| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৮. নামরূপপটিসন্দহনপঞ্হো
8. Nāmarūpapaṭisandahanapañho
৮. রাজা আহ ‘‘ভন্তে নাগসেন, যং পনেতং ব্রূসি ‘নামরূপ’ন্তি, তত্থ কতমং নামং, কতমং রূপ’’ন্তি। ‘‘যং তত্থ, মহারাজ, ওল়ারিকং, এতং রূপং, যে তত্থ সুখুমা চিত্তচেতসিকা ধম্মা, এতং নাম’’ন্তি। ‘‘ভন্তে নাগসেন, কেন কারণেন নামং যেৰ ন পটিসন্দহতি, রূপং যেৰ ৰা’’তি? ‘‘অঞ্ঞমঞ্ঞূপনিস্সিতা, মহারাজ, এতে ধম্মা একতোৰ উপ্পজ্জন্তী’’তি।
8. Rājā āha ‘‘bhante nāgasena, yaṃ panetaṃ brūsi ‘nāmarūpa’nti, tattha katamaṃ nāmaṃ, katamaṃ rūpa’’nti. ‘‘Yaṃ tattha, mahārāja, oḷārikaṃ, etaṃ rūpaṃ, ye tattha sukhumā cittacetasikā dhammā, etaṃ nāma’’nti. ‘‘Bhante nāgasena, kena kāraṇena nāmaṃ yeva na paṭisandahati, rūpaṃ yeva vā’’ti? ‘‘Aññamaññūpanissitā, mahārāja, ete dhammā ekatova uppajjantī’’ti.
‘‘ওপম্মং করোহী’’তি। ‘‘যথা, মহারাজ, কুক্কুটিযা কললং ন ভৰেয্য, অণ্ডম্পি ন ভৰেয্য, যঞ্চ তত্থ কললং, যঞ্চ অণ্ডং, উভোপেতে অঞ্ঞমঞ্ঞূপনিস্সিতা, একতোৰ নেসং উপ্পত্তি হোতি। এৰমেৰ খো, মহারাজ, যদি তত্থ নামং ন ভৰেয্য, রূপম্পি ন ভৰেয্য, যঞ্চেৰ তত্থ নামং, যঞ্চেৰ রূপং, উভোপেতে অঞ্ঞমঞ্ঞূপনিস্সিতা, একতোৰ নেসং উপ্পত্তি হোতি। এৰমেতং দীঘমদ্ধানং সন্ধাৰিত’’ন্তি।
‘‘Opammaṃ karohī’’ti. ‘‘Yathā, mahārāja, kukkuṭiyā kalalaṃ na bhaveyya, aṇḍampi na bhaveyya, yañca tattha kalalaṃ, yañca aṇḍaṃ, ubhopete aññamaññūpanissitā, ekatova nesaṃ uppatti hoti. Evameva kho, mahārāja, yadi tattha nāmaṃ na bhaveyya, rūpampi na bhaveyya, yañceva tattha nāmaṃ, yañceva rūpaṃ, ubhopete aññamaññūpanissitā, ekatova nesaṃ uppatti hoti. Evametaṃ dīghamaddhānaṃ sandhāvita’’nti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
নামরূপপটিসন্দহনপঞ্হো অট্ঠমো।
Nāmarūpapaṭisandahanapañho aṭṭhamo.
