| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
५. ऊनवीसतिवस्ससिक्खापदवण्णना
5. Ūnavīsativassasikkhāpadavaṇṇanā
गब्भवीसोपि हि ‘‘परिपुण्णवीसो’’ त्वेव सङ्खं गच्छतीति आह ‘‘पटिसन्धिग्गहणतो पट्ठाया’’तिआदि। तत्थ पटिसन्धिग्गहणतो पट्ठायाति यं मातुकुच्छिस्मिं पठमं चित्तं उप्पन्नं पठमं विञ्ञाणं पातुभूतं, तं आदिं कत्वा। सोति यो पुग्गलो ऊनवीसतिवस्सो उपसम्पादितो, सो पुग्गलो। अञ्ञं उपसम्पादेतीति उपज्झायो वा कम्मवाचाचरियो वा हुत्वा अञ्ञं पुग्गलं उपसम्पादेति। तन्ति ऊनवीसतिवस्सं पुग्गलं। सीमं वा सम्मन्नतीति नवं सीमं बन्धति।
Gabbhavīsopi hi ‘‘paripuṇṇavīso’’ tveva saṅkhaṃ gacchatīti āha ‘‘paṭisandhiggahaṇato paṭṭhāyā’’tiādi. Tattha paṭisandhiggahaṇato paṭṭhāyāti yaṃ mātukucchismiṃ paṭhamaṃ cittaṃ uppannaṃ paṭhamaṃ viññāṇaṃ pātubhūtaṃ, taṃ ādiṃ katvā. Soti yo puggalo ūnavīsativasso upasampādito, so puggalo. Aññaṃ upasampādetīti upajjhāyo vā kammavācācariyo vā hutvā aññaṃ puggalaṃ upasampādeti. Tanti ūnavīsativassaṃ puggalaṃ. Sīmaṃ vā sammannatīti navaṃ sīmaṃ bandhati.
ऊनवीसतिवस्ससिक्खापदवण्णना निट्ठिता।
Ūnavīsativassasikkhāpadavaṇṇanā niṭṭhitā.
