| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৯. অদ্ধানপঞ্হো
9. Addhānapañho
৯. রাজা আহ ‘‘ভন্তে নাগসেন, যং পনেতং ব্রূসি ‘দীঘমদ্ধান’ন্তি, কিমেতং অদ্ধানং নামা’’তি ? ‘‘অতীতো, মহারাজ, অদ্ধা, অনাগতো অদ্ধা, পচ্চুপ্পন্নো অদ্ধা’’তি। ‘‘কিং পন, ভন্তে, সব্বে অদ্ধা অত্থী’’তি? ‘‘কোচি, মহারাজ , অদ্ধা অত্থি, কোচি নত্থী’’তি। ‘‘কতমো পন, ভন্তে, অত্থি, কতমো নত্থী’’তি? ‘‘যে তে, মহারাজ, সঙ্খারা অতীতা ৰিগতা নিরুদ্ধা ৰিপরিণতা, সো অদ্ধা নত্থি, যে ধম্মা ৰিপাকা, যে চ ৰিপাকধম্মধম্মা, যে চ অঞ্ঞত্র পটিসন্ধিং দেন্তি, সো অদ্ধা অত্থি। যে সত্তা কালঙ্কতা অঞ্ঞত্র উপ্পন্না, সো চ অদ্ধা অত্থি। যে সত্তা কালঙ্কতা অঞ্ঞত্র অনুপ্পন্না, সো অদ্ধা নত্থি। যে চ সত্তা পরিনিব্বুতা, সো চ অদ্ধা নত্থি পরিনিব্বুতত্তা’’তি।
9. Rājā āha ‘‘bhante nāgasena, yaṃ panetaṃ brūsi ‘dīghamaddhāna’nti, kimetaṃ addhānaṃ nāmā’’ti ? ‘‘Atīto, mahārāja, addhā, anāgato addhā, paccuppanno addhā’’ti. ‘‘Kiṃ pana, bhante, sabbe addhā atthī’’ti? ‘‘Koci, mahārāja , addhā atthi, koci natthī’’ti. ‘‘Katamo pana, bhante, atthi, katamo natthī’’ti? ‘‘Ye te, mahārāja, saṅkhārā atītā vigatā niruddhā vipariṇatā, so addhā natthi, ye dhammā vipākā, ye ca vipākadhammadhammā, ye ca aññatra paṭisandhiṃ denti, so addhā atthi. Ye sattā kālaṅkatā aññatra uppannā, so ca addhā atthi. Ye sattā kālaṅkatā aññatra anuppannā, so addhā natthi. Ye ca sattā parinibbutā, so ca addhā natthi parinibbutattā’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
অদ্ধানপঞ্হো নৰমো।
Addhānapañho navamo.
অদ্ধানৰগ্গো দুতিযো।
Addhānavaggo dutiyo.
ইমস্মিং ৰগ্গে নৰ পঞ্হা।
Imasmiṃ vagge nava pañhā.
