| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൪. ഉഭതോഭാഗവിമുത്തസുത്തം
4. Ubhatobhāgavimuttasuttaṃ
൪൫. ‘‘‘ഉഭതോഭാഗവിമുത്തോ ഉഭതോഭാഗവിമുത്തോ’തി, ആവുസോ, വുച്ചതി. കിത്താവതാ നു ഖോ, ആവുസോ, ഉഭതോഭാഗവിമുത്തോ വുത്തോ ഭഗവതാ’’തി?
45. ‘‘‘Ubhatobhāgavimutto ubhatobhāgavimutto’ti, āvuso, vuccati. Kittāvatā nu kho, āvuso, ubhatobhāgavimutto vutto bhagavatā’’ti?
‘‘ഇധാവുസോ, ഭിക്ഖു വിവിച്ചേവ കാമേഹി…പേ॰… പഠമം ഝാനം ഉപസമ്പജ്ജ വിഹരതി. യഥാ യഥാ ച തദായതനം തഥാ തഥാ നം കായേന ഫുസിത്വാ വിഹരതി, പഞ്ഞായ ച നം പജാനാതി. ഏത്താവതാപി ഖോ, ആവുസോ, ഉഭതോഭാഗവിമുത്തോ വുത്തോ ഭഗവതാ പരിയായേന…പേ॰….
‘‘Idhāvuso, bhikkhu vivicceva kāmehi…pe… paṭhamaṃ jhānaṃ upasampajja viharati. Yathā yathā ca tadāyatanaṃ tathā tathā naṃ kāyena phusitvā viharati, paññāya ca naṃ pajānāti. Ettāvatāpi kho, āvuso, ubhatobhāgavimutto vutto bhagavatā pariyāyena…pe….
‘‘പുന ചപരം, ആവുസോ, ഭിക്ഖു സബ്ബസോ നേവസഞ്ഞാനാസഞ്ഞായതനം സമതിക്കമ്മ സഞ്ഞാവേദയിതനിരോധം ഉപസമ്പജ്ജ വിഹരതി, പഞ്ഞായ ചസ്സ ദിസ്വാ ആസവാ പരിക്ഖീണാ ഹോന്തി. യഥാ യഥാ ച തദായതനം തഥാ തഥാ നം കായേന ഫുസിത്വാ വിഹരതി, പഞ്ഞായ ച നം പജാനാതി. ഏത്താവതാപി ഖോ, ആവുസോ, ഉഭതോഭാഗവിമുത്തോ വുത്തോ ഭഗവതാ നിപ്പരിയായേനാ’’തി. ചതുത്ഥം.
‘‘Puna caparaṃ, āvuso, bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati, paññāya cassa disvā āsavā parikkhīṇā honti. Yathā yathā ca tadāyatanaṃ tathā tathā naṃ kāyena phusitvā viharati, paññāya ca naṃ pajānāti. Ettāvatāpi kho, āvuso, ubhatobhāgavimutto vutto bhagavatā nippariyāyenā’’ti. Catutthaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൪. ഉഭതോഭാഗവിമുത്തസുത്തവണ്ണനാ • 4. Ubhatobhāgavimuttasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൧-൧൦. സമ്ബാധസുത്താദിവണ്ണനാ • 1-10. Sambādhasuttādivaṇṇanā
