| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១០. តិវណ្ដិបុប្ផិយត្ថេរអបទានំ
10. Tivaṇṭipupphiyattheraapadānaṃ
៥៧.
57.
តេសំ និជ្ឈាយមានានំ, បរិឡាហោ អជាយថ។
Tesaṃ nijjhāyamānānaṃ, pariḷāho ajāyatha.
៥៨.
58.
‘‘សុនន្ទោ នាម នាមេន, ពុទ្ធស្ស សាវកោ តទា;
‘‘Sunando nāma nāmena, buddhassa sāvako tadā;
ធម្មទស្សិស្ស មុនិនោ, អាគច្ឆិ មម សន្តិកំ។
Dhammadassissa munino, āgacchi mama santikaṃ.
៥៩.
59.
‘‘យេ មេ ពទ្ធចរា អាសុំ, តេ មេ បុប្ផំ អទុំ តទា;
‘‘Ye me baddhacarā āsuṃ, te me pupphaṃ aduṃ tadā;
តាហំ បុប្ផំ គហេត្វាន, សាវកេ អភិរោបយិំ។
Tāhaṃ pupphaṃ gahetvāna, sāvake abhiropayiṃ.
៦០.
60.
‘‘សោហំ កាលំកតោ តត្ថ, បុនាបិ ឧបបជ្ជហំ;
‘‘Sohaṃ kālaṃkato tattha, punāpi upapajjahaṃ;
អដ្ឋារសេ កប្បសតេ, វិនិបាតំ ន គច្ឆហំ។
Aṭṭhārase kappasate, vinipātaṃ na gacchahaṃ.
៦១.
61.
‘‘តេរសេតោ កប្បសតេ, អដ្ឋាសុំ ធូមកេតុនោ;
‘‘Teraseto kappasate, aṭṭhāsuṃ dhūmaketuno;
សត្តរតនសម្បន្នា, ចក្កវត្តី មហព្ពលា។
Sattaratanasampannā, cakkavattī mahabbalā.
៦២.
62.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា តិវណ្ដិបុប្ផិយោ ថេរោ ឥមា គាថាយោ អភាសិត្ថាតិ;
Itthaṃ sudaṃ āyasmā tivaṇṭipupphiyo thero imā gāthāyo abhāsitthāti;
តិវណ្ដិបុប្ផិយត្ថេរស្សាបទានំ ទសមំ។
Tivaṇṭipupphiyattherassāpadānaṃ dasamaṃ.
កុដជបុប្ផិយវគ្គោ ឯកូនវីសតិមោ។
Kuṭajapupphiyavaggo ekūnavīsatimo.
តស្សុទ្ទានំ –
Tassuddānaṃ –
កុដជោ ពន្ធុជីវី ច, កោដុម្ពរិកហត្ថិយោ;
Kuṭajo bandhujīvī ca, koṭumbarikahatthiyo;
ឥសិមុគ្គោ ច ពោធិ ច, ឯកចិន្តី តិកណ្ណិកោ;
Isimuggo ca bodhi ca, ekacintī tikaṇṇiko;
ឯកចារី តិវណ្ដិ ច, គាថា ទ្វាសដ្ឋិ កិត្តិតាតិ។
Ekacārī tivaṇṭi ca, gāthā dvāsaṭṭhi kittitāti.
Footnotes:
