| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၇၇. ဥပောသထဘေဒာဒိ
77. Uposathabhedādi
၁၄၉. အထ ခော ဘိက္ခူနံ ဧတဒဟောသိ – ‘‘ကတိ နု ခော ဥပောသထာ’’တိ? ဘဂဝတော ဧတမတ္ထံ အာရောစေသုံ။ ဒ္ဝေမေ, ဘိက္ခဝေ, ဥပောသထာ – စာတုဒ္ဒသိကော စ ပန္နရသိကော စ။ ဣမေ ခော, ဘိက္ခဝေ, ဒ္ဝေ ဥပောသထာတိ။
149. Atha kho bhikkhūnaṃ etadahosi – ‘‘kati nu kho uposathā’’ti? Bhagavato etamatthaṃ ārocesuṃ. Dveme, bhikkhave, uposathā – cātuddasiko ca pannarasiko ca. Ime kho, bhikkhave, dve uposathāti.
အထ ခော ဘိက္ခူနံ ဧတဒဟောသိ – ‘‘ကတိ နု ခော ဥပောသထကမ္မာနီ’’တိ? ဘဂဝတော ဧတမတ္ထံ အာရောစေသုံ။ စတ္တာရိမာနိ, ဘိက္ခဝေ, ဥပောသထကမ္မာနိ – အဓမ္မေန ဝဂ္ဂံ ဥပောသထကမ္မံ, အဓမ္မေန သမဂ္ဂံ ဥပောသထကမ္မံ, ဓမ္မေန ဝဂ္ဂံ ဥပောသထကမ္မံ, ဓမ္မေန သမဂ္ဂံ ဥပောသထကမ္မန္တိ။ တတ္ရ, ဘိက္ခဝေ, ယဒိဒံ အဓမ္မေန ဝဂ္ဂံ ဥပောသထကမ္မံ, န, ဘိက္ခဝေ, ဧဝရူပံ ဥပောသထကမ္မံ, ကာတဗ္ဗံ။ န စ မယာ ဧဝရူပံ ဥပောသထကမ္မံ အနုညာတံ။ တတ္ရ, ဘိက္ခဝေ, ယဒိဒံ အဓမ္မေန သမဂ္ဂံ ဥပောသထကမ္မံ, န, ဘိက္ခဝေ, ဧဝရူပံ ဥပောသထကမ္မံ ကာတဗ္ဗံ။ န စ မယာ ဧဝရူပံ ဥပောသထကမ္မံ အနုညာတံ။ တတ္ရ, ဘိက္ခဝေ, ယဒိဒံ ဓမ္မေန ဝဂ္ဂံ ဥပောသထကမ္မံ, န, ဘိက္ခဝေ, ဧဝရူပံ ဥပောသထကမ္မံ ကာတဗ္ဗံ။ န စ မယာ ဧဝရူပံ ဥပောသထကမ္မံ အနုညာတံ။ တတ္ရ, ဘိက္ခဝေ, ယဒိဒံ ဓမ္မေန သမဂ္ဂံ ဥပောသထကမ္မံ, ဧဝရူပံ, ဘိက္ခဝေ, ဥပောသထကမ္မံ ကာတဗ္ဗံ, ဧဝရူပဉ္စ မယာ ဥပောသထကမ္မံ အနုညာတံ။ တသ္မာတိဟ, ဘိက္ခဝေ, ဧဝရူပံ ဥပောသထကမ္မံ ကရိသ္သာမ ယဒိဒံ ဓမ္မေန သမဂ္ဂန္တိ – ဧဝဉ္ဟိ ဝော, ဘိက္ခဝေ, သိက္ခိတဗ္ဗန္တိ။
Atha kho bhikkhūnaṃ etadahosi – ‘‘kati nu kho uposathakammānī’’ti? Bhagavato etamatthaṃ ārocesuṃ. Cattārimāni, bhikkhave, uposathakammāni – adhammena vaggaṃ uposathakammaṃ, adhammena samaggaṃ uposathakammaṃ, dhammena vaggaṃ uposathakammaṃ, dhammena samaggaṃ uposathakammanti. Tatra, bhikkhave, yadidaṃ adhammena vaggaṃ uposathakammaṃ, na, bhikkhave, evarūpaṃ uposathakammaṃ, kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ adhammena samaggaṃ uposathakammaṃ, na, bhikkhave, evarūpaṃ uposathakammaṃ kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ dhammena vaggaṃ uposathakammaṃ, na, bhikkhave, evarūpaṃ uposathakammaṃ kātabbaṃ. Na ca mayā evarūpaṃ uposathakammaṃ anuññātaṃ. Tatra, bhikkhave, yadidaṃ dhammena samaggaṃ uposathakammaṃ, evarūpaṃ, bhikkhave, uposathakammaṃ kātabbaṃ, evarūpañca mayā uposathakammaṃ anuññātaṃ. Tasmātiha, bhikkhave, evarūpaṃ uposathakammaṃ karissāma yadidaṃ dhammena samagganti – evañhi vo, bhikkhave, sikkhitabbanti.
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ဥပောသထဘေဒာဒိကထာ • Uposathabhedādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဥပောသထဘေဒာဒိကထာဝဏ္ဏနာ • Uposathabhedādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဥပောသထဘေဒာဒိကထာဝဏ္ဏနာ • Uposathabhedādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဥပောသထဘေဒာဒိကထာဝဏ္ဏနာ • Uposathabhedādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၇၇. ဥပောသထဘေဒာဒိကထာ • 77. Uposathabhedādikathā
