| Library / Tipiṭaka / ติปิฎก • Tipiṭaka / เถรีคาถาปาฬิ • Therīgāthāpāḷi |
๘. อฎฺฐกนิปาโต
8. Aṭṭhakanipāto
๑. สีสูปจาลาเถรีคาถา
1. Sīsūpacālātherīgāthā
๑๙๖.
196.
‘‘ภิกฺขุนี สีลสมฺปนฺนา, อินฺทฺริเยสุ สุสํวุตา;
‘‘Bhikkhunī sīlasampannā, indriyesu susaṃvutā;
อธิคเจฺฉ ปทํ สนฺตํ, อเสจนกโมชวํ’’ฯ
Adhigacche padaṃ santaṃ, asecanakamojavaṃ’’.
๑๙๗.
197.
‘‘ตาวติํสา จ ยามา จ, ตุสิตา จาปิ เทวตา;
‘‘Tāvatiṃsā ca yāmā ca, tusitā cāpi devatā;
นิมฺมานรติโน เทวา, เย เทวา วสวตฺติโน;
Nimmānaratino devā, ye devā vasavattino;
ตตฺถ จิตฺตํ ปณีเธหิ, ยตฺถ เต วุสิตํ ปุเร’’ฯ
Tattha cittaṃ paṇīdhehi, yattha te vusitaṃ pure’’.
๑๙๘.
198.
‘‘ตาวติํสา จ ยามา จ, ตุสิตา จาปิ เทวตา;
‘‘Tāvatiṃsā ca yāmā ca, tusitā cāpi devatā;
นิมฺมานรติโน เทวา, เย เทวา วสวตฺติโนฯ
Nimmānaratino devā, ye devā vasavattino.
๑๙๙.
199.
‘‘กาลํ กาลํ ภวาภวํ, สกฺกายสฺมิํ ปุรกฺขตา;
‘‘Kālaṃ kālaṃ bhavābhavaṃ, sakkāyasmiṃ purakkhatā;
อวีติวตฺตา สกฺกายํ, ชาติมรณสาริโนฯ
Avītivattā sakkāyaṃ, jātimaraṇasārino.
๒๐๐.
200.
‘‘สโพฺพ อาทีปิโต โลโก, สโพฺพ โลโก ปทีปิโต;
‘‘Sabbo ādīpito loko, sabbo loko padīpito;
สโพฺพ ปชฺชลิโต โลโก, สโพฺพ โลโก ปกมฺปิโตฯ
Sabbo pajjalito loko, sabbo loko pakampito.
๒๐๑.
201.
‘‘อกมฺปิยํ อตุลิยํ, อปุถุชฺชนเสวิตํ;
‘‘Akampiyaṃ atuliyaṃ, aputhujjanasevitaṃ;
พุโทฺธ ธมฺมมเทเสสิ, ตตฺถ เม นิรโต มโนฯ
Buddho dhammamadesesi, tattha me nirato mano.
๒๐๒.
202.
‘‘ตสฺสาหํ วจนํ สุตฺวา, วิหริํ สาสเน รตา;
‘‘Tassāhaṃ vacanaṃ sutvā, vihariṃ sāsane ratā;
ติโสฺส วิชฺชา อนุปฺปตฺตา, กตํ พุทฺธสฺส สาสนํฯ
Tisso vijjā anuppattā, kataṃ buddhassa sāsanaṃ.
๒๐๓.
203.
‘‘สพฺพตฺถ วิหตา นนฺที, ตโมขโนฺธ ปทาลิโต;
‘‘Sabbattha vihatā nandī, tamokhandho padālito;
เอวํ ชานาหิ ปาปิม, นิหโต ตฺวมสิ อนฺตก’’ฯ
Evaṃ jānāhi pāpima, nihato tvamasi antaka’’.
… สีสูปจาลา เถรี…ฯ
… Sīsūpacālā therī….
อฎฺฐกนิปาโต นิฎฺฐิโตฯ
Aṭṭhakanipāto niṭṭhito.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรีคาถา-อฎฺฐกถา • Therīgāthā-aṭṭhakathā / ๑. สีสูปจาลาเถรีคาถาวณฺณนา • 1. Sīsūpacālātherīgāthāvaṇṇanā
