| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೧೩. ಉದಯಮಾಣವಪುಚ್ಛಾ
13. Udayamāṇavapucchā
೧೧೧೧.
1111.
‘‘ಝಾಯಿಂ ವಿರಜಮಾಸೀನಂ, (ಇಚ್ಚಾಯಸ್ಮಾ ಉದಯೋ) ಕತಕಿಚ್ಚಂ ಅನಾಸವಂ।
‘‘Jhāyiṃ virajamāsīnaṃ, (iccāyasmā udayo) katakiccaṃ anāsavaṃ;
ಪಾರಗುಂ ಸಬ್ಬಧಮ್ಮಾನಂ, ಅತ್ಥಿ ಪಞ್ಹೇನ ಆಗಮಂ।
Pāraguṃ sabbadhammānaṃ, atthi pañhena āgamaṃ;
ಅಞ್ಞಾವಿಮೋಕ್ಖಂ ಪಬ್ರೂಹಿ, ಅವಿಜ್ಜಾಯ ಪಭೇದನಂ’’॥
Aññāvimokkhaṃ pabrūhi, avijjāya pabhedanaṃ’’.
೧೧೧೨.
1112.
‘‘ಪಹಾನಂ ಕಾಮಚ್ಛನ್ದಾನಂ, (ಉದಯಾತಿ ಭಗವಾ) ದೋಮನಸ್ಸಾನ ಚೂಭಯಂ।
‘‘Pahānaṃ kāmacchandānaṃ, (udayāti bhagavā) domanassāna cūbhayaṃ;
ಥಿನಸ್ಸ ಚ ಪನೂದನಂ, ಕುಕ್ಕುಚ್ಚಾನಂ ನಿವಾರಣಂ॥
Thinassa ca panūdanaṃ, kukkuccānaṃ nivāraṇaṃ.
೧೧೧೩.
1113.
‘‘ಉಪೇಕ್ಖಾಸತಿಸಂಸುದ್ಧಂ, ಧಮ್ಮತಕ್ಕಪುರೇಜವಂ।
‘‘Upekkhāsatisaṃsuddhaṃ, dhammatakkapurejavaṃ;
ಅಞ್ಞಾವಿಮೋಕ್ಖಂ ಪಬ್ರೂಮಿ, ಅವಿಜ್ಜಾಯ ಪಭೇದನಂ’’॥
Aññāvimokkhaṃ pabrūmi, avijjāya pabhedanaṃ’’.
೧೧೧೪.
1114.
‘‘ಕಿಂಸು ಸಂಯೋಜನೋ ಲೋಕೋ, ಕಿಂಸು ತಸ್ಸ ವಿಚಾರಣಂ।
‘‘Kiṃsu saṃyojano loko, kiṃsu tassa vicāraṇaṃ;
ಕಿಸ್ಸಸ್ಸ ವಿಪ್ಪಹಾನೇನ, ನಿಬ್ಬಾನಂ ಇತಿ ವುಚ್ಚತಿ’’॥
Kissassa vippahānena, nibbānaṃ iti vuccati’’.
೧೧೧೫.
1115.
‘‘ನನ್ದಿಸಂಯೋಜನೋ ಲೋಕೋ, ವಿತಕ್ಕಸ್ಸ ವಿಚಾರಣಂ।
‘‘Nandisaṃyojano loko, vitakkassa vicāraṇaṃ;
ತಣ್ಹಾಯ ವಿಪ್ಪಹಾನೇನ, ನಿಬ್ಬಾನಂ ಇತಿ ವುಚ್ಚತಿ’’॥
Taṇhāya vippahānena, nibbānaṃ iti vuccati’’.
೧೧೧೬.
1116.
‘‘ಕಥಂ ಸತಸ್ಸ ಚರತೋ, ವಿಞ್ಞಾಣಂ ಉಪರುಜ್ಝತಿ।
‘‘Kathaṃ satassa carato, viññāṇaṃ uparujjhati;
ಭಗವನ್ತಂ ಪುಟ್ಠುಮಾಗಮ್ಮ, ತಂ ಸುಣೋಮ ವಚೋ ತವ’’॥
Bhagavantaṃ puṭṭhumāgamma, taṃ suṇoma vaco tava’’.
೧೧೧೭.
1117.
‘‘ಅಜ್ಝತ್ತಞ್ಚ ಬಹಿದ್ಧಾ ಚ, ವೇದನಂ ನಾಭಿನನ್ದತೋ।
‘‘Ajjhattañca bahiddhā ca, vedanaṃ nābhinandato;
ಏವಂ ಸತಸ್ಸ ಚರತೋ, ವಿಞ್ಞಾಣಂ ಉಪರುಜ್ಝತೀ’’ತಿ॥
Evaṃ satassa carato, viññāṇaṃ uparujjhatī’’ti.
ಉದಯಮಾಣವಪುಚ್ಛಾ ತೇರಸಮಾ ನಿಟ್ಠಿತಾ।
Udayamāṇavapucchā terasamā niṭṭhitā.
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೧೩. ಉದಯಸುತ್ತವಣ್ಣನಾ • 13. Udayasuttavaṇṇanā
