| Library / Tipiṭaka / ತಿಪಿಟಕ • Tipiṭaka / ಅಪದಾನಪಾಳಿ • Apadānapāḷi |
೨೪. ಉದಕಾಸನವಗ್ಗೋ
24. Udakāsanavaggo
೧. ಉದಕಾಸನದಾಯಕತ್ಥೇರಅಪದಾನಂ
1. Udakāsanadāyakattheraapadānaṃ
೧.
1.
‘‘ಆರಾಮದ್ವಾರಾ ನಿಕ್ಖಮ್ಮ, ಫಲಕಂ ಸನ್ಥರಿಂ ಅಹಂ।
‘‘Ārāmadvārā nikkhamma, phalakaṃ santhariṃ ahaṃ;
ಉದಕಞ್ಚ ಉಪಟ್ಠಾಸಿಂ, ಉತ್ತಮತ್ಥಸ್ಸ ಪತ್ತಿಯಾ॥
Udakañca upaṭṭhāsiṃ, uttamatthassa pattiyā.
೨.
2.
‘‘ಏಕತ್ತಿಂಸೇ ಇತೋ ಕಪ್ಪೇ, ಯಂ ಕಮ್ಮಮಕರಿಂ ತದಾ।
‘‘Ekattiṃse ito kappe, yaṃ kammamakariṃ tadā;
ದುಗ್ಗತಿಂ ನಾಭಿಜಾನಾಮಿ, ಆಸನೇ ಚೋದಕೇ ಫಲಂ॥
Duggatiṃ nābhijānāmi, āsane codake phalaṃ.
೩.
3.
‘‘ಇತೋ ಪನ್ನರಸೇ ಕಪ್ಪೇ, ಅಭಿಸಾಮಸಮವ್ಹಯೋ।
‘‘Ito pannarase kappe, abhisāmasamavhayo;
ಸತ್ತರತನಸಮ್ಪನ್ನೋ, ಚಕ್ಕವತ್ತೀ ಮಹಬ್ಬಲೋ॥
Sattaratanasampanno, cakkavattī mahabbalo.
೪.
4.
‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ।
‘‘Paṭisambhidā catasso, vimokkhāpi ca aṭṭhime;
ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’॥
Chaḷabhiññā sacchikatā, kataṃ buddhassa sāsanaṃ’’.
ಇತ್ಥಂ ಸುದಂ ಆಯಸ್ಮಾ ಉದಕಾಸನದಾಯಕೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ।
Itthaṃ sudaṃ āyasmā udakāsanadāyako thero imā gāthāyo abhāsitthāti.
ಉದಕಾಸನದಾಯಕತ್ಥೇರಸ್ಸಾಪದಾನಂ ಪಠಮಂ।
Udakāsanadāyakattherassāpadānaṃ paṭhamaṃ.
