องฺคุตฺตร นิกาย ๕ฯ๑๕๙

๑๖ฯ สทฺธมฺมวคฺค

อุทายีสุตฺต

เอวํ เม สุตํ—เอกํ สมยํ ภควา โกสมฺพิยํ วิหรติ โฆสิตาราเมฯ เตน โข ปน สมเยน อายสฺมา อุทายี มหติยา คิหิปริสาย ปริวุโต ธมฺมํ เทเสนฺโต นิสินฺโน โหติฯ อทฺทสา โข อายสฺมา อานนฺโท อายสฺมนฺตํ อุทายึ มหติยา คิหิปริสาย ปริวุตํ ธมฺมํ เทเสนฺตํ นิสินฺนํฯ ทิสฺวา เยน ภควา เตนุปสงฺกมิ; อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิฯ เอกมนฺตํ นิสินฺโน โข อายสฺมา อานนฺโท ภควนฺตํ เอตทโวจ:

“อายสฺมา, ภนฺเต, อุทายี มหติยา คิหิปริสาย ปริวุโต ธมฺมํ เทเสตี”ติฯ

“น โข, อานนฺท, สุกรํ ปเรสํ ธมฺมํ เทเสตุํฯ ปเรสํ, อานนฺท, ธมฺมํ เทเสนฺเตน ปญฺจ ธมฺเม อชฺฌตฺตํ อุปฏฺฐาเปตฺวา ปเรสํ ธมฺโม เทเสตพฺโพฯ กตเม ปญฺจ?

‘อนุปุพฺพึ กถํ กเถสฺสามี'ติ ปเรสํ ธมฺโม เทเสตพฺโพ;

‘ปริยายทสฺสาวี กถํ กเถสฺสามี'ติ ปเรสํ ธมฺโม เทเสตพฺโพ;

‘อนุทฺทยตํ ปฏิจฺจ กถํ กเถสฺสามี'ติ ปเรสํ ธมฺโม เทเสตพฺโพ;

‘น อามิสนฺตโร กถํ กเถสฺสามี'ติ ปเรสํ ธมฺโม เทเสตพฺโพ;

‘อตฺตานญฺจ ปรญฺจ อนุปหจฺจ กถํ กเถสฺสามี'ติ ปเรสํ ธมฺโม เทเสตพฺโพฯ

น โข, อานนฺท, สุกรํ ปเรสํ ธมฺมํ เทเสตุํฯ ปเรสํ, อานนฺท, ธมฺมํ เทเสนฺเตน อิเม ปญฺจ ธมฺเม อชฺฌตฺตํ อุปฏฺฐาเปตฺวา ปเรสํ ธมฺโม เทเสตพฺโพ”ติฯ

นวมํฯ