9. Timiravaggo

1. Timirapupphiyattheraapadānaṃ

1.

‘‘Candabhāgānadītīre , anusotaṃ vajāmahaṃ;

Nisinnaṃ samaṇaṃ disvā, vippasannamanāvilaṃ.

2.

‘‘Tattha cittaṃ pasādetvā ², evaṃ cintesahaṃ tadā;

Tārayissati tiṇṇoyaṃ, dantoyaṃ damayissati.

3.

‘‘Assāsissati assattho, santo ca samayissati;

Mocayissati mutto ca, nibbāpessati nibbuto.

4.

‘‘Evāhaṃ cintayitvāna, siddhatthassa mahesino;

Gahetvā timirapupphaṃ, matthake okiriṃ ahaṃ ⁴.

5.

‘‘Añjaliṃ paggahetvāna, katvā ca naṃ padakkhiṇaṃ;

Vanditvā satthuno pāde, pakkāmiṃ aparaṃ disaṃ.

6.

‘‘Aciraṃ gatamattaṃ maṃ, migarājā viheṭhayi;

Papātamanugacchanto, tattheva papatiṃ ahaṃ.

7.

‘‘Catunnavutito kappe, yaṃ pupphamabhiropayiṃ;

Duggatiṃ nābhijānāmi, pupphapūjāyidaṃ ⁶ phalaṃ.

8.

‘‘Chappaññāsamhi kappamhi, sattevāsuṃ mahāyasā ⁸;

Sattaratanasampannā, cakkavattī mahabbalā.

9.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā timirapupphiyo thero imā gāthāyo abhāsitthāti.

Timirapupphiyattherassāpadānaṃ paṭhamaṃ.