6. Tipupphiyattheraapadānaṃ

31.

‘‘Migaluddo pure āsiṃ, araññe kānane ahaṃ ²;

Pāṭaliṃ haritaṃ disvā, tīṇi pupphāni okiriṃ.

32.

‘‘Patitapattāni ⁴ gaṇhitvā, bahi chaḍḍesahaṃ tadā;

Antosuddhaṃ bahisuddhaṃ, suvimuttaṃ anāsavaṃ.

33.

‘‘Sammukhā viya sambuddhaṃ, vipassiṃ lokanāyakaṃ;

Pāṭaliṃ abhivādetvā, tattha kālaṅkato ahaṃ.

34.

‘‘Ekanavutito kappe, yaṃ bodhimabhipūjayiṃ;

Duggatiṃ nābhijānāmi, bodhipūjāyidaṃ phalaṃ.

35.

‘‘Samantapāsādikā nāma, terasāsiṃsu rājino;

Ito tettiṃsakappamhi ⁶, cakkavattī mahabbalā.

36.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tipupphiyo thero imā gāthāyo abhāsitthāti.

Tipupphiyattherassāpadānaṃ chaṭṭhaṃ.