| Library / Tipiṭaka / திபிடக • Tipiṭaka / விமானவத்து²-அட்ட²கதா² • Vimānavatthu-aṭṭhakathā |
3. பாரிச்ச²த்தகவக்³கோ³
3. Pāricchattakavaggo
1. உளாரவிமானவண்ணனா
1. Uḷāravimānavaṇṇanā
பாரிச்ச²த்தகவக்³கே³ உளாரோ தே யஸோ வண்ணோதி உளாரவிமானங். தஸ்ஸ கா உப்பத்தி? ப⁴க³வா ராஜக³ஹே விஹரதி வேளுவனே கலந்த³கனிவாபே. தேன ஸமயேன ராஜக³ஹே ஆயஸ்மதோ மஹாமொக்³க³ல்லானஸ்ஸ உபட்டா²ககுலே ஏகா தா³ரிகா தா³னஜ்ஜா²ஸயா தா³னஸங்விபா⁴க³ரதா அஹோஸி. ஸா யங் தஸ்மிங் கே³ஹே புரேப⁴த்தங் கா²த³னீயபோ⁴ஜனீயங் உப்பஜ்ஜதி, தத்த² அத்தனா லத்³த⁴படிவீஸதோ உபட்³ட⁴ங் தே³தி, உபட்³ட⁴ங் அத்தனா பரிபு⁴ஞ்ஜதி, அத³த்வா பன ந பு⁴ஞ்ஜதி, த³க்கி²ணெய்யே அபஸ்ஸந்தீபி ட²பெத்வா தி³ட்ட²காலே தே³தி, யாசகானம்பி தே³தியேவ. அத²ஸ்ஸா மாதா ‘‘மம தீ⁴தா தா³னஜ்ஜா²ஸயா தா³னஸங்விபா⁴க³ரதா’’தி ஹட்ட²துட்டா² தஸ்ஸா தி³கு³ணங் பா⁴க³ங் தே³தி. தெ³ந்தீ ச ஏகஸ்மிங் பா⁴கே³ தாய ஸங்விபா⁴கே³ கதே புன அபரங் தே³தி, ஸா ததோபி ஸங்விபா⁴க³ங் கரோதியேவ.
Pāricchattakavagge uḷāro te yaso vaṇṇoti uḷāravimānaṃ. Tassa kā uppatti? Bhagavā rājagahe viharati veḷuvane kalandakanivāpe. Tena samayena rājagahe āyasmato mahāmoggallānassa upaṭṭhākakule ekā dārikā dānajjhāsayā dānasaṃvibhāgaratā ahosi. Sā yaṃ tasmiṃ gehe purebhattaṃ khādanīyabhojanīyaṃ uppajjati, tattha attanā laddhapaṭivīsato upaḍḍhaṃ deti, upaḍḍhaṃ attanā paribhuñjati, adatvā pana na bhuñjati, dakkhiṇeyye apassantīpi ṭhapetvā diṭṭhakāle deti, yācakānampi detiyeva. Athassā mātā ‘‘mama dhītā dānajjhāsayā dānasaṃvibhāgaratā’’ti haṭṭhatuṭṭhā tassā diguṇaṃ bhāgaṃ deti. Dentī ca ekasmiṃ bhāge tāya saṃvibhāge kate puna aparaṃ deti, sā tatopi saṃvibhāgaṃ karotiyeva.
ஏவங் க³ச்ச²ந்தே காலே தங் வயப்பத்தங் மாதாபிதரோ தஸ்மிங்யேவ நக³ரே அஞ்ஞதரஸ்மிங் குலே குமாரஸ்ஸ அத³ங்ஸு. தங் பன குலங் மிச்சா²தி³ட்டி²கங் ஹோதி அஸ்ஸத்³த⁴ங் அப்பஸன்னங் . அதா²யஸ்மா மஹாமொக்³க³ல்லானோ ராஜக³ஹே ஸபதா³னங் பிண்டா³ய சரமானோ தஸ்ஸா தா³ரிகாய ஸஸுரஸ்ஸ கே³ஹத்³வாரே அட்டா²ஸி. தங் தி³ஸ்வா ஸா தா³ரிகா பஸன்னசித்தா ‘‘பவிஸத² ப⁴ந்தே’’தி பவேஸெத்வா வந்தி³த்வா ஸஸ்ஸுயா ட²பிதங் பூவங் தங் அபஸ்ஸந்தீ ‘‘தஸ்ஸா கதெ²த்வா அனுமோதா³பெஸ்ஸாமீ’’தி விஸ்ஸாஸேன க³ஹெத்வா தே²ரஸ்ஸ அதா³ஸி, தே²ரோ அனுமோத³னங் கத்வா பக்காமி. தா³ரிகா ‘‘தும்ஹேஹி ட²பிதங் பூவங் மஹாமொக்³க³ல்லானத்தே²ரஸ்ஸ அதா³ஸி’’ந்தி ஸஸ்ஸுயா கதே²ஸி. ஸா தங் ஸுத்வா ‘‘கின்னாமித³ங் பாக³ப்³பி⁴யங், அயங் மம ஸந்தகங் அனாபுச்சி²த்வாவ ஸமணஸ்ஸ அதா³ஸீ’’தி தங் கடதடாயமானா கோதா⁴பி⁴பூ⁴தா யுத்தாயுத்தங் அசிந்தெந்தீ புரதோ டி²தங் முஸலக²ண்ட³ங் க³ஹெத்வா அங்ஸகூடே பஹரி. ஸா ஸுகு²மாலதாய பரிக்கீ²ணாயுகதாய ச தேனேவ பஹாரேன ப³லவது³க்கா²பி⁴பூ⁴தா ஹுத்வா கதிபாஹேனேவ காலங் கத்வா தாவதிங்ஸேஸு நிப்³ப³த்தி. தஸ்ஸா ஸதிபி அஞ்ஞஸ்மிங் ஸுசரிதகம்மே தே²ரஸ்ஸ கததா³னமேவ ஸாதிஸயங் ஹுத்வா உபட்டா²ஸி. தங் ஆயஸ்மா மஹாமொக்³க³ல்லானோ ஹெட்டா² வுத்தனயேனேவ க³ந்த்வா –
Evaṃ gacchante kāle taṃ vayappattaṃ mātāpitaro tasmiṃyeva nagare aññatarasmiṃ kule kumārassa adaṃsu. Taṃ pana kulaṃ micchādiṭṭhikaṃ hoti assaddhaṃ appasannaṃ . Athāyasmā mahāmoggallāno rājagahe sapadānaṃ piṇḍāya caramāno tassā dārikāya sasurassa gehadvāre aṭṭhāsi. Taṃ disvā sā dārikā pasannacittā ‘‘pavisatha bhante’’ti pavesetvā vanditvā sassuyā ṭhapitaṃ pūvaṃ taṃ apassantī ‘‘tassā kathetvā anumodāpessāmī’’ti vissāsena gahetvā therassa adāsi, thero anumodanaṃ katvā pakkāmi. Dārikā ‘‘tumhehi ṭhapitaṃ pūvaṃ mahāmoggallānattherassa adāsi’’nti sassuyā kathesi. Sā taṃ sutvā ‘‘kinnāmidaṃ pāgabbhiyaṃ, ayaṃ mama santakaṃ anāpucchitvāva samaṇassa adāsī’’ti taṃ kaṭataṭāyamānā kodhābhibhūtā yuttāyuttaṃ acintentī purato ṭhitaṃ musalakhaṇḍaṃ gahetvā aṃsakūṭe pahari. Sā sukhumālatāya parikkhīṇāyukatāya ca teneva pahārena balavadukkhābhibhūtā hutvā katipāheneva kālaṃ katvā tāvatiṃsesu nibbatti. Tassā satipi aññasmiṃ sucaritakamme therassa katadānameva sātisayaṃ hutvā upaṭṭhāsi. Taṃ āyasmā mahāmoggallāno heṭṭhā vuttanayeneva gantvā –
286.
286.
‘‘உளாரோ தே யஸோ வண்ணோ, ஸப்³பா³ ஓபா⁴ஸதே தி³ஸா;
‘‘Uḷāro te yaso vaṇṇo, sabbā obhāsate disā;
நாரியோ நச்சந்தி கா³யந்தி, தே³வபுத்தா அலங்கதா.
Nāriyo naccanti gāyanti, devaputtā alaṅkatā.
287.
287.
‘‘மோதெ³ந்தி பரிவாரெந்தி, தவ பூஜாய தே³வதே;
‘‘Modenti parivārenti, tava pūjāya devate;
ஸோவண்ணானி விமானானி, தவிமானி ஸுத³ஸ்ஸனே.
Sovaṇṇāni vimānāni, tavimāni sudassane.
288.
288.
‘‘துவங்ஸி இஸ்ஸரா தேஸங், ஸப்³ப³காமஸமித்³தி⁴னீ;
‘‘Tuvaṃsi issarā tesaṃ, sabbakāmasamiddhinī;
அபி⁴ஜாதா மஹந்தாஸி, தே³வகாயே பமோத³ஸி;
Abhijātā mahantāsi, devakāye pamodasi;
தே³வதே புச்சி²தாசிக்க², கிஸ்ஸ கம்மஸ்ஸித³ங் ப²ல’’ந்தி. –
Devate pucchitācikkha, kissa kammassidaṃ phala’’nti. –
தீஹி கா³தா²ஹி புச்சி².
Tīhi gāthāhi pucchi.
286. தத்த² யஸோதி பரிவாரோ. வண்ணோதி வண்ணனிபா⁴ ஸரீரோபா⁴ஸோ. ‘‘உளாரோ’’தி பன விஸேஸெத்வா வுத்தத்தா தஸ்ஸா தே³வதாய பரிவாரஸம்பத்தி ச வண்ணஸம்பத்தி ச வுத்தா ஹோதி. தாஸு ‘‘உளாரோ தே வண்ணோ’’தி ஸங்கே²பதோ வுத்தங் வண்ணஸம்பத்திங் விஸயவஸேன வித்தா²ரதோ த³ஸ்ஸேதுங் ‘‘ஸப்³பா³ ஓபா⁴ஸதே தி³ஸா’’தி வத்வா ‘‘உளாரோ தே யஸோ’’தி வுத்தங் பரிவாரஸம்பத்திங் வத்து²வஸேன வித்தா²ரதோ த³ஸ்ஸேதுங் ‘‘நாரியோ நச்சந்தீ’’திஆதி³ வுத்தங். தத்த² ஸப்³பா³ ஓபா⁴ஸதே தி³ஸாதி ஸப்³பா³ஸு தி³ஸாஸு விஜ்ஜோததே, ஸப்³பா³ வா தி³ஸா ஓபா⁴ஸயதே, விஜ்ஜோதயதீதி அத்தோ². ‘‘ஓபா⁴ஸதே’’தி பத³ஸ்ஸ ‘‘ஓபா⁴ஸந்தே’’தி கேசி வசனவிபல்லாஸேன அத்த²ங் வத³ந்தி, தேஹி ‘‘வண்ணேனா’’தி விப⁴த்தி விபரிணாமேதப்³பா³. வண்ணேனாதி ச ஹேதும்ஹி கரணவசனங், வண்ணேன ஹேதுபூ⁴தேனாதி அத்தோ². ‘‘ஸப்³பா³ தி³ஸா’’தி ச ஜாதிவஸேன தி³ஸாஸாமஞ்ஞே அபெக்கி²தே வசனவிபல்லாஸேனபி பயோஜனங் நத்தி². நாரியோதி எத்தா²பி ‘‘அலங்கதா’’தி பத³ங் ஆனெத்வா ஸம்ப³ந்தி⁴தப்³ப³ங். தே³வபுத்தாதி எத்த² ச-ஸத்³தோ³ லுத்தனித்³தி³ட்டோ². தேன நாரியோ தே³வபுத்தா சாதி ஸமுச்சயோ வேதி³தப்³போ³.
286. Tattha yasoti parivāro. Vaṇṇoti vaṇṇanibhā sarīrobhāso. ‘‘Uḷāro’’ti pana visesetvā vuttattā tassā devatāya parivārasampatti ca vaṇṇasampatti ca vuttā hoti. Tāsu ‘‘uḷāro te vaṇṇo’’ti saṅkhepato vuttaṃ vaṇṇasampattiṃ visayavasena vitthārato dassetuṃ ‘‘sabbā obhāsate disā’’ti vatvā ‘‘uḷāro te yaso’’ti vuttaṃ parivārasampattiṃ vatthuvasena vitthārato dassetuṃ ‘‘nāriyo naccantī’’tiādi vuttaṃ. Tattha sabbā obhāsate disāti sabbāsu disāsu vijjotate, sabbā vā disā obhāsayate, vijjotayatīti attho. ‘‘Obhāsate’’ti padassa ‘‘obhāsante’’ti keci vacanavipallāsena atthaṃ vadanti, tehi ‘‘vaṇṇenā’’ti vibhatti vipariṇāmetabbā. Vaṇṇenāti ca hetumhi karaṇavacanaṃ, vaṇṇena hetubhūtenāti attho. ‘‘Sabbā disā’’ti ca jātivasena disāsāmaññe apekkhite vacanavipallāsenapi payojanaṃ natthi. Nāriyoti etthāpi ‘‘alaṅkatā’’ti padaṃ ānetvā sambandhitabbaṃ. Devaputtāti ettha ca-saddo luttaniddiṭṭho. Tena nāriyo devaputtā cāti samuccayo veditabbo.
287. மோதெ³ந்தீதி பமோத³யந்தி. பூஜாயாதி பூஜனத்த²ங் பூஜானிமித்தங் வா, நச்சந்தி கா³யந்தீதி யோஜனா. தவிமானீதி தவ இமானி.
287.Modentīti pamodayanti. Pūjāyāti pūjanatthaṃ pūjānimittaṃ vā, naccanti gāyantīti yojanā. Tavimānīti tava imāni.
288. ஸப்³ப³காமஸமித்³தி⁴னீதி ஸப்³பே³ஹி பஞ்சஹி காமகு³ணேஹி, ஸப்³பே³ஹி வா தயா காமிதேஹி இச்சி²தேஹி வத்தூ²ஹி ஸமித்³தா⁴. அபி⁴ஜாதாதி ஸுஜாதா. மஹந்தாஸீதி மஹதீ மஹானுபா⁴வா அஸி. தே³வகாயே பமோத³ஸீதி இமஸ்மிங் தே³வனிகாயே தி³ப்³ப³ஸம்பத்திஹேதுகேன பரமேன பமோத³னேன பமோத³ஸி.
288.Sabbakāmasamiddhinīti sabbehi pañcahi kāmaguṇehi, sabbehi vā tayā kāmitehi icchitehi vatthūhi samiddhā. Abhijātāti sujātā. Mahantāsīti mahatī mahānubhāvā asi. Devakāye pamodasīti imasmiṃ devanikāye dibbasampattihetukena paramena pamodanena pamodasi.
ஏவங் தே²ரேன புச்சி²தா ஸா தே³வதா தமத்த²ங் விஸ்ஸஜ்ஜேஸி –
Evaṃ therena pucchitā sā devatā tamatthaṃ vissajjesi –
289.
289.
‘‘அஹங் மனுஸ்ஸேஸு மனுஸ்ஸபூ⁴தா, புரிமாய ஜாதியா மனுஸ்ஸலோகே;
‘‘Ahaṃ manussesu manussabhūtā, purimāya jātiyā manussaloke;
து³ஸ்ஸீலகுலே ஸுணிஸா அஹோஸிங், அஸ்ஸத்³தே⁴ஸு கத³ரியேஸு அஹங்.
Dussīlakule suṇisā ahosiṃ, assaddhesu kadariyesu ahaṃ.
290.
290.
‘‘ஸத்³தா⁴ ஸீலேன ஸம்பன்னா, ஸங்விபா⁴க³ரதா ஸதா³;
‘‘Saddhā sīlena sampannā, saṃvibhāgaratā sadā;
பிண்டா³ய சரமானஸ்ஸ, அபூவங் தே அதா³ஸஹங்.
Piṇḍāya caramānassa, apūvaṃ te adāsahaṃ.
291.
291.
‘‘ததா³ஹங் ஸஸ்ஸுயாசிக்கி²ங், ‘ஸமணோ ஆக³தோ இத⁴;
‘‘Tadāhaṃ sassuyācikkhiṃ, ‘samaṇo āgato idha;
தஸ்ஸ அதா³ஸஹங் பூவங், பஸன்னா ஸேஹி பாணிபி⁴’.
Tassa adāsahaṃ pūvaṃ, pasannā sehi pāṇibhi’.
292.
292.
‘‘இதிஸ்ஸா ஸஸ்ஸு பரிபா⁴ஸி, அவினீதாஸி த்வங் வது⁴;
‘‘Itissā sassu paribhāsi, avinītāsi tvaṃ vadhu;
ந மங் ஸம்புச்சி²துங் இச்சி², ‘ஸமணஸ்ஸ த³தா³மஹங்’.
Na maṃ sampucchituṃ icchi, ‘samaṇassa dadāmahaṃ’.
293.
293.
‘‘ததோ மே ஸஸ்ஸு குபிதா, பஹாஸி முஸலேன மங்;
‘‘Tato me sassu kupitā, pahāsi musalena maṃ;
கூடங்க³ச்சி² அவதி⁴ மங், நாஸக்கி²ங் ஜீவிதுங் சிரங்.
Kūṭaṅgacchi avadhi maṃ, nāsakkhiṃ jīvituṃ ciraṃ.
294.
294.
‘‘அஹங் காயஸ்ஸ பே⁴தா³, விப்பமுத்தா ததோ சுதா;
‘‘Ahaṃ kāyassa bhedā, vippamuttā tato cutā;
தே³வானங் தாவதிங்ஸானங், உபபன்னா ஸஹப்³யதங்.
Devānaṃ tāvatiṃsānaṃ, upapannā sahabyataṃ.
295.
295.
‘‘தேன மேதாதி³ஸோ வண்ணோ…பே॰…
‘‘Tena metādiso vaṇṇo…pe…
வண்ணோ ச மே ஸப்³ப³தி³ஸா பபா⁴ஸதீ’’தி.
Vaṇṇo ca me sabbadisā pabhāsatī’’ti.
289. தத்த² அஸ்ஸத்³தே⁴ஸூதி ரதனத்தயஸத்³தா⁴ய கம்மப²லஸத்³தா⁴ய ச அபா⁴வேன அஸ்ஸத்³தே⁴ஸு, த²த்³த⁴மச்ச²ரியதாய கத³ரியேஸு ஸஸ்ஸுஆதீ³ஸு அஹங் ஸத்³தா⁴ ஸீலேன ஸம்பன்னா அஹோஸிந்தி யோஜனா.
289. Tattha assaddhesūti ratanattayasaddhāya kammaphalasaddhāya ca abhāvena assaddhesu, thaddhamacchariyatāya kadariyesu sassuādīsu ahaṃ saddhā sīlena sampannā ahosinti yojanā.
290-1. அபூவந்தி கபல்லபூவங். தேதி நிபாதமத்தங். ஸஸ்ஸுயா ஆசிக்கி²ங் க³ஹிதபா⁴வஞாபனத்த²ஞ்ச அனுமோத³னத்த²ஞ்சாதி அதி⁴ப்பாயோ.
290-1.Apūvanti kapallapūvaṃ. Teti nipātamattaṃ. Sassuyā ācikkhiṃ gahitabhāvañāpanatthañca anumodanatthañcāti adhippāyo.
292. இதிஸ்ஸாதி எத்த² அஸ்ஸாதி நிபாதமத்தங். ஸமணஸ்ஸ த³தா³மஹந்தி அஹங் ஸமணஸ்ஸ அபூவங் த³தா³மீதி. யஸ்மா ந மங் ஸம்புச்சி²துங் இச்சி², தஸ்மா த்வங் வது⁴ அவினீதாஸீதி ஸஸ்ஸு பரிபா⁴ஸீதி யோஜனா.
292.Itissāti ettha assāti nipātamattaṃ. Samaṇassa dadāmahanti ahaṃ samaṇassa apūvaṃ dadāmīti. Yasmā na maṃ sampucchituṃ icchi, tasmā tvaṃ vadhu avinītāsīti sassu paribhāsīti yojanā.
293. பஹாஸீதி பஹரி. கூடங்க³ச்சி² அவதி⁴ மந்தி எத்த² கூடந்தி அங்ஸகூடங் வுத்தங் புரிமபத³லோபேன, கூடமேவ அங்க³ந்தி கூடங்க³ங், தங் சி²ந்த³தீதி கூடங்க³ச்சி². ஏவங் கோதா⁴பி⁴பூ⁴தா ஹுத்வா மங் அவதி⁴, மம அங்ஸகூடங் சி²ந்தி³, தேனேவ உபக்கமேன மதத்தா மங் மாரேஸீதி அத்தோ². தேனாஹ ‘‘நாஸக்கி²ங் ஜீவிதுங் சிர’’ந்தி.
293.Pahāsīti pahari. Kūṭaṅgacchi avadhi manti ettha kūṭanti aṃsakūṭaṃ vuttaṃ purimapadalopena, kūṭameva aṅganti kūṭaṅgaṃ, taṃ chindatīti kūṭaṅgacchi. Evaṃ kodhābhibhūtā hutvā maṃ avadhi, mama aṃsakūṭaṃ chindi, teneva upakkamena matattā maṃ māresīti attho. Tenāha ‘‘nāsakkhiṃ jīvituṃ cira’’nti.
294. விப்பமுத்தாதி ததோ து³க்க²தோ ஸுட்டு² முத்தா. ஸேஸங் வுத்தனயமேவ.
294.Vippamuttāti tato dukkhato suṭṭhu muttā. Sesaṃ vuttanayameva.
உளாரவிமானவண்ணனா நிட்டி²தா.
Uḷāravimānavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / விமானவத்து²பாளி • Vimānavatthupāḷi / 1. உளாரவிமானவத்து² • 1. Uḷāravimānavatthu
