| Library / Tipiṭaka / តិបិដក • Tipiṭaka / សុត្តនិបាតបាឡិ • Suttanipātapāḷi |
១៣. ឧទយមាណវបុច្ឆា
13. Udayamāṇavapucchā
១១១១.
1111.
‘‘ឈាយិំ វិរជមាសីនំ, (ឥច្ចាយស្មា ឧទយោ) កតកិច្ចំ អនាសវំ;
‘‘Jhāyiṃ virajamāsīnaṃ, (iccāyasmā udayo) katakiccaṃ anāsavaṃ;
បារគុំ សព្ពធម្មានំ, អត្ថិ បញ្ហេន អាគមំ;
Pāraguṃ sabbadhammānaṃ, atthi pañhena āgamaṃ;
អញ្ញាវិមោក្ខំ បព្រូហិ, អវិជ្ជាយ បភេទនំ’’។
Aññāvimokkhaṃ pabrūhi, avijjāya pabhedanaṃ’’.
១១១២.
1112.
‘‘បហានំ កាមច្ឆន្ទានំ, (ឧទយាតិ ភគវា) ទោមនស្សាន ចូភយំ;
‘‘Pahānaṃ kāmacchandānaṃ, (udayāti bhagavā) domanassāna cūbhayaṃ;
ថិនស្ស ច បនូទនំ, កុក្កុច្ចានំ និវារណំ។
Thinassa ca panūdanaṃ, kukkuccānaṃ nivāraṇaṃ.
១១១៣.
1113.
‘‘ឧបេក្ខាសតិសំសុទ្ធំ, ធម្មតក្កបុរេជវំ;
‘‘Upekkhāsatisaṃsuddhaṃ, dhammatakkapurejavaṃ;
អញ្ញាវិមោក្ខំ បព្រូមិ, អវិជ្ជាយ បភេទនំ’’។
Aññāvimokkhaṃ pabrūmi, avijjāya pabhedanaṃ’’.
១១១៤.
1114.
‘‘កិំសុ សំយោជនោ លោកោ, កិំសុ តស្ស វិចារណំ;
‘‘Kiṃsu saṃyojano loko, kiṃsu tassa vicāraṇaṃ;
កិស្សស្ស វិប្បហានេន, និព្ពានំ ឥតិ វុច្ចតិ’’។
Kissassa vippahānena, nibbānaṃ iti vuccati’’.
១១១៥.
1115.
‘‘នន្ទិសំយោជនោ លោកោ, វិតក្កស្ស វិចារណំ;
‘‘Nandisaṃyojano loko, vitakkassa vicāraṇaṃ;
តណ្ហាយ វិប្បហានេន, និព្ពានំ ឥតិ វុច្ចតិ’’។
Taṇhāya vippahānena, nibbānaṃ iti vuccati’’.
១១១៦.
1116.
‘‘កថំ សតស្ស ចរតោ, វិញ្ញាណំ ឧបរុជ្ឈតិ;
‘‘Kathaṃ satassa carato, viññāṇaṃ uparujjhati;
ភគវន្តំ បុដ្ឋុមាគម្ម, តំ សុណោម វចោ តវ’’។
Bhagavantaṃ puṭṭhumāgamma, taṃ suṇoma vaco tava’’.
១១១៧.
1117.
‘‘អជ្ឈត្តញ្ច ពហិទ្ធា ច, វេទនំ នាភិនន្ទតោ;
‘‘Ajjhattañca bahiddhā ca, vedanaṃ nābhinandato;
ឯវំ សតស្ស ចរតោ, វិញ្ញាណំ ឧបរុជ្ឈតី’’តិ។
Evaṃ satassa carato, viññāṇaṃ uparujjhatī’’ti.
ឧទយមាណវបុច្ឆា តេរសមា និដ្ឋិតា។
Udayamāṇavapucchā terasamā niṭṭhitā.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / សុត្តនិបាត-អដ្ឋកថា • Suttanipāta-aṭṭhakathā / ១៣. ឧទយសុត្តវណ្ណនា • 13. Udayasuttavaṇṇanā
