10. Tipadumiyattheraapadānaṃ

48.

‘‘Padumuttaro nāma jino, sabbadhammāna pāragū;

Danto dantaparivuto, nagarā nikkhamī tadā.

49.

‘‘Nagare haṃsavatiyaṃ, ahosiṃ māliko tadā;

Yaṃ tattha uttamaṃ toṇi, padmapupphāni ² aggahiṃ.

50.

‘‘Addasaṃ virajaṃ buddhaṃ, paṭimaggantarāpaṇe;

Saha ⁴ disvāna sambuddhaṃ, evaṃ cintesahaṃ tadā.

51.

‘‘Kiṃ me imehi pupphehi, rañño upanitehi me;

Gāmaṃ vā gāmakhettaṃ vā, sahassaṃ vā labheyyahaṃ.

52.

‘‘Adantadamanaṃ vīraṃ, sabbasattasukhāvahaṃ;

Lokanāthaṃ pūjayitvā, lacchāmi amataṃ dhanaṃ.

53.

‘‘Evāhaṃ cintayitvāna, sakaṃ cittaṃ pasādayiṃ;

Tīṇi lohitake gayha, ākāse ukkhipiṃ tadā.

54.

‘‘Mayā ukkhittamattamhi, ākāse patthariṃsu te;

Dhāriṃsu matthake tattha, uddhaṃvaṇṭā adhomukhā.

55.

‘‘Ye keci manujā disvā, ukkuṭṭhiṃ sampavattayuṃ;

Devatā antalikkhamhi, sādhukāraṃ pavattayuṃ.

56.

‘‘Accheraṃ loke uppannaṃ, buddhaseṭṭhassa vāhasā;

Sabbe dhammaṃ suṇissāma, pupphānaṃ vāhasā mayaṃ.

57.

‘‘Padumuttaro lokavidū, āhutīnaṃ paṭiggaho;

Vīthiyañhi ṭhito santo, imā gāthā abhāsatha.

58.

‘‘‘Yo so buddhaṃ apūjesi, rattapadmehi ⁶ māṇavo;

Tamahaṃ kittayissāmi, suṇātha mama bhāsato.

59.

‘‘‘Tiṃsakappasahassāni, devaloke ramissati;

Tiṃsakappāni ⁸ devindo, devarajjaṃ karissati.

60.

‘‘‘Mahāvitthārikaṃ nāma, byamhaṃ hessati tāvade;

Tiyojanasatubbiddhaṃ, diyaḍḍhasatavitthataṃ.

61.

‘‘‘Cattārisatasahassāni , niyyūhā ca sumāpitā;

Kūṭāgāravarūpetā, mahāsayanamaṇḍitā.

62.

‘‘‘Koṭisatasahassiyo , parivāressanti accharā;

Kusalā naccagītassa, vāditepi padakkhiṇā.

63.

‘‘‘Etādise byamhavare, nārīgaṇasamākule;

Vassissati pupphavasso, dibbo ¹⁰ lohitako sadā.

64.

‘‘‘Bhittikhīle nāgadante, dvārabāhāya toraṇe;

Cakkamattā lohitakā, olambissanti tāvade.

65.

‘‘‘Pattena pattasañchanne, antobyamhavare imaṃ;

Attharitvā pārupitvā, tuvaṭṭissanti tāvade.

66.

‘‘‘Bhavanaṃ parivāretvā, samantā satayojane;

Tepi padmā ¹² lohitakā, dibbagandhaṃ pavāyare.

67.

‘‘‘Pañcasattatikkhattuñca, cakkavattī bhavissati;

Padesarajjaṃ vipulaṃ, gaṇanāto asaṅkhiyaṃ.

68.

‘‘‘Sampattiyo duve bhutvā, anīti anupaddavo;

Sampatte pariyosāne, nibbānaṃ pāpuṇissati’ ¹⁴.

69.

‘‘Sudiṭṭho vata me buddho, vāṇijjaṃ supayojitaṃ;

Padmāni tīṇi pūjetvā, anubhosiṃ tisampadā ¹⁶.

70.

‘‘Ajja me dhammappattassa, vippamuttassa sabbaso;

Supupphitaṃ lohitakaṃ, dhārayissati matthake.

71.

‘‘Mama kammaṃ kathentassa, padumuttarasatthuno;

Satapāṇasahassānaṃ, dhammābhisamayo ahu.

72.

‘‘Satasahassito kappe, yaṃ buddhamabhipūjayiṃ;

Duggatiṃ nābhijānāmi, tipadumānidaṃ phalaṃ.

73.

‘‘Kilesā jhāpitā mayhaṃ, bhavā sabbe samūhatā;

Sabbāsavā parikkhīṇā, natthi dāni punabbhavo.

74.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tipadumiyo thero imā gāthāyo abhāsitthāti.

Tipadumiyattherassāpadānaṃ dasamaṃ.

Nāgasamālavaggo aṭṭhamo.

Tassuddānaṃ –

Nāgasamālo padasaññī, saññakāluvadāyako;

Ekasaññī tiṇasanthāro, sūcipāṭalipupphiyo;

Ṭhitañjalī tipadumī, gāthāyo pañcasattati.