| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
३. उक्कोटनसिक्खापदवण्णना
3. Ukkoṭanasikkhāpadavaṇṇanā
तस्स तस्स भिक्खुनोति येन येन वूपसमितं, तस्स तस्स भिक्खुनो। ‘‘अकतं कम्म’’न्तिआदीनि वदन्तोति ‘‘अकतं कम्मं, दुक्कटं कम्मं, पुन कातब्बं कम्मं, अनिहतं दुन्निहतं पुन निहनितब्ब’’न्ति (पाचि॰ ३९४) वदन्तो। यथाठितभावेन पतिट्ठातुं न ददेय्याति तेसं पवत्ति आकारदस्सनत्थं वुत्तं। तेनाह ‘‘यं पन धम्मेन अधिकरणं निहतं, तं सुनिहतमेवा’’ति।
Tassa tassa bhikkhunoti yena yena vūpasamitaṃ, tassa tassa bhikkhuno. ‘‘Akataṃ kamma’’ntiādīni vadantoti ‘‘akataṃ kammaṃ, dukkaṭaṃ kammaṃ, puna kātabbaṃ kammaṃ, anihataṃ dunnihataṃ puna nihanitabba’’nti (pāci. 394) vadanto. Yathāṭhitabhāvena patiṭṭhātuṃ na dadeyyāti tesaṃ pavatti ākāradassanatthaṃ vuttaṃ. Tenāha ‘‘yaṃ pana dhammena adhikaraṇaṃ nihataṃ, taṃ sunihatamevā’’ti.
उक्कोटनसिक्खापदवण्णना निट्ठिता।
Ukkoṭanasikkhāpadavaṇṇanā niṭṭhitā.
