| Library / Tipiṭaka / তিপিটক • Tipiṭaka / চূল়নিদ্দেসপাল়ি • Cūḷaniddesapāḷi |
৬. উপসীৰমাণৰপুচ্ছা
6. Upasīvamāṇavapucchā
৯৪.
94.
‘‘একো অহং সক্ক মহন্তমোঘং, [ইচ্চাযস্মা উপসীৰো]
‘‘Eko ahaṃ sakka mahantamoghaṃ, [iccāyasmā upasīvo]
অনিস্সিতো নো ৰিসহামি তারিতুং।
Anissito no visahāmi tārituṃ;
আরম্মণং ব্রূহি সমন্তচক্খু, যং নিস্সিতো ওঘমিমং তরেয্যং’’॥
Ārammaṇaṃ brūhi samantacakkhu, yaṃ nissito oghamimaṃ tareyyaṃ’’.
৯৫.
95.
‘‘আকিঞ্চঞ্ঞং পেক্খমানো সতিমা, [উপসীৰাতি ভগৰা]
‘‘Ākiñcaññaṃ pekkhamāno satimā, [upasīvāti bhagavā]
নত্থীতি নিস্সায তরস্সু ওঘং।
Natthīti nissāya tarassu oghaṃ;
কামে পহায ৰিরতো কথাহি, তণ্হক্খযং নত্তমহাভিপস্স’’॥
Kāme pahāya virato kathāhi, taṇhakkhayaṃ nattamahābhipassa’’.
৯৬.
96.
‘‘সব্বেসু কামেসু যো ৰীতরাগো, [ইচ্চাযস্মা উপসীৰো]
‘‘Sabbesu kāmesu yo vītarāgo, [iccāyasmā upasīvo]
আকিঞ্চঞ্ঞং নিস্সিতো হিত্ৰা মঞ্ঞং।
Ākiñcaññaṃ nissito hitvā maññaṃ;
৯৭.
97.
‘‘সব্বেসু কামেসু যো ৰীতরাগো, [উপসীৰাতি ভগৰা]
‘‘Sabbesu kāmesu yo vītarāgo, [upasīvāti bhagavā]
আকিঞ্চঞ্ঞং নিস্সিতো হিত্ৰা মঞ্ঞং।
Ākiñcaññaṃ nissito hitvā maññaṃ;
সঞ্ঞাৰিমোক্খে পরমে ৰিমুত্তো, তিট্ঠেয্য সো তত্থ অনানুযাযী’’॥
Saññāvimokkhe parame vimutto, tiṭṭheyya so tattha anānuyāyī’’.
৯৮.
98.
‘‘তিট্ঠে চে সো তত্থ অনানুযাযী, পূগম্পি ৰস্সানং সমন্তচক্খু।
‘‘Tiṭṭhe ce so tattha anānuyāyī, pūgampi vassānaṃ samantacakkhu;
তত্থেৰ সো সীতিসিযা ৰিমুত্তো, চৰেথ ৰিঞ্ঞাণং তথাৰিধস্স’’॥
Tattheva so sītisiyā vimutto, cavetha viññāṇaṃ tathāvidhassa’’.
৯৯.
99.
‘‘অচ্চি যথা ৰাতৰেগেন খিত্তা, [উপসীৰাতি ভগৰা]
‘‘Acci yathā vātavegena khittā, [upasīvāti bhagavā]
অত্থং পলেতি ন উপেতি সঙ্খং।
Atthaṃ paleti na upeti saṅkhaṃ;
এৰং মুনী নামকাযা ৰিমুত্তো, অত্থং পলেতি ন উপেতি সঙ্খং’’॥
Evaṃ munī nāmakāyā vimutto, atthaṃ paleti na upeti saṅkhaṃ’’.
১০০.
100.
‘‘অত্থঙ্গতো সো উদ ৰা সো নত্থি, উদাহু ৰে সস্সতিযা অরোগো।
‘‘Atthaṅgato so uda vā so natthi, udāhu ve sassatiyā arogo;
তং মে মুনী সাধু ৰিযাকরোহি, তথা হি তে ৰিদিতো এস ধম্মো’’॥
Taṃ me munī sādhu viyākarohi, tathā hi te vidito esa dhammo’’.
১০১.
101.
‘‘অত্থঙ্গতস্স ন পমাণমত্থি, [উপসীৰাতি ভগৰা]
‘‘Atthaṅgatassa na pamāṇamatthi, [upasīvāti bhagavā]
যেন নং ৰজ্জুং তং তস্স নত্থি।
Yena naṃ vajjuṃ taṃ tassa natthi;
সব্বেসু ধম্মেসু সমূহতেসু, সমূহতা ৰাদপথাপি সব্বে’’তি॥
Sabbesu dhammesu samūhatesu, samūhatā vādapathāpi sabbe’’ti.
উপসীৰমাণৰপুচ্ছা ছট্ঠী।
Upasīvamāṇavapucchā chaṭṭhī.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / চূল়নিদ্দেস-অট্ঠকথা • Cūḷaniddesa-aṭṭhakathā / ৬. উপসীৰমাণৰসুত্তনিদ্দেসৰণ্ণনা • 6. Upasīvamāṇavasuttaniddesavaṇṇanā
