7. Tiṇakuṭidāyakattheraapadānaṃ

74.

‘‘Nagare bandhumatiyā, ahosiṃ parakammiko;

Parakammāyane yutto, parabhattaṃ apassito.

75.

‘‘Rahogato nisīditvā, evaṃ cintesahaṃ tadā;

Buddho loke samuppanno, adhikāro ca natthi me.

76.

‘‘Kālo me gatiṃ ² sodhetuṃ, khaṇo me paṭipādito;

Dukkho nirayasamphasso, apuññānañhi pāṇinaṃ.

77.

‘‘Evāhaṃ cintayitvāna, kammasāmiṃ upāgamiṃ;

Ekāhaṃ kammaṃ yācitvā, vipinaṃ pāvisiṃ ahaṃ.

78.

‘‘Tiṇakaṭṭhañca valliñca, āharitvānahaṃ tadā;

Tidaṇḍake ṭhapetvāna, akaṃ tiṇakuṭiṃ ahaṃ.

79.

‘‘Saṅghassatthāya kuṭikaṃ, niyyādetvāna ⁴ taṃ ahaṃ;

Tadaheyeva āgantvā, kammasāmiṃ upāgamiṃ.

80.

‘‘Tena kammena sukatena, tāvatiṃsamagacchahaṃ;

Tattha me sukataṃ byamhaṃ, kuṭikāya sunimmitaṃ ⁶.

81.

‘‘Sahassakaṇḍaṃ satabheṇḍu, dhajālu haritāmayaṃ;

Satasahassaniyyūhā, byamhe pātubhaviṃsu me.

82.

‘‘Yaṃ yaṃ yonupapajjāmi, devattaṃ atha mānusaṃ;

Mama saṅkappamaññāya, pāsādo upatiṭṭhati.

83.

‘‘Bhayaṃ vā chambhitattaṃ vā, lomahaṃso na vijjati;

Tāsaṃ mama na jānāmi, tiṇakuṭikāyidaṃ ⁸ phalaṃ.

84.

‘‘Sīhabyagghā ca dīpī ca, acchakokataracchakā ¹⁰;

Sabbe maṃ parivajjenti, tiṇakuṭikāyidaṃ phalaṃ.

85.

‘‘Sarīsapā ¹² ca bhūtā ca, ahī kumbhaṇḍarakkhasā;

Tepi maṃ parivajjenti, tiṇakuṭikāyidaṃ phalaṃ.

86.

‘‘Na pāpasupinassāpi, sarāmi dassanaṃ mama;

Upaṭṭhitā sati mayhaṃ, tiṇakuṭikāyidaṃ phalaṃ.

87.

‘‘Tāyeva tiṇakuṭikāya, anubhotvāna sampadā;

Gotamassa bhagavato, dhammaṃ sacchikariṃ ahaṃ.

88.

‘‘Ekanavutito kappe, yaṃ kammamakariṃ tadā;

Duggatiṃ nābhijānāmi, tiṇakuṭikāyidaṃ phalaṃ.

89.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tiṇakuṭidāyako thero imā gāthāyo abhāsitthāti.

Tiṇakuṭidāyakattherassāpadānaṃ sattamaṃ.