| Library / Tipiṭaka / तिपिटक • Tipiṭaka / थेरीगाथापाळि • Therīgāthāpāḷi |
३. उपचालाथेरीगाथा
3. Upacālātherīgāthā
१८९.
189.
‘‘सतिमती चक्खुमती, भिक्खुनी भावितिन्द्रिया।
‘‘Satimatī cakkhumatī, bhikkhunī bhāvitindriyā;
पटिविज्झिं पदं सन्तं, अकापुरिससेवितं’’॥
Paṭivijjhiṃ padaṃ santaṃ, akāpurisasevitaṃ’’.
१९०.
190.
‘‘किं नु जातिं न रोचेसि, जातो कामानि भुञ्जति।
‘‘Kiṃ nu jātiṃ na rocesi, jāto kāmāni bhuñjati;
भुञ्जाहि कामरतियो, माहु पच्छानुतापिनी’’॥
Bhuñjāhi kāmaratiyo, māhu pacchānutāpinī’’.
१९१.
191.
‘‘जातस्स मरणं होति, हत्थपादान छेदनं।
‘‘Jātassa maraṇaṃ hoti, hatthapādāna chedanaṃ;
वधबन्धपरिक्लेसं, जातो दुक्खं निगच्छति॥
Vadhabandhapariklesaṃ, jāto dukkhaṃ nigacchati.
१९२.
192.
‘‘अत्थि सक्यकुले जातो, सम्बुद्धो अपराजितो।
‘‘Atthi sakyakule jāto, sambuddho aparājito;
सो मे धम्ममदेसेसि, जातिया समतिक्कमं॥
So me dhammamadesesi, jātiyā samatikkamaṃ.
१९३.
193.
‘‘दुक्खं दुक्खसमुप्पादं, दुक्खस्स च अतिक्कमं।
‘‘Dukkhaṃ dukkhasamuppādaṃ, dukkhassa ca atikkamaṃ;
अरियं चट्ठङ्गिकं मग्गं, दुक्खूपसमगामिनं॥
Ariyaṃ caṭṭhaṅgikaṃ maggaṃ, dukkhūpasamagāminaṃ.
१९४.
194.
‘‘तस्साहं वचनं सुत्वा, विहरिं सासने रता।
‘‘Tassāhaṃ vacanaṃ sutvā, vihariṃ sāsane ratā;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
१९५.
195.
‘‘सब्बत्थ विहता नन्दी, तमोखन्धो पदालितो।
‘‘Sabbattha vihatā nandī, tamokhandho padālito;
एवं जानाहि पापिम, निहतो त्वमसि अन्तक’’॥
Evaṃ jānāhi pāpima, nihato tvamasi antaka’’.
… उपचाला थेरी…।
… Upacālā therī….
सत्तकनिपातो निट्ठितो।
Sattakanipāto niṭṭhito.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / थेरीगाथा-अट्ठकथा • Therīgāthā-aṭṭhakathā / ३. उपचालाथेरीगाथावण्णना • 3. Upacālātherīgāthāvaṇṇanā
