| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៤១. មេត្តេយ្យវគ្គោ
41. Metteyyavaggo
១. តិស្សមេត្តេយ្យត្ថេរអបទានំ
1. Tissametteyyattheraapadānaṃ
១.
1.
‘‘បព្ភារកូដំ និស្សាយ, សោភិតោ នាម តាបសោ;
‘‘Pabbhārakūṭaṃ nissāya, sobhito nāma tāpaso;
បវត្តផលំ ភុញ្ជិត្វា, វសតិ បព្ពតន្តរេ។
Pavattaphalaṃ bhuñjitvā, vasati pabbatantare.
២.
2.
‘‘អគ្គិំ ទារុំ អាហរិត្វា, ឧជ្ជាលេសិំ អហំ តទា;
‘‘Aggiṃ dāruṃ āharitvā, ujjālesiṃ ahaṃ tadā;
ឧត្តមត្ថំ គវេសន្តោ, ព្រហ្មលោកូបបត្តិយា។
Uttamatthaṃ gavesanto, brahmalokūpapattiyā.
៣.
3.
‘‘បទុមុត្តរោ លោកវិទូ, អាហុតីនំ បដិគ្គហោ;
‘‘Padumuttaro lokavidū, āhutīnaṃ paṭiggaho;
មមុទ្ធរិតុកាមោ សោ, អាគច្ឆិ មម សន្តិកេ។
Mamuddharitukāmo so, āgacchi mama santike.
៤.
4.
‘‘កិំ ករោសិ មហាបុញ្ញ, ទេហិ មេ អគ្គិទារុកំ;
‘‘Kiṃ karosi mahāpuñña, dehi me aggidārukaṃ;
៥.
5.
‘‘សុភទ្ទកោ ត្វំ មនុជេ, ទេវតេ ត្វំ បជានសិ;
‘‘Subhaddako tvaṃ manuje, devate tvaṃ pajānasi;
តុវំ អគ្គិំ បរិចរ, ហន្ទ តេ អគ្គិទារុកំ។
Tuvaṃ aggiṃ paricara, handa te aggidārukaṃ.
៦.
6.
‘‘តតោ កដ្ឋំ គហេត្វាន, អគ្គិំ ឧជ្ជាលយី ជិនោ;
‘‘Tato kaṭṭhaṃ gahetvāna, aggiṃ ujjālayī jino;
ន តត្ថ កដ្ឋំ បជ្ឈាយិ, បាដិហេរំ មហេសិនោ។
Na tattha kaṭṭhaṃ pajjhāyi, pāṭiheraṃ mahesino.
៧.
7.
‘‘ន តេ អគ្គិ បជ្ជលតិ, អាហុតី តេ ន វិជ្ជតិ;
‘‘Na te aggi pajjalati, āhutī te na vijjati;
និរត្ថកំ វតំ តុយ្ហំ, អគ្គិំ បរិចរស្សុ មេ។
Niratthakaṃ vataṃ tuyhaṃ, aggiṃ paricarassu me.
៨.
8.
មយ្ហម្បិ កថយស្សេតំ, ឧភោ បរិចរាមសេ។
Mayhampi kathayassetaṃ, ubho paricarāmase.
៩.
9.
‘‘ហេតុធម្មនិរោធាយ , កិលេសសមណាយ ច;
‘‘Hetudhammanirodhāya , kilesasamaṇāya ca;
ឥស្សាមច្ឆរិយំ ហិត្វា, តយោ ឯតេ មមាហុតី។
Issāmacchariyaṃ hitvā, tayo ete mamāhutī.
១០.
10.
‘‘កីទិសោ ត្វំ មហាវីរ, កថំ គោត្តោសិ មារិស;
‘‘Kīdiso tvaṃ mahāvīra, kathaṃ gottosi mārisa;
អាចារបដិបត្តិ តេ, ពាឡ្ហំ ខោ មម រុច្ចតិ។
Ācārapaṭipatti te, bāḷhaṃ kho mama ruccati.
១១.
11.
‘‘ខត្តិយម្ហិ កុលេ ជាតោ, អភិញ្ញាបារមិំ គតោ;
‘‘Khattiyamhi kule jāto, abhiññāpāramiṃ gato;
សព្ពាសវបរិក្ខីណោ, នត្ថិ ទានិ បុនព្ភវោ។
Sabbāsavaparikkhīṇo, natthi dāni punabbhavo.
១២.
12.
‘‘យទិ ពុទ្ធោសិ សព្ពញ្ញូ, បភង្ករ តមោនុទ;
‘‘Yadi buddhosi sabbaññū, pabhaṅkara tamonuda;
នមស្សិស្សាមិ តំ ទេវ, ទុក្ខស្សន្តករោ តុវំ។
Namassissāmi taṃ deva, dukkhassantakaro tuvaṃ.
១៣.
13.
‘‘បត្ថរិត្វាជិនចម្មំ, និសីទនមទាសហំ;
‘‘Pattharitvājinacammaṃ, nisīdanamadāsahaṃ;
និសីទ នាថ សព្ពញ្ញុ, ឧបដ្ឋិស្សាមហំ តុវំ។
Nisīda nātha sabbaññu, upaṭṭhissāmahaṃ tuvaṃ.
១៤.
14.
‘‘និសីទិ ភគវា តត្ថ, អជិនម្ហិ សុវិត្ថតេ;
‘‘Nisīdi bhagavā tattha, ajinamhi suvitthate;
និមន្តយិត្វា សម្ពុទ្ធំ, បព្ពតំ អគមាសហំ។
Nimantayitvā sambuddhaṃ, pabbataṃ agamāsahaṃ.
១៥.
15.
‘‘ខារិភារញ្ច បូរេត្វា, តិន្ទុកផលមាហរិំ;
‘‘Khāribhārañca pūretvā, tindukaphalamāhariṃ;
មធុនា យោជយិត្វាន, ផលំ ពុទ្ធស្សទាសហំ។
Madhunā yojayitvāna, phalaṃ buddhassadāsahaṃ.
១៦.
16.
‘‘មម និជ្ឈាយមានស្ស, បរិភុញ្ជិ តទា ជិនោ;
‘‘Mama nijjhāyamānassa, paribhuñji tadā jino;
តត្ថ ចិត្តំ បសាទេសិំ, បេក្ខន្តោ លោកនាយកំ។
Tattha cittaṃ pasādesiṃ, pekkhanto lokanāyakaṃ.
១៧.
17.
‘‘បទុមុត្តរោ លោកវិទូ, អាហុតីនំ បដិគ្គហោ;
‘‘Padumuttaro lokavidū, āhutīnaṃ paṭiggaho;
មមស្សមេ និសីទិត្វា, ឥមា គាថា អភាសថ។
Mamassame nisīditvā, imā gāthā abhāsatha.
១៨.
18.
‘‘‘យោ មំ ផលេន តប្បេសិ, បសន្នោ សេហិ បាណិភិ;
‘‘‘Yo maṃ phalena tappesi, pasanno sehi pāṇibhi;
តមហំ កិត្តយិស្សាមិ, សុណាថ មម ភាសតោ។
Tamahaṃ kittayissāmi, suṇātha mama bhāsato.
១៩.
19.
‘‘‘បញ្ចវីសតិក្ខត្តុំ សោ, ទេវរជ្ជំ ករិស្សតិ;
‘‘‘Pañcavīsatikkhattuṃ so, devarajjaṃ karissati;
សហស្សក្ខត្តុំ រាជា ច, ចក្កវត្តី ភវិស្សតិ។
Sahassakkhattuṃ rājā ca, cakkavattī bhavissati.
២០.
20.
‘‘‘តស្ស សង្កប្បមញ្ញាយ, បុព្ពកម្មសមង្គិនោ;
‘‘‘Tassa saṅkappamaññāya, pubbakammasamaṅgino;
អន្នំ បានញ្ច វត្ថញ្ច, សយនញ្ច មហារហំ។
Annaṃ pānañca vatthañca, sayanañca mahārahaṃ.
២១.
21.
‘‘‘បុញ្ញកម្មេន សំយុត្តា, និព្ពត្តិស្សន្តិ តាវទេ;
‘‘‘Puññakammena saṃyuttā, nibbattissanti tāvade;
សទា បមុទិតោ ចាយំ, ភវិស្សតិ អនាមយោ។
Sadā pamudito cāyaṃ, bhavissati anāmayo.
២២.
22.
‘‘‘ឧបបជ្ជតិ យំ យោនិំ, ទេវត្តំ អថ មានុសំ;
‘‘‘Upapajjati yaṃ yoniṃ, devattaṃ atha mānusaṃ;
សព្ពត្ថ សុខិតោ ហុត្វា, មនុស្សត្តំ គមិស្សតិ។
Sabbattha sukhito hutvā, manussattaṃ gamissati.
២៣.
23.
‘‘‘អជ្ឈាយកោ មន្តធរោ, តិណ្ណំ វេទាន បារគូ;
‘‘‘Ajjhāyako mantadharo, tiṇṇaṃ vedāna pāragū;
សម្ពុទ្ធំ ឧបគន្ត្វាន, អរហា សោ ភវិស្សតិ’។
Sambuddhaṃ upagantvāna, arahā so bhavissati’.
២៤.
24.
‘‘យតោ សរាមិ អត្តានំ, យតោ បត្តោស្មិ វិញ្ញុតំ;
‘‘Yato sarāmi attānaṃ, yato pattosmi viññutaṃ;
ភោគេ មេ ឩនតា នត្ថិ, ផលទានស្សិទំ ផលំ។
Bhoge me ūnatā natthi, phaladānassidaṃ phalaṃ.
២៥.
25.
‘‘វរធម្មមនុប្បត្តោ, រាគទោសេ សមូហនិំ;
‘‘Varadhammamanuppatto, rāgadose samūhaniṃ;
សព្ពាសវបរិក្ខីណោ, នត្ថិ ទានិ បុនព្ភវោ។
Sabbāsavaparikkhīṇo, natthi dāni punabbhavo.
២៦.
26.
‘‘កិលេសា ឈាបិតា មយ្ហំ, ភវា សព្ពេ សមូហតា;
‘‘Kilesā jhāpitā mayhaṃ, bhavā sabbe samūhatā;
នាគោវ ពន្ធនំ ឆេត្វា, វិហរាមិ អនាសវោ។
Nāgova bandhanaṃ chetvā, viharāmi anāsavo.
២៧.
27.
‘‘ស្វាគតំ វត មេ អាសិ, មម ពុទ្ធស្ស សន្តិកេ;
‘‘Svāgataṃ vata me āsi, mama buddhassa santike;
តិស្សោ វិជ្ជា អនុប្បត្តា, កតំ ពុទ្ធស្ស សាសនំ។
Tisso vijjā anuppattā, kataṃ buddhassa sāsanaṃ.
២៨.
28.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា តិស្សមេត្តេយ្យោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā tissametteyyo thero imā gāthāyo abhāsitthāti.
តិស្សមេត្តេយ្យត្ថេរស្សាបទានំ បឋមំ។
Tissametteyyattherassāpadānaṃ paṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ១. តិស្សមេត្តេយ្យត្ថេរអបទានវណ្ណនា • 1. Tissametteyyattheraapadānavaṇṇanā
