| Library / Tipiṭaka / तिपिटक • Tipiṭaka / अपदानपाळि • Apadānapāḷi |
३. तीणुप्पलमालियत्थेरअपदानं
3. Tīṇuppalamāliyattheraapadānaṃ
१३.
13.
‘‘चन्दभागानदीतीरे , अहोसिं वानरो तदा।
‘‘Candabhāgānadītīre , ahosiṃ vānaro tadā;
अद्दसं विरजं बुद्धं, निसिन्नं पब्बतन्तरे॥
Addasaṃ virajaṃ buddhaṃ, nisinnaṃ pabbatantare.
१४.
14.
‘‘ओभासेन्तं दिसा सब्बा, सालराजंव फुल्लितं।
‘‘Obhāsentaṃ disā sabbā, sālarājaṃva phullitaṃ;
लक्खणब्यञ्जनूपेतं, दिस्वानत्तमनो अहं॥
Lakkhaṇabyañjanūpetaṃ, disvānattamano ahaṃ.
१५.
15.
‘‘उदग्गचित्तो सुमनो, पीतिया हट्ठमानसो।
‘‘Udaggacitto sumano, pītiyā haṭṭhamānaso;
तीणि उप्पलपुप्फानि, मत्थके अभिरोपयिं॥
Tīṇi uppalapupphāni, matthake abhiropayiṃ.
१६.
16.
‘‘पूजयित्वान पुप्फानि, फुस्सस्साहं महेसिनो।
‘‘Pūjayitvāna pupphāni, phussassāhaṃ mahesino;
सगारवो भवित्वान, पक्कामिं उत्तरामुखो॥
Sagāravo bhavitvāna, pakkāmiṃ uttarāmukho.
१७.
17.
‘‘गच्छन्तो पटिकुटिको, विप्पसन्नेन चेतसा।
‘‘Gacchanto paṭikuṭiko, vippasannena cetasā;
सेलन्तरे पतित्वान, पापुणिं जीवितक्खयं॥
Selantare patitvāna, pāpuṇiṃ jīvitakkhayaṃ.
१८.
18.
‘‘तेन कम्मेन सुकतेन, चेतनापणिधीहि च।
‘‘Tena kammena sukatena, cetanāpaṇidhīhi ca;
जहित्वा पुरिमं जातिं, तावतिंसमगच्छहं॥
Jahitvā purimaṃ jātiṃ, tāvatiṃsamagacchahaṃ.
१९.
19.
‘‘सतानं तीणिक्खत्तुञ्च, देवरज्जमकारयिं।
‘‘Satānaṃ tīṇikkhattuñca, devarajjamakārayiṃ;
सतानं पञ्चक्खत्तुञ्च, चक्कवत्ती अहोसहं॥
Satānaṃ pañcakkhattuñca, cakkavattī ahosahaṃ.
२०.
20.
‘‘द्वेनवुते इतो कप्पे, यं पुप्फमभिपूजयिं।
‘‘Dvenavute ito kappe, yaṃ pupphamabhipūjayiṃ;
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
२१.
21.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा तीणुप्पलमालियो थेरो इमा गाथायो अभासित्थाति।
Itthaṃ sudaṃ āyasmā tīṇuppalamāliyo thero imā gāthāyo abhāsitthāti.
तीणुप्पलमालियत्थेरस्सापदानं ततियं।
Tīṇuppalamāliyattherassāpadānaṃ tatiyaṃ.
