| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
3. ததியனயோ அஸங்க³ஹிதேனஸங்க³ஹிதபத³வண்ணனா
3. Tatiyanayo asaṅgahitenasaṅgahitapadavaṇṇanā
179. ரூபக்க²ந்தே⁴ன க²ந்த⁴ஸங்க³ஹேன அஸங்க³ஹிதேஸூதி நித்³தா⁴ரணே பு⁴ம்மங். தஸ்மாதி யஸ்மா ஏகதே³ஸஸபா⁴க³தா ஸமுதா³யஸபா⁴க³தா ந ஹோதி, தஸ்மா. தேனாதி ரூபக்க²ந்தே⁴ன. தானீதி வேத³னாதி³க்க²ந்த⁴த்தயனிப்³பா³னானி. யதா² ச ஏகதே³ஸவிஸபா⁴க³தாய ந ஸங்க³ஹிததா, ஏவங் ஏகதே³ஸஸபா⁴க³தாய அஸங்க³ஹிததாபி நத்தீ²தி த³ஸ்ஸெந்தோ ‘‘ந கேவல’’ந்திஆதி³மாஹ. ஸங்க³ஹிதானேவ ந ந ஹொந்தீதி யோஜனா. தேதி வேத³னாதி³க்க²ந்த⁴த்தயனிப்³பா³னஸுகு²மரூபத⁴ம்மா. தேஹீதி விஞ்ஞாணக்க²ந்த⁴சக்கா²யதனாதீ³ஹி. ந கத²ஞ்சி ஸம்மிஸ்ஸாதி கேனசிபி பகாரேன ந ஸம்மிஸ்ஸாதி அஸம்மிஸ்ஸதாய ஸங்க³ஹிதத்தாபா⁴வங் ஸாதே⁴தி. ரூபக்க²ந்தே⁴ன விய…பே॰… ந ஹோதீதி யதா² ரூபக்க²ந்தே⁴ன ஸபா⁴க³தாபா⁴வதோ நிப்³பா³னங் ந கேனசிபி ஸங்க³ஹணேன ஸங்க³ஹிதங், ஏவங் விஞ்ஞாணக்க²ந்த⁴சக்கா²யதனாதீ³ஹி தங் ஆயதனதா⁴துஸங்க³ஹேஹி ஸங்க³ஹிதங் ந ஹோதீதி க²ந்த⁴ஸங்க³ஹாபா⁴வோ பாகடோ வுத்தோவாதி ஏவங் வுத்தங்.
179. Rūpakkhandhenakhandhasaṅgahena asaṅgahitesūti niddhāraṇe bhummaṃ. Tasmāti yasmā ekadesasabhāgatā samudāyasabhāgatā na hoti, tasmā. Tenāti rūpakkhandhena. Tānīti vedanādikkhandhattayanibbānāni. Yathā ca ekadesavisabhāgatāya na saṅgahitatā, evaṃ ekadesasabhāgatāya asaṅgahitatāpi natthīti dassento ‘‘na kevala’’ntiādimāha. Saṅgahitāneva na na hontīti yojanā. Teti vedanādikkhandhattayanibbānasukhumarūpadhammā. Tehīti viññāṇakkhandhacakkhāyatanādīhi. Na kathañci sammissāti kenacipi pakārena na sammissāti asammissatāya saṅgahitattābhāvaṃ sādheti. Rūpakkhandhena viya…pe… na hotīti yathā rūpakkhandhena sabhāgatābhāvato nibbānaṃ na kenacipi saṅgahaṇena saṅgahitaṃ, evaṃ viññāṇakkhandhacakkhāyatanādīhi taṃ āyatanadhātusaṅgahehi saṅgahitaṃ na hotīti khandhasaṅgahābhāvo pākaṭo vuttovāti evaṃ vuttaṃ.
ஏவரூபானந்தி ரூபக்க²ந்த⁴விஞ்ஞாணக்க²ந்த⁴சக்கா²யதனாதீ³னங். ந ஹி நிப்³பா³னங் ஸந்தா⁴ய ‘‘ரூபக்க²ந்தே⁴ன விஞ்ஞாணக்க²ந்தே⁴ன சக்கா²யதனேன யே த⁴ம்மா க²ந்த⁴ஸங்க³ஹேன அஸங்க³ஹிதா, ஆயதனதா⁴துஸங்க³ஹேன ஸங்க³ஹிதா’’தி ஸக்கா வத்துங். தேன வுத்தங் ‘‘ஸங்கா³ஹகத்தாபா⁴வதோ ஏவா’’தி. ததா² ‘‘அப்³யாகதேஹி த⁴ம்மேஹி யே த⁴ம்மா க²ந்த⁴ஸங்க³ஹேன அஸங்க³ஹிதா, ஆயதனதா⁴துஸங்க³ஹேன ஸங்க³ஹிதா’’திஆதி³ ந ஸக்கா வத்துங் தாதி³ஸஸ்ஸ த⁴ம்மஸ்ஸ அபா⁴வதோதி ஆஹ ‘‘ஸனிப்³பா³ன…பே॰… பா⁴வதோவா’’தி. அக்³க³ஹணங் வேதி³தப்³ப³ந்தி யோஜனா. தேனாஹ ‘‘ந ஹீ’’திஆதி³. கஞ்சீதி கஞ்சி த⁴ம்மஜாதங். தேதி அப்³யாகதத⁴ம்மாத³யோ. அத்தனோதி அப்³யாகதத⁴ம்மாதி³ங் ஸந்தா⁴யாஹ. ஏகதே³ஸோதி ரூபக்க²ந்தா⁴தி³. அத்தேகதே³ஸஸபா⁴கோ³தி நிப்³பா³னங். தஞ்ஹி த⁴ம்மாயதனத⁴ம்மதா⁴துபரியாபன்னதாய ததே³கதே³ஸஸபா⁴கோ³. அஸங்க³ஹிதஸங்கா³ஹகத்தாதி க²ந்த⁴ஸங்க³ஹேன அஸங்க³ஹிதானங் ஸஞ்ஞாக்க²ந்தா⁴தீ³னங் ஆயதனதா⁴துஸங்க³ஹேன ஸங்கா³ஹகத்தாதி அத்தோ².
Evarūpānanti rūpakkhandhaviññāṇakkhandhacakkhāyatanādīnaṃ. Na hi nibbānaṃ sandhāya ‘‘rūpakkhandhena viññāṇakkhandhena cakkhāyatanena ye dhammā khandhasaṅgahena asaṅgahitā, āyatanadhātusaṅgahena saṅgahitā’’ti sakkā vattuṃ. Tena vuttaṃ ‘‘saṅgāhakattābhāvato evā’’ti. Tathā ‘‘abyākatehi dhammehi ye dhammā khandhasaṅgahena asaṅgahitā, āyatanadhātusaṅgahena saṅgahitā’’tiādi na sakkā vattuṃ tādisassa dhammassa abhāvatoti āha ‘‘sanibbāna…pe… bhāvatovā’’ti. Aggahaṇaṃ veditabbanti yojanā. Tenāha ‘‘na hī’’tiādi. Kañcīti kañci dhammajātaṃ. Teti abyākatadhammādayo. Attanoti abyākatadhammādiṃ sandhāyāha. Ekadesoti rūpakkhandhādi. Attekadesasabhāgoti nibbānaṃ. Tañhi dhammāyatanadhammadhātupariyāpannatāya tadekadesasabhāgo. Asaṅgahitasaṅgāhakattāti khandhasaṅgahena asaṅgahitānaṃ saññākkhandhādīnaṃ āyatanadhātusaṅgahena saṅgāhakattāti attho.
விஸபா⁴க³க்க²ந்த⁴னிப்³பா³னஸமுதா³யத்தா க²ந்த⁴ஸங்க³ஹேன த⁴ம்மாயதனேன ந கோசி த⁴ம்மோ ஸங்க³ஹிதோ அத்தீ²தி யோஜனா. ஏதஸ்ஸாதி ‘‘த⁴ம்மாயதனேன ஸங்க³ஹிதா’’தி ஏதஸ்ஸ பத³ஸ்ஸ த⁴ம்மாயதனக³ணனேன ஸங்க³ஹிதாதி அத்தோ². ஓளாரிகரூபஸம்மிஸ்ஸங் த⁴ம்மாயதனேகதே³ஸங்.
Visabhāgakkhandhanibbānasamudāyattā khandhasaṅgahena dhammāyatanena na koci dhammo saṅgahito atthīti yojanā. Etassāti ‘‘dhammāyatanena saṅgahitā’’ti etassa padassa dhammāyatanagaṇanena saṅgahitāti attho. Oḷārikarūpasammissaṃ dhammāyatanekadesaṃ.
ததியனயஅஸங்க³ஹிதேனஸங்க³ஹிதபத³வண்ணனா நிட்டி²தா.
Tatiyanayaasaṅgahitenasaṅgahitapadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 3. அஸங்க³ஹிதேனஸங்க³ஹிதபத³னித்³தே³ஸோ • 3. Asaṅgahitenasaṅgahitapadaniddeso
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 3. ததியனயோ அஸங்க³ஹிதேனஸங்க³ஹிதபத³வண்ணனா • 3. Tatiyanayo asaṅgahitenasaṅgahitapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 3. ததியனயோ அஸங்க³ஹிதேனஸங்க³ஹிதபத³வண்ணனா • 3. Tatiyanayo asaṅgahitenasaṅgahitapadavaṇṇanā
