| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៣៣. ឧមាបុប្ផិយវគ្គោ
33. Umāpupphiyavaggo
១. ឧមាបុប្ផិយត្ថេរអបទានំ
1. Umāpupphiyattheraapadānaṃ
១.
1.
‘‘សមាហិតំ សមាបន្នំ, សិទ្ធត្ថមបរាជិតំ;
‘‘Samāhitaṃ samāpannaṃ, siddhatthamaparājitaṃ;
សមាធិនា ឧបវិដ្ឋំ, អទ្ទសាហំ នរុត្តមំ។
Samādhinā upaviṭṭhaṃ, addasāhaṃ naruttamaṃ.
២.
2.
‘‘ឧមាបុប្ផំ គហេត្វាន, ពុទ្ធស្ស អភិរោបយិំ;
‘‘Umāpupphaṃ gahetvāna, buddhassa abhiropayiṃ;
សព្ពបុប្ផា ឯកសីសា, ឧទ្ធំវណ្ដា អធោមុខា។
Sabbapupphā ekasīsā, uddhaṃvaṇṭā adhomukhā.
៣.
3.
‘‘សុចិត្តា វិយ តិដ្ឋន្តេ, អាកាសេ បុប្ផសន្ថរា;
‘‘Sucittā viya tiṭṭhante, ākāse pupphasantharā;
តេន ចិត្តប្បសាទេន, តុសិតំ ឧបបជ្ជហំ។
Tena cittappasādena, tusitaṃ upapajjahaṃ.
៤.
4.
‘‘ចតុន្នវុតិតោ កប្បេ, យំ បុប្ផមភិបូជយិំ;
‘‘Catunnavutito kappe, yaṃ pupphamabhipūjayiṃ;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
៥.
5.
‘‘បញ្ចបញ្ញាសិតោ កប្បេ, ឯកោ អាសិំ មហីបតិ;
‘‘Pañcapaññāsito kappe, eko āsiṃ mahīpati;
សមន្តឆទនោ នាម, ចក្កវត្តី មហព្ពលោ។
Samantachadano nāma, cakkavattī mahabbalo.
៦.
6.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ។
Chaḷabhiññā sacchikatā, kataṃ buddhassa sāsanaṃ.
ឥត្ថំ សុទំ អាយស្មា ឧមាបុប្ផិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā umāpupphiyo thero imā gāthāyo abhāsitthāti.
ឧមាបុប្ផិយត្ថេរស្សាបទានំ បឋមំ។
Umāpupphiyattherassāpadānaṃ paṭhamaṃ.
