| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. থেরপটিসন্দহনাপটিসন্দহনপঞ্হো
7. Therapaṭisandahanāpaṭisandahanapañho
৭. রাজা আহ ‘‘ভন্তে নাগসেন, ত্ৰং পন পটিসন্দহিস্সসী’’তি? ‘‘অলং, মহারাজ, কিং তে তেন পুচ্ছিতেন, ননু মযা পটিকচ্চেৰ অক্খাতং ‘সচে, মহারাজ, সউপাদানো ভৰিস্সামি , পটিসন্দহিস্সামি, সচে অনুপাদানো ভৰিস্সামি, ন পটিসন্দহিস্সামী’’’তি।
7. Rājā āha ‘‘bhante nāgasena, tvaṃ pana paṭisandahissasī’’ti? ‘‘Alaṃ, mahārāja, kiṃ te tena pucchitena, nanu mayā paṭikacceva akkhātaṃ ‘sace, mahārāja, saupādāno bhavissāmi , paṭisandahissāmi, sace anupādāno bhavissāmi, na paṭisandahissāmī’’’ti.
‘‘ওপম্মং করোহী’’তি। ‘‘যথা, মহারাজ, কোচিদেৰ পুরিসো রঞ্ঞো অধিকারং করেয্য। রাজা তুট্ঠো অধিকারং দদেয্য, সো তেন অধিকারেন পঞ্চহি কামগুণেহি সমপ্পিতো সমঙ্গিভূতো পরিচরেয্য, সো চে জনস্স আরোচেয্য ‘ন মে রাজা কিঞ্চি পটিকরোতী’ তি। কিং নু খো সো, মহারাজ, পুরিসো যুত্তকারী ভৰেয্যা’’তি? ‘‘ন হি ভন্তে’’তি। ‘‘এৰমেৰ খো, মহারাজ , কিং তে তেন পুচ্ছিতেন, ননু মযা পটিকচ্চেৰ অক্খাতং ‘সচে সউপাদানো ভৰিস্সামি, পটিসন্দহিস্সামি, সচে অনুপাদানো ভৰিস্সামি, ন পটিসন্দহিস্সামী’’’তি।
‘‘Opammaṃ karohī’’ti. ‘‘Yathā, mahārāja, kocideva puriso rañño adhikāraṃ kareyya. Rājā tuṭṭho adhikāraṃ dadeyya, so tena adhikārena pañcahi kāmaguṇehi samappito samaṅgibhūto paricareyya, so ce janassa āroceyya ‘na me rājā kiñci paṭikarotī’ ti. Kiṃ nu kho so, mahārāja, puriso yuttakārī bhaveyyā’’ti? ‘‘Na hi bhante’’ti. ‘‘Evameva kho, mahārāja , kiṃ te tena pucchitena, nanu mayā paṭikacceva akkhātaṃ ‘sace saupādāno bhavissāmi, paṭisandahissāmi, sace anupādāno bhavissāmi, na paṭisandahissāmī’’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
থেরপটিসন্দহনাপটিসন্দহনপঞ্হো সত্তমো।
Therapaṭisandahanāpaṭisandahanapañho sattamo.
