| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. உபவானத்தே²ரஅபதா³னவண்ணனா
2. Upavānattheraapadānavaṇṇanā
பது³முத்தரோ நாம ஜினோதிஆதி³கங் ஆயஸ்மதோ உபவானத்தே²ரஸ்ஸ அபதா³னங். அயம்பாயஸ்மா புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே த³லித்³த³குலே நிப்³ப³த்தித்வா விஞ்ஞுதங் பத்தோ ப⁴க³வதி பரினிப்³பு³தே தஸ்ஸ தா⁴துங் க³ஹெத்வா மனுஸ்ஸதே³வனாக³க³ருளகும்ப⁴ண்ட³யக்க²க³ந்த⁴ப்³பே³ஹி ஸத்தரதனமயே ஸத்தயோஜனிகே தூ²பே கதே தத்த² ஸுதோ⁴தங் அத்தனோ உத்தரஸாடகங் வேளக்³கே³ லக்³கெ³த்வா ஆப³ந்தி⁴த்வா த⁴ஜங் கத்வா பூஜங் அகாஸி. தங் க³ஹெத்வா அபி⁴ஸம்மதகோ நாம யக்க²ஸேனாபதி தே³வேஹி சேதியபூஜாரக்க²ணத்த²ங் ட²பிதோ அதி³ஸ்ஸமானகாயோ தங் ஆகாஸே தா⁴ரெந்தோ சேதியங் திக்க²த்துங் பத³க்கி²ணங் அகாஸி. ஸோ தங் தி³ஸ்வா பி⁴ய்யோஸோமத்தாய பஸன்னமானஸோ ஹுத்வா தேன புஞ்ஞகம்மேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யங் ப்³ராஹ்மணகுலே நிப்³ப³த்தித்வா உபவானோதி லத்³த⁴னாமோ வயப்பத்தோ ஜேதவனபடிக்³க³ஹணே பு³த்³தா⁴னுபா⁴வங் தி³ஸ்வா படிலத்³த⁴ஸத்³தோ⁴ பப்³ப³ஜித்வா விபஸ்ஸனாய கம்மங் கரொந்தோ அரஹத்தங் பத்வா ச²ளபி⁴ஞ்ஞோ அஹோஸி. யதா³ ப⁴க³வதோ அபா²ஸு அஹோஸி, ததா³ தே²ரோ உண்ஹோத³கங் ததா²ரூபங் பானகஞ்ச பே⁴ஸஜ்ஜங் ப⁴க³வதோ உபனாமேஸி. தேனஸ்ஸ ஸத்து²னோ ரோகோ³ வூபஸமி. தஸ்ஸ ப⁴க³வா அனுமோத³னங் அகாஸி.
Padumuttaronāma jinotiādikaṃ āyasmato upavānattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle daliddakule nibbattitvā viññutaṃ patto bhagavati parinibbute tassa dhātuṃ gahetvā manussadevanāgagaruḷakumbhaṇḍayakkhagandhabbehi sattaratanamaye sattayojanike thūpe kate tattha sudhotaṃ attano uttarasāṭakaṃ veḷagge laggetvā ābandhitvā dhajaṃ katvā pūjaṃ akāsi. Taṃ gahetvā abhisammatako nāma yakkhasenāpati devehi cetiyapūjārakkhaṇatthaṃ ṭhapito adissamānakāyo taṃ ākāse dhārento cetiyaṃ tikkhattuṃ padakkhiṇaṃ akāsi. So taṃ disvā bhiyyosomattāya pasannamānaso hutvā tena puññakammena devamanussesu saṃsaranto imasmiṃ buddhuppāde sāvatthiyaṃ brāhmaṇakule nibbattitvā upavānoti laddhanāmo vayappatto jetavanapaṭiggahaṇe buddhānubhāvaṃ disvā paṭiladdhasaddho pabbajitvā vipassanāya kammaṃ karonto arahattaṃ patvā chaḷabhiñño ahosi. Yadā bhagavato aphāsu ahosi, tadā thero uṇhodakaṃ tathārūpaṃ pānakañca bhesajjaṃ bhagavato upanāmesi. Tenassa satthuno rogo vūpasami. Tassa bhagavā anumodanaṃ akāsi.
52. ஏவங் ஸோ பத்தஅரஹத்தப²லோ அதி⁴க³தஏதத³க்³க³ட்டா²னோ அத்தனோ புப்³ப³கம்மங் ஸரித்வா ஸோமனஸ்ஸவஸேன புப்³ப³சரிதாபதா³னங் பகாஸெந்தோ பது³முத்தரோ நாம ஜினோதிஆதி³மாஹ. தத்த² ஸப்³பே³ஸங் லோகியலோகுத்தரத⁴ம்மானங் பாரகூ³ பரியோஸானங் நிப்³பா³னங் க³தோ பத்தோ பது³முத்தரோ நாம ஜினோ ஜிதபஞ்சமாரோ ப⁴க³வா அக்³கி³க்க²ந்தோ⁴ இவ ச²ப்³ப³ண்ணா பு³த்³த⁴ரங்ஸியோ ஜலித்வா ஸப்³ப³லோகங் த⁴ம்மபஜ்ஜோதேன ஓபா⁴ஸெத்வா ஸம்பு³த்³தோ⁴ ஸுட்டு² பு³த்³தோ⁴ அவிஜ்ஜானித்³தூ³பக³தாய பஜாய ஸவாஸனாய கிலேஸனித்³தா³ய படிபு³த்³தோ⁴ விகஸிதனெத்தபங்கஜோ பரினிப்³பு³தோ க²ந்த⁴பரினிப்³பா³னேன நிப்³பு³தோ அத³ஸ்ஸனங் க³தோதி ஸம்ப³ந்தோ⁴.
52. Evaṃ so pattaarahattaphalo adhigataetadaggaṭṭhāno attano pubbakammaṃ saritvā somanassavasena pubbacaritāpadānaṃ pakāsento padumuttaro nāma jinotiādimāha. Tattha sabbesaṃ lokiyalokuttaradhammānaṃ pāragū pariyosānaṃ nibbānaṃ gato patto padumuttaro nāma jino jitapañcamāro bhagavā aggikkhandho iva chabbaṇṇā buddharaṃsiyo jalitvā sabbalokaṃ dhammapajjotena obhāsetvā sambuddho suṭṭhu buddho avijjāniddūpagatāya pajāya savāsanāya kilesaniddāya paṭibuddho vikasitanettapaṅkajo parinibbuto khandhaparinibbānena nibbuto adassanaṃ gatoti sambandho.
57. ஜங்கா⁴தி சேதியகரணகாலே உபசினிதப்³பா³னங் இட்ட²கானங் ட²பனத்தா²ய, நிப³ந்தி⁴யமானஸோபானபந்தி.
57.Jaṅghāti cetiyakaraṇakāle upacinitabbānaṃ iṭṭhakānaṃ ṭhapanatthāya, nibandhiyamānasopānapanti.
88. ஸுதோ⁴தங் ரஜகேனாஹந்தி வத்த²தோ⁴வகேன புரிஸேன ஸுட்டு² தோ⁴விதங் ஸுவிஸுத்³த⁴கதங், உத்தரெய்யபடங் மம உத்தரஸாடகங் அஹங் வேளக்³கே³ லக்³கி³த்வா த⁴ஜங் கத்வா உக்கி²பிங், அம்ப³ரே ஆகாஸே உஸ்ஸாபேஸிந்தி அத்தோ². ஸேஸங் ஸுவிஞ்ஞெய்யமேவாதி.
88.Sudhotaṃrajakenāhanti vatthadhovakena purisena suṭṭhu dhovitaṃ suvisuddhakataṃ, uttareyyapaṭaṃ mama uttarasāṭakaṃ ahaṃ veḷagge laggitvā dhajaṃ katvā ukkhipiṃ, ambare ākāse ussāpesinti attho. Sesaṃ suviññeyyamevāti.
உபவானத்தே²ரஅபதா³னவண்ணனா ஸமத்தா.
Upavānattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. உபவானத்தே²ரஅபதா³னங் • 2. Upavānattheraapadānaṃ
