| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৩. তেজঙ্গপঞ্হো
3. Tejaṅgapañho
৩. ‘‘ভন্তে নাগসেন, ‘তেজস্স পঞ্চ অঙ্গানি গহেতব্বানী’তি যং ৰদেসি, কতমানি তানি পঞ্চ অঙ্গানি গহেতব্বানী’’তি? ‘‘যথা, মহারাজ, তেজো তিণকট্ঠসাখাপলাসং ডহতি, এৰমেৰ খো, মহারাজ, যোগিনা যোগাৰচরেন যে তে অব্ভন্তরা ৰা বাহিরা ৰা কিলেসা ইট্ঠানিট্ঠারম্মণানুভৰনা, সব্বে তে ঞাণগ্গিনা ডহিতব্বা। ইদং, মহারাজ, তেজস্স পঠমং অঙ্গং গহেতব্বং।
3. ‘‘Bhante nāgasena, ‘tejassa pañca aṅgāni gahetabbānī’ti yaṃ vadesi, katamāni tāni pañca aṅgāni gahetabbānī’’ti? ‘‘Yathā, mahārāja, tejo tiṇakaṭṭhasākhāpalāsaṃ ḍahati, evameva kho, mahārāja, yoginā yogāvacarena ye te abbhantarā vā bāhirā vā kilesā iṭṭhāniṭṭhārammaṇānubhavanā, sabbe te ñāṇagginā ḍahitabbā. Idaṃ, mahārāja, tejassa paṭhamaṃ aṅgaṃ gahetabbaṃ.
‘‘পুন চপরং, মহারাজ, তেজো নিদ্দযো অকারুণিকো, এৰমেৰ খো, মহারাজ, যোগিনা যোগাৰচরেন সব্বকিলেসেসু কারুঞ্ঞানুদ্দযা ন কাতব্বা। ইদং, মহারাজ, তেজস্স দুতিযং অঙ্গং গহেতব্বং।
‘‘Puna caparaṃ, mahārāja, tejo niddayo akāruṇiko, evameva kho, mahārāja, yoginā yogāvacarena sabbakilesesu kāruññānuddayā na kātabbā. Idaṃ, mahārāja, tejassa dutiyaṃ aṅgaṃ gahetabbaṃ.
‘‘পুন চপরং, মহারাজ, তেজো সীতং পটিহনতি, এৰমেৰ খো, মহারাজ, যোগিনা যোগাৰচরেন ৰীরিযসন্তাপতেজং অভিজনেত্ৰা কিলেসা পটিহন্তব্বা। ইদং, মহারাজ, তেজস্স ততিযং অঙ্গং গহেতব্বং।
‘‘Puna caparaṃ, mahārāja, tejo sītaṃ paṭihanati, evameva kho, mahārāja, yoginā yogāvacarena vīriyasantāpatejaṃ abhijanetvā kilesā paṭihantabbā. Idaṃ, mahārāja, tejassa tatiyaṃ aṅgaṃ gahetabbaṃ.
‘‘পুন চপরং, মহারাজ, তেজো অনুনযপ্পটিঘৰিপ্পমুত্তো উণ্হমভিজনেতি, এৰমেৰ খো, মহারাজ, যোগিনা যোগাৰচরেন অনুনযপ্পটিঘৰিপ্পমুত্তেন তেজোসমেন চেতসা ৰিহরিতব্বং। ইদং, মহারাজ, তেজস্স চতুত্থং অঙ্গং গহেতব্বং।
‘‘Puna caparaṃ, mahārāja, tejo anunayappaṭighavippamutto uṇhamabhijaneti, evameva kho, mahārāja, yoginā yogāvacarena anunayappaṭighavippamuttena tejosamena cetasā viharitabbaṃ. Idaṃ, mahārāja, tejassa catutthaṃ aṅgaṃ gahetabbaṃ.
‘‘পুন চপরং, মহারাজ, তেজো অন্ধকারং ৰিধমিত্ৰা 1 আলোকং দস্সযতি, এৰমেৰ খো, মহারাজ, যোগিনা যোগাৰচরেন অৰিজ্জন্ধকারং ৰিধমিত্ৰা ঞাণালোকং দস্সযিতব্বং। ইদং, মহারাজ, তেজস্স পঞ্চমং অঙ্গং গহেতব্বং। ভাসিতম্পেতং, মহারাজ, ভগৰতা দেৰাতিদেৰেন সকং পুত্তং রাহুলং ওৰদন্তেন –
‘‘Puna caparaṃ, mahārāja, tejo andhakāraṃ vidhamitvā 2 ālokaṃ dassayati, evameva kho, mahārāja, yoginā yogāvacarena avijjandhakāraṃ vidhamitvā ñāṇālokaṃ dassayitabbaṃ. Idaṃ, mahārāja, tejassa pañcamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena sakaṃ puttaṃ rāhulaṃ ovadantena –
‘তেজোসমং 3, রাহুল, ভাৰনং ভাৰেহি, তেজোসমং হি তে, রাহুল, ভাৰনং ভাৰযতো উপ্পন্না? মনাপামনাপা ফস্সা চিত্তং ন পরিযাদায ঠস্সন্তী’’’তি।
‘Tejosamaṃ 4, rāhula, bhāvanaṃ bhāvehi, tejosamaṃ hi te, rāhula, bhāvanaṃ bhāvayato uppannā? Manāpāmanāpā phassā cittaṃ na pariyādāya ṭhassantī’’’ti.
তেজঙ্গপঞ্হো ততিযো।
Tejaṅgapañho tatiyo.
Footnotes:
