| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၆-၇. တဏ္ဟက္ခယသုတ္တာဒိဝဏ္ဏနာ
6-7. Taṇhakkhayasuttādivaṇṇanā
၂၀၇-၂၀၈. ဆဋ္ဌေ ဧတဒဝောစာတိ ‘‘ဣမိသ္သံ ပရိသတိ နိသိန္နော ဥဒာယိတ္ထေရော နာမ အနုသန္ဓိကုသလော ဘိက္ခု အတ္ထိ, သော မံ ပုစ္ဆိသ္သတီတိ ဘဂဝတာ ဩသာပိတဒေသနံ ဉတ္ဝာ ဒေသနာနုသန္ဓိံ ဃဋေသ္သာမီ’’တိ ပုစ္ဆန္တော ဧတံ အဝောစ။ ဝိပုလန္တိအာဒိ သဗ္ဗံ သုဘာဝိတတ္တံ သန္ဓာယ ဝုတ္တံ။ သုဘာဝိတော ဟိ သတိသမ္ဗောဇ္ဈင္ဂော ဝိပုလော စ မဟဂ္ဂတော စ အပ္ပမာဏော စ အဗ္ယာပဇ္ဇော စ နာမ ဟောတိ။ သော ဟိ ပတ္ထဋတ္တာ ဝိပုလော, မဟန္တဘာဝံ ဂတတ္တာ မဟဂ္ဂတော, ဝဍ္ဎိပမာဏတ္တာ အပ္ပမာဏော, နီဝရဏာနံ ဒူရီဘာဝေန ဗ္ယာပာဒရဟိတတ္တာ အဗ္ယာပဇ္ဈော နာမ ဟောတိ။ တဏ္ဟာယ ပဟာနာ ကမ္မံ ပဟီယတီတိ ယံ တဏ္ဟာမူလကံ ကမ္မံ ဥပ္ပဇ္ဇေယ္ယ, တံ တဏ္ဟာပဟာနေန ပဟီယတိ။ ကမ္မသ္သ ပဟာနာ ဒုက္ခန္တိ ယမ္ပိ ကမ္မမူလကံ ဝဋ္ဋဒုက္ခံ ဥပ္ပဇ္ဇေယ္ယ, တံ ကမ္မပဟာနေန ပဟီယတိ။ တဏ္ဟက္ခယာဒယော တဏ္ဟာဒီနံယေဝ ခယာ, အတ္ထတော ပနေတေဟိ နိဗ္ဗာနံ ကထိတန္တိ ဝေဒိတဗ္ဗံ။ သတ္တမံ ဥတ္တာနမေဝ။
207-208. Chaṭṭhe etadavocāti ‘‘imissaṃ parisati nisinno udāyitthero nāma anusandhikusalo bhikkhu atthi, so maṃ pucchissatīti bhagavatā osāpitadesanaṃ ñatvā desanānusandhiṃ ghaṭessāmī’’ti pucchanto etaṃ avoca. Vipulantiādi sabbaṃ subhāvitattaṃ sandhāya vuttaṃ. Subhāvito hi satisambojjhaṅgo vipulo ca mahaggato ca appamāṇo ca abyāpajjo ca nāma hoti. So hi patthaṭattā vipulo, mahantabhāvaṃ gatattā mahaggato, vaḍḍhipamāṇattā appamāṇo, nīvaraṇānaṃ dūrībhāvena byāpādarahitattā abyāpajjho nāma hoti. Taṇhāya pahānā kammaṃ pahīyatīti yaṃ taṇhāmūlakaṃ kammaṃ uppajjeyya, taṃ taṇhāpahānena pahīyati. Kammassa pahānā dukkhanti yampi kammamūlakaṃ vaṭṭadukkhaṃ uppajjeyya, taṃ kammapahānena pahīyati. Taṇhakkhayādayo taṇhādīnaṃyeva khayā, atthato panetehi nibbānaṃ kathitanti veditabbaṃ. Sattamaṃ uttānameva.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၆. တဏ္ဟက္ခယသုတ္တံ • 6. Taṇhakkhayasuttaṃ
၇. တဏ္ဟာနိရောဓသုတ္တံ • 7. Taṇhānirodhasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၆-၇. တဏ္ဟက္ခယသုတ္တာဒိဝဏ္ဏနာ • 6-7. Taṇhakkhayasuttādivaṇṇanā
