| Library / Tipiṭaka / তিপিটক • Tipiṭaka / সুত্তনিপাত-অট্ঠকথা • Suttanipāta-aṭṭhakathā |
২. তিস্সমেত্তেয্যসুত্তৰণ্ণনা
2. Tissametteyyasuttavaṇṇanā
১০৪৭. কোধ সন্তুস্সিতোতি তিস্সমেত্তেয্যসুত্তং। কা উপ্পত্তি? সব্বসুত্তানং পুচ্ছাৰসিকা এৰ উপ্পত্তি। তে হি ব্রাহ্মণা ‘‘কতাৰকাসা পুচ্ছৰ্হো’’তি ভগৰতা পৰারিতত্তা অত্তনো অত্তনো সংসযং পুচ্ছিংসু। পুট্ঠো পুট্ঠো চ তেসং ভগৰা ব্যাকাসি। এৰং পুচ্ছাৰসিকানেৰেতানি সুত্তানীতি ৰেদিতব্বানি।
1047.Kodhasantussitoti tissametteyyasuttaṃ. Kā uppatti? Sabbasuttānaṃ pucchāvasikā eva uppatti. Te hi brāhmaṇā ‘‘katāvakāsā pucchavho’’ti bhagavatā pavāritattā attano attano saṃsayaṃ pucchiṃsu. Puṭṭho puṭṭho ca tesaṃ bhagavā byākāsi. Evaṃ pucchāvasikānevetāni suttānīti veditabbāni.
নিট্ঠিতে পন অজিতপঞ্হে ‘‘কথং লোকং অৰেক্খন্তং, মচ্চুরাজা ন পস্সতী’’তি (সু॰ নি॰ ১১২৪; চূল়নি॰ পিঙ্গিযমাণৰপুচ্ছা ১৪৪) এৰং মোঘরাজা পুচ্ছিতুং আরভি। তং ‘‘ন তাৰস্স ইন্দ্রিযানি পরিপাকং গতানী’’তি ঞত্ৰা ভগৰা ‘‘তিট্ঠ ত্ৰং, মোঘরাজ, অঞ্ঞো পুচ্ছতূ’’তি পটিক্খিপি। ততো তিস্সমেত্তেয্যো অত্তনো সংসযং পুচ্ছন্তো ‘‘কোধা’’তি গাথমাহ। তত্থ কোধ সন্তুস্সিতোতি কো ইধ তুট্ঠো। ইঞ্জিতাতি তণ্হাদিট্ঠিৰিপ্ফন্দিতানি। উভন্তমভিঞ্ঞাযাতি উভো অন্তে অভিজানিত্ৰা। মন্তা ন লিপ্পতীতি পঞ্ঞায ন লিপ্পতি।
Niṭṭhite pana ajitapañhe ‘‘kathaṃ lokaṃ avekkhantaṃ, maccurājā na passatī’’ti (su. ni. 1124; cūḷani. piṅgiyamāṇavapucchā 144) evaṃ mogharājā pucchituṃ ārabhi. Taṃ ‘‘na tāvassa indriyāni paripākaṃ gatānī’’ti ñatvā bhagavā ‘‘tiṭṭha tvaṃ, mogharāja, añño pucchatū’’ti paṭikkhipi. Tato tissametteyyo attano saṃsayaṃ pucchanto ‘‘kodhā’’ti gāthamāha. Tattha kodha santussitoti ko idha tuṭṭho. Iñjitāti taṇhādiṭṭhivipphanditāni. Ubhantamabhiññāyāti ubho ante abhijānitvā. Mantā na lippatīti paññāya na lippati.
১০৪৮-৯. তস্সেতমত্থং ব্যাকরোন্তো ভগৰা ‘‘কামেসূ’’তি গাথাদ্ৰযমাহ। তত্থ কামেসু ব্রহ্মচরিযৰাতি কামনিমিত্তং ব্রহ্মচরিযৰা, কামেসু আদীনৰং দিস্ৰা মগ্গব্রহ্মচরিযেন সমন্নাগতোতি ৰুত্তং হোতি। এত্তাৰতা সন্তুসিতং দস্সেতি, ‘‘ৰীততণ্হো’’তিআদীহি অনিঞ্জিতং । তত্থ সঙ্খায নিব্বুতোতি অনিচ্চাদিৰসেন ধম্মে ৰীমংসিত্ৰা রাগাদিনিব্বানেন নিব্বুতো। সেসং তত্থ তত্থ ৰুত্তনযত্তা পাকটমেৰ।
1048-9. Tassetamatthaṃ byākaronto bhagavā ‘‘kāmesū’’ti gāthādvayamāha. Tattha kāmesu brahmacariyavāti kāmanimittaṃ brahmacariyavā, kāmesu ādīnavaṃ disvā maggabrahmacariyena samannāgatoti vuttaṃ hoti. Ettāvatā santusitaṃ dasseti, ‘‘vītataṇho’’tiādīhi aniñjitaṃ . Tattha saṅkhāya nibbutoti aniccādivasena dhamme vīmaṃsitvā rāgādinibbānena nibbuto. Sesaṃ tattha tattha vuttanayattā pākaṭameva.
এৰং ভগৰা ইমম্পি সুত্তং অরহত্তনিকূটেনেৰ দেসেসি। দেসনাপরিযোসানে অযম্পি ব্রাহ্মণো অরহত্তে পতিট্ঠাসি সদ্ধিং অন্তেৰাসিসহস্সেন, অঞ্ঞেসঞ্চ অনেকসহস্সানং ধম্মচক্খুং উদপাদি। সেসং পুব্বসদিসমেৰাতি।
Evaṃ bhagavā imampi suttaṃ arahattanikūṭeneva desesi. Desanāpariyosāne ayampi brāhmaṇo arahatte patiṭṭhāsi saddhiṃ antevāsisahassena, aññesañca anekasahassānaṃ dhammacakkhuṃ udapādi. Sesaṃ pubbasadisamevāti.
পরমত্থজোতিকায খুদ্দক-অট্ঠকথায
Paramatthajotikāya khuddaka-aṭṭhakathāya
সুত্তনিপাত-অট্ঠকথায তিস্সমেত্তেয্যসুত্তৰণ্ণনা নিট্ঠিতা।
Suttanipāta-aṭṭhakathāya tissametteyyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / সুত্তনিপাতপাল়ি • Suttanipātapāḷi / ২. তিস্সমেত্তেয্যমাণৰপুচ্ছা • 2. Tissametteyyamāṇavapucchā
