| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
७. कामयोगसुत्तं
7. Kāmayogasuttaṃ
९६. वुत्तञ्हेतं भगवता, वुत्तमरहताति मे सुतं –
96. Vuttañhetaṃ bhagavatā, vuttamarahatāti me sutaṃ –
‘‘कामयोगयुत्तो, भिक्खवे, भवयोगयुत्तो आगामी होति आगन्ता 1 इत्थत्तं। कामयोगविसंयुत्तो, भिक्खवे, भवयोगयुत्तो अनागामी होति अनागन्ता इत्थत्तं। कामयोगविसंयुत्तो, भिक्खवे, भवयोगविसंयुत्तो अरहा होति, खीणासवो’’ति। एतमत्थं भगवा अवोच। तत्थेतं इति वुच्चति –
‘‘Kāmayogayutto, bhikkhave, bhavayogayutto āgāmī hoti āgantā 2 itthattaṃ. Kāmayogavisaṃyutto, bhikkhave, bhavayogayutto anāgāmī hoti anāgantā itthattaṃ. Kāmayogavisaṃyutto, bhikkhave, bhavayogavisaṃyutto arahā hoti, khīṇāsavo’’ti. Etamatthaṃ bhagavā avoca. Tatthetaṃ iti vuccati –
‘‘कामयोगेन संयुत्ता, भवयोगेन चूभयं।
‘‘Kāmayogena saṃyuttā, bhavayogena cūbhayaṃ;
सत्ता गच्छन्ति संसारं, जातिमरणगामिनो॥
Sattā gacchanti saṃsāraṃ, jātimaraṇagāmino.
‘‘ये च कामे पहन्त्वान, अप्पत्ता आसवक्खयं।
‘‘Ye ca kāme pahantvāna, appattā āsavakkhayaṃ;
भवयोगेन संयुत्ता, अनागामीति वुच्चरे॥
Bhavayogena saṃyuttā, anāgāmīti vuccare.
‘‘ये च खो छिन्नसंसया, खीणमानपुनब्भवा।
‘‘Ye ca kho chinnasaṃsayā, khīṇamānapunabbhavā;
ते वे पारङ्गता लोके, ये पत्ता आसवक्खय’’न्ति॥
Te ve pāraṅgatā loke, ye pattā āsavakkhaya’’nti.
अयम्पि अत्थो वुत्तो भगवता, इति मे सुतन्ति। सत्तमं।
Ayampi attho vutto bhagavatā, iti me sutanti. Sattamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ७. कामयोगसुत्तवण्णना • 7. Kāmayogasuttavaṇṇanā
