| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
២០. តមាលបុប្ផិយវគ្គោ
20. Tamālapupphiyavaggo
១. តមាលបុប្ផិយត្ថេរអបទានំ
1. Tamālapupphiyattheraapadānaṃ
១.
1.
‘‘ចុល្លាសីតិសហស្សានិ , ថម្ភា សោវណ្ណយា អហូ;
‘‘Cullāsītisahassāni , thambhā sovaṇṇayā ahū;
ទេវលដ្ឋិបដិភាគំ, វិមានំ មេ សុនិម្មិតំ។
Devalaṭṭhipaṭibhāgaṃ, vimānaṃ me sunimmitaṃ.
២.
2.
‘‘តមាលបុប្ផំ បគ្គយ្ហ, វិប្បសន្នេន ចេតសា;
‘‘Tamālapupphaṃ paggayha, vippasannena cetasā;
ពុទ្ធស្ស អភិរោបយិំ, សិខិនោ លោកពន្ធុនោ។
Buddhassa abhiropayiṃ, sikhino lokabandhuno.
៣.
3.
‘‘ឯកត្តិំសេ ឥតោ កប្បេ, យំ កម្មមករិំ តទា;
‘‘Ekattiṃse ito kappe, yaṃ kammamakariṃ tadā;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
៤.
4.
‘‘ឥតោ វីសតិមេ កប្បេ, ចន្ទតិត្តោតិ ឯកកោ;
‘‘Ito vīsatime kappe, candatittoti ekako;
សត្តរតនសម្បន្នោ, ចក្កវត្តី មហព្ពលោ។
Sattaratanasampanno, cakkavattī mahabbalo.
៥.
5.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា តមាលបុប្ផិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā tamālapupphiyo thero imā gāthāyo abhāsitthāti.
តមាលបុប្ផិយត្ថេរស្សាបទានំ បឋមំ។
Tamālapupphiyattherassāpadānaṃ paṭhamaṃ.
