| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
६. कामूपपत्तिसुत्तं
6. Kāmūpapattisuttaṃ
९५. वुत्तञ्हेतं भगवता, वुत्तमरहताति मे सुतं –
95. Vuttañhetaṃ bhagavatā, vuttamarahatāti me sutaṃ –
‘‘तिस्सो इमा, भिक्खवे, कामूपपत्तियो 1। कतमा तिस्सो? पच्चुपट्ठितकामा, निम्मानरतिनो , परनिम्मितवसवत्तिनो – इमा खो, भिक्खवे, तिस्सो कामूपपत्तियो’’ति। एतमत्थं भगवा अवोच। तत्थेतं इति वुच्चति –
‘‘Tisso imā, bhikkhave, kāmūpapattiyo 2. Katamā tisso? Paccupaṭṭhitakāmā, nimmānaratino , paranimmitavasavattino – imā kho, bhikkhave, tisso kāmūpapattiyo’’ti. Etamatthaṃ bhagavā avoca. Tatthetaṃ iti vuccati –
‘‘पच्चुपट्ठितकामा च, ये देवा वसवत्तिनो।
‘‘Paccupaṭṭhitakāmā ca, ye devā vasavattino;
निम्मानरतिनो देवा, ये चञ्ञे कामभोगिनो।
Nimmānaratino devā, ye caññe kāmabhogino;
इत्थभावञ्ञथाभावं , संसारं नातिवत्तरे॥
Itthabhāvaññathābhāvaṃ , saṃsāraṃ nātivattare.
‘‘एतमादीनवं ञत्वा, कामभोगेसु पण्डितो।
‘‘Etamādīnavaṃ ñatvā, kāmabhogesu paṇḍito;
सब्बे परिच्चजे कामे, ये दिब्बा ये च मानुसा॥
Sabbe pariccaje kāme, ye dibbā ye ca mānusā.
‘‘पियरूपसातगधितं , छेत्वा सोतं दुरच्चयं।
‘‘Piyarūpasātagadhitaṃ , chetvā sotaṃ duraccayaṃ;
असेसं परिनिब्बन्ति, असेसं दुक्खमच्चगुं॥
Asesaṃ parinibbanti, asesaṃ dukkhamaccaguṃ.
‘‘अरियद्दसा वेदगुनो, सम्मदञ्ञाय पण्डिता।
‘‘Ariyaddasā vedaguno, sammadaññāya paṇḍitā;
जातिक्खयमभिञ्ञाय, नागच्छन्ति पुनब्भव’’न्ति॥
Jātikkhayamabhiññāya, nāgacchanti punabbhava’’nti.
अयम्पि अत्थो वुत्तो भगवता, इति मे सुतन्ति। छट्ठं।
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ६. कामूपपत्तिसुत्तवण्णना • 6. Kāmūpapattisuttavaṇṇanā
