| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৮. ঠানসুত্তং
8. Ṭhānasuttaṃ
৩১১. ‘‘পঞ্চিমানি , ভিক্খৰে, ঠানানি দুল্লভানি অকতপুঞ্ঞেন মাতুগামেন। কতমানি পঞ্চ? পতিরূপে কুলে জাযেয্যন্তি – ইদং, ভিক্খৰে, পঠমং ঠানং দুল্লভং অকতপুঞ্ঞেন মাতুগামেন। পতিরূপে কুলে জাযিত্ৰা পতিরূপং কুলং গচ্ছেয্যন্তি – ইদং, ভিক্খৰে, দুতিযং ঠানং দুল্লভং অকতপুঞ্ঞেন মাতুগামেন। পতিরূপে কুলে জাযিত্ৰা, পতিরূপং কুলং গন্ত্ৰা, অসপত্তি অগারং অজ্ঝাৰসেয্যন্তি – ইদং, ভিক্খৰে, ততিযং ঠানং দুল্লভং অকতপুঞ্ঞেন মাতুগামেন। পতিরূপে কুলে জাযিত্ৰা, পতিরূপং কুলং গন্ত্ৰা, অসপত্তি অগারং অজ্ঝাৰসন্তী পুত্তৰতী অস্সন্তি – ইদং, ভিক্খৰে, চতুত্থং ঠানং দুল্লভং অকতপুঞ্ঞেন মাতুগামেন। পতিরূপে কুলে জাযিত্ৰা, পতিরূপং কুলং গন্ত্ৰা, অসপত্তি অগারং অজ্ঝাৰসন্তী পুত্তৰতী সমানা সামিকং অভিভুয্য ৰত্তেয্যন্তি – ইদং, ভিক্খৰে, পঞ্চমং ঠানং দুল্লভং অকতপুঞ্ঞেন মাতুগামেন । ইমানি খো, ভিক্খৰে, পঞ্চ ঠানানি দুল্লভানি অকতপুঞ্ঞেন মাতুগামেনাতি।
311. ‘‘Pañcimāni , bhikkhave, ṭhānāni dullabhāni akatapuññena mātugāmena. Katamāni pañca? Patirūpe kule jāyeyyanti – idaṃ, bhikkhave, paṭhamaṃ ṭhānaṃ dullabhaṃ akatapuññena mātugāmena. Patirūpe kule jāyitvā patirūpaṃ kulaṃ gaccheyyanti – idaṃ, bhikkhave, dutiyaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvaseyyanti – idaṃ, bhikkhave, tatiyaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvasantī puttavatī assanti – idaṃ, bhikkhave, catutthaṃ ṭhānaṃ dullabhaṃ akatapuññena mātugāmena. Patirūpe kule jāyitvā, patirūpaṃ kulaṃ gantvā, asapatti agāraṃ ajjhāvasantī puttavatī samānā sāmikaṃ abhibhuyya vatteyyanti – idaṃ, bhikkhave, pañcamaṃ ṭhānaṃ dullabhaṃ akatapuññena mātugāmena . Imāni kho, bhikkhave, pañca ṭhānāni dullabhāni akatapuññena mātugāmenāti.
‘‘পঞ্চিমানি, ভিক্খৰে, ঠানানি সুলভানি কতপুঞ্ঞেন মাতুগামেন। কতমানি পঞ্চ? পতিরূপে কুলে জাযেয্যন্তি – ইদং, ভিক্খৰে, পঠমং ঠানং সুলভং কতপুঞ্ঞেন মাতুগামেন। পতিরূপে কুলে জাযিত্ৰা পতিরূপং কুলং গচ্ছেয্যন্তি – ইদং, ভিক্খৰে, দুতিযং ঠানং সুলভং কতপুঞ্ঞেন মাতুগামেন। পতিরূপে কুলে জাযিত্ৰা পতিরূপং কুলং গন্ত্ৰা অসপত্তি অগারং অজ্ঝাৰসেয্যন্তি – ইদং, ভিক্খৰে, ততিযং ঠানং সুলভং কতপুঞ্ঞেন মাতুগামেন। পতিরূপে কুলে জাযিত্ৰা পতিরূপং কুলং গন্ত্ৰা অসপত্তি অগারং অজ্ঝাৰসন্তী পুত্তৰতী অস্সন্তি – ইদং, ভিক্খৰে, চতুত্থং ঠানং সুলভং কতপুঞ্ঞেন মাতুগামেন। পতিরূপে কুলে জাযিত্ৰা পতিরূপং কুলং গন্ত্ৰা অসপত্তি অগারং অজ্ঝাৰসন্তী পুত্তৰতী সমানা সামিকং অভিভুয্য ৰত্তেয্যন্তি – ইদং, ভিক্খৰে, পঞ্চমং ঠানং সুলভং কতপুঞ্ঞেন মাতুগামেন। ইমানি খো, ভিক্খৰে, পঞ্চ ঠানানি সুলভানি কতপুঞ্ঞেন মাতুগামেনা’’তি। অট্ঠমং।
‘‘Pañcimāni, bhikkhave, ṭhānāni sulabhāni katapuññena mātugāmena. Katamāni pañca? Patirūpe kule jāyeyyanti – idaṃ, bhikkhave, paṭhamaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gaccheyyanti – idaṃ, bhikkhave, dutiyaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvaseyyanti – idaṃ, bhikkhave, tatiyaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvasantī puttavatī assanti – idaṃ, bhikkhave, catutthaṃ ṭhānaṃ sulabhaṃ katapuññena mātugāmena. Patirūpe kule jāyitvā patirūpaṃ kulaṃ gantvā asapatti agāraṃ ajjhāvasantī puttavatī samānā sāmikaṃ abhibhuyya vatteyyanti – idaṃ, bhikkhave, pañcamaṃ ṭhānaṃ sulabhaṃ katapuññena mātugāmena. Imāni kho, bhikkhave, pañca ṭhānāni sulabhāni katapuññena mātugāmenā’’ti. Aṭṭhamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-১০. পসয্হসুত্তাদিৰণ্ণনা • 2-10. Pasayhasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২-১০. পসয্হসুত্তাদিৰণ্ণনা • 2-10. Pasayhasuttādivaṇṇanā
