| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
५. उपपरिक्खसुत्तं
5. Upaparikkhasuttaṃ
९४. वुत्तञ्हेतं भगवता, वुत्तमरहताति मे सुतं –
94. Vuttañhetaṃ bhagavatā, vuttamarahatāti me sutaṃ –
‘‘तथा तथा, भिक्खवे, भिक्खु उपपरिक्खेय्य यथा यथास्स 1 उपपरिक्खतो बहिद्धा चस्स विञ्ञाणं अविक्खित्तं अविसटं अज्झत्तं असण्ठितं अनुपादाय न परितस्सेय्य। बहिद्धा, भिक्खवे, विञ्ञाणे अविक्खित्ते अविसटे सति अज्झत्तं असण्ठिते अनुपादाय अपरितस्सतो आयतिं जातिजरामरणदुक्खसमुदयसम्भवो न होती’’ति। एतमत्थं भगवा अवोच। तत्थेतं इति वुच्चति –
‘‘Tathā tathā, bhikkhave, bhikkhu upaparikkheyya yathā yathāssa 2 upaparikkhato bahiddhā cassa viññāṇaṃ avikkhittaṃ avisaṭaṃ ajjhattaṃ asaṇṭhitaṃ anupādāya na paritasseyya. Bahiddhā, bhikkhave, viññāṇe avikkhitte avisaṭe sati ajjhattaṃ asaṇṭhite anupādāya aparitassato āyatiṃ jātijarāmaraṇadukkhasamudayasambhavo na hotī’’ti. Etamatthaṃ bhagavā avoca. Tatthetaṃ iti vuccati –
‘‘सत्तसङ्गप्पहीनस्स, नेत्तिच्छिन्नस्स भिक्खुनो।
‘‘Sattasaṅgappahīnassa, netticchinnassa bhikkhuno;
विक्खीणो जातिसंसारो, नत्थि तस्स पुनब्भवो’’ति॥
Vikkhīṇo jātisaṃsāro, natthi tassa punabbhavo’’ti.
अयम्पि अत्थो वुत्तो भगवता, इति मे सुतन्ति। पञ्चमं।
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ५. उपपरिक्खसुत्तवण्णना • 5. Upaparikkhasuttavaṇṇanā
