭೋಪಿ ಗಹೇತ್ವಾ ಅಸ್ಸಮಪದಂ ಗನ್ತ್ವಾ ಮೇತ್ತಾಭಾವನಾಯ ವಣ್ಣಂ ಕಥೇತ್ವಾ ದ್ವೇಪಿ ಜನೇ ಸಮಗ್ಗೇ ಅಕಾಸಿ। ತೇ ತತೋ ಪಟ್ಠಾಯ ಸಮಗ್ಗಾ ಸಮ್ಮೋದಮಾನಾ ಸುಖಂ ವಸಿಂಸು।
Iti bodhisatto udake ṭhitova anumodanaṃ katvā uttaritvā vakkalaṃ nivāsetvā te ubhopi gahetvā assamapadaṃ gantvā mettābhāvanāya vaṇṇaṃ kathetvā dvepi jane samagge akāsi. Te tato paṭṭhāya samaggā sammodamānā sukhaṃ vasiṃsu.
ಸತ್ಥಾ ಇಮಂ ಧಮ್ಮದೇಸನಂ ಆಹರಿತ್ವಾ ಜಾತಕಂ ಸಮೋಧಾನೇಸಿ – ‘‘ತದಾ ನಾಗೋ ಚ ಸುಪಣ್ಣೋ ಚ ಇಮೇ ದ್ವೇ ಮಹಾಮತ್ತಾ ಅಹೇಸುಂ, ತಾಪಸೋ ಪನ ಅಹಮೇವ ಅಹೋಸಿ’’ನ್ತಿ।
Satthā imaṃ dhammadesanaṃ āharitvā jātakaṃ samodhānesi – ‘‘tadā nāgo ca supaṇṇo ca ime dve mahāmattā ahesuṃ, tāpaso pana ahameva ahosi’’nti.
ಉರಗಜಾತಕವಣ್ಣನಾ ಚತುತ್ಥಾ।
Uragajātakavaṇṇanā catutthā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಜಾತಕಪಾಳಿ • Jātakapāḷi / ೧೫೪. ಉರಗಜಾತಕ • 154. Uragajātaka
