| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
២៤. ឧទកាសនវគ្គោ
24. Udakāsanavaggo
១. ឧទកាសនទាយកត្ថេរអបទានំ
1. Udakāsanadāyakattheraapadānaṃ
១.
1.
‘‘អារាមទ្វារា និក្ខម្ម, ផលកំ សន្ថរិំ អហំ;
‘‘Ārāmadvārā nikkhamma, phalakaṃ santhariṃ ahaṃ;
ឧទកញ្ច ឧបដ្ឋាសិំ, ឧត្តមត្ថស្ស បត្តិយា។
Udakañca upaṭṭhāsiṃ, uttamatthassa pattiyā.
២.
2.
‘‘ឯកត្តិំសេ ឥតោ កប្បេ, យំ កម្មមករិំ តទា;
‘‘Ekattiṃse ito kappe, yaṃ kammamakariṃ tadā;
ទុគ្គតិំ នាភិជានាមិ, អាសនេ ចោទកេ ផលំ។
Duggatiṃ nābhijānāmi, āsane codake phalaṃ.
៣.
3.
‘‘ឥតោ បន្នរសេ កប្បេ, អភិសាមសមវ្ហយោ;
‘‘Ito pannarase kappe, abhisāmasamavhayo;
សត្តរតនសម្បន្នោ, ចក្កវត្តី មហព្ពលោ។
Sattaratanasampanno, cakkavattī mahabbalo.
៤.
4.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា ឧទកាសនទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā udakāsanadāyako thero imā gāthāyo abhāsitthāti.
ឧទកាសនទាយកត្ថេរស្សាបទានំ បឋមំ។
Udakāsanadāyakattherassāpadānaṃ paṭhamaṃ.
