| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. তণ্হানিরোধসুত্তং
7. Taṇhānirodhasuttaṃ
২০৮. ‘‘যো , ভিক্খৰে, মগ্গো যা পটিপদা তণ্হানিরোধায সংৰত্ততি, তং মগ্গং তং পটিপদং ভাৰেথ। কতমো চ, ভিক্খৰে, মগ্গো কতমা চ পটিপদা তণ্হানিরোধায সংৰত্ততি? যদিদং – সত্ত বোজ্ঝঙ্গা। কতমে সত্ত? সতিসম্বোজ্ঝঙ্গো…পে॰… উপেক্খাসম্বোজ্ঝঙ্গো। কথং ভাৰিতা, চ ভিক্খৰে, সত্ত বোজ্ঝঙ্গা কথং বহুলীকতা তণ্হানিরোধায সংৰত্তন্তি?
208. ‘‘Yo , bhikkhave, maggo yā paṭipadā taṇhānirodhāya saṃvattati, taṃ maggaṃ taṃ paṭipadaṃ bhāvetha. Katamo ca, bhikkhave, maggo katamā ca paṭipadā taṇhānirodhāya saṃvattati? Yadidaṃ – satta bojjhaṅgā. Katame satta? Satisambojjhaṅgo…pe… upekkhāsambojjhaṅgo. Kathaṃ bhāvitā, ca bhikkhave, satta bojjhaṅgā kathaṃ bahulīkatā taṇhānirodhāya saṃvattanti?
‘‘ইধ, ভিক্খৰে, ভিক্খু সতিসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং…পে॰… উপেক্খাসম্বোজ্ঝঙ্গং ভাৰেতি ৰিৰেকনিস্সিতং ৰিরাগনিস্সিতং নিরোধনিস্সিতং ৰোস্সগ্গপরিণামিং। এৰং ভাৰিতা খো, ভিক্খৰে, সত্ত বোজ্ঝঙ্গা এৰং বহুলীকতা তণ্হানিরোধায সংৰত্তন্তী’’তি। সত্তমং।
‘‘Idha, bhikkhave, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ bhāvitā kho, bhikkhave, satta bojjhaṅgā evaṃ bahulīkatā taṇhānirodhāya saṃvattantī’’ti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬-৭. তণ্হক্খযসুত্তাদিৰণ্ণনা • 6-7. Taṇhakkhayasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬-৭. তণ্হক্খযসুত্তাদিৰণ্ণনা • 6-7. Taṇhakkhayasuttādivaṇṇanā
