| Library / Tipiṭaka / ติปิฎก • Tipiṭaka / เถรีคาถาปาฬิ • Therīgāthāpāḷi |
๓. อุปจาลาเถรีคาถา
3. Upacālātherīgāthā
๑๘๙.
189.
‘‘สติมตี จกฺขุมตี, ภิกฺขุนี ภาวิตินฺทฺริยา;
‘‘Satimatī cakkhumatī, bhikkhunī bhāvitindriyā;
ปฎิวิชฺฌิํ ปทํ สนฺตํ, อกาปุริสเสวิตํ’’ฯ
Paṭivijjhiṃ padaṃ santaṃ, akāpurisasevitaṃ’’.
๑๙๐.
190.
‘‘กิํ นุ ชาติํ น โรเจสิ, ชาโต กามานิ ภุญฺชติ;
‘‘Kiṃ nu jātiṃ na rocesi, jāto kāmāni bhuñjati;
ภุญฺชาหิ กามรติโย, มาหุ ปจฺฉานุตาปินี’’ฯ
Bhuñjāhi kāmaratiyo, māhu pacchānutāpinī’’.
๑๙๑.
191.
‘‘ชาตสฺส มรณํ โหติ, หตฺถปาทาน เฉทนํ;
‘‘Jātassa maraṇaṃ hoti, hatthapādāna chedanaṃ;
วธพนฺธปริเกฺลสํ, ชาโต ทุกฺขํ นิคจฺฉติฯ
Vadhabandhapariklesaṃ, jāto dukkhaṃ nigacchati.
๑๙๒.
192.
‘‘อตฺถิ สกฺยกุเล ชาโต, สมฺพุโทฺธ อปราชิโต;
‘‘Atthi sakyakule jāto, sambuddho aparājito;
โส เม ธมฺมมเทเสสิ, ชาติยา สมติกฺกมํฯ
So me dhammamadesesi, jātiyā samatikkamaṃ.
๑๙๓.
193.
‘‘ทุกฺขํ ทุกฺขสมุปฺปาทํ, ทุกฺขสฺส จ อติกฺกมํ;
‘‘Dukkhaṃ dukkhasamuppādaṃ, dukkhassa ca atikkamaṃ;
อริยํ จฎฺฐงฺคิกํ มคฺคํ, ทุกฺขูปสมคามินํฯ
Ariyaṃ caṭṭhaṅgikaṃ maggaṃ, dukkhūpasamagāminaṃ.
๑๙๔.
194.
‘‘ตสฺสาหํ วจนํ สุตฺวา, วิหริํ สาสเน รตา;
‘‘Tassāhaṃ vacanaṃ sutvā, vihariṃ sāsane ratā;
ติโสฺส วิชฺชา อนุปฺปตฺตา, กตํ พุทฺธสฺส สาสนํฯ
Tisso vijjā anuppattā, kataṃ buddhassa sāsanaṃ.
๑๙๕.
195.
‘‘สพฺพตฺถ วิหตา นนฺที, ตโมขโนฺธ ปทาลิโต;
‘‘Sabbattha vihatā nandī, tamokhandho padālito;
เอวํ ชานาหิ ปาปิม, นิหโต ตฺวมสิ อนฺตก’’ฯ
Evaṃ jānāhi pāpima, nihato tvamasi antaka’’.
… อุปจาลา เถรี…ฯ
… Upacālā therī….
สตฺตกนิปาโต นิฎฺฐิโตฯ
Sattakanipāto niṭṭhito.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรีคาถา-อฎฺฐกถา • Therīgāthā-aṭṭhakathā / ๓. อุปจาลาเถรีคาถาวณฺณนา • 3. Upacālātherīgāthāvaṇṇanā
