| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
២. តម្ពបុប្ផិយត្ថេរអបទានវណ្ណនា
2. Tambapupphiyattheraapadānavaṇṇanā
បរកម្មាយនេ យុត្តោតិអាទិកំ អាយស្មតោ តម្ពបុប្ផិយត្ថេរស្ស អបទានំ។ អយម្បិ អាយស្មា បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បិយទស្សិស្ស ភគវតោ កាលេ កេនចិ បុរេ កតេន អកុសលកម្មេន ទុគ្គតកុលេ និព្ពត្តោ វុទ្ធិប្បត្តោ បរេសំ កម្មំ កត្វា ភតិយា ជីវិកំ កប្បេសិ។ សោ ឯវំ ទុក្ខេន វសន្តោ បរេសំ អបរាធំ កត្វា មរណភយេន បលាយិត្វា វនំ បាវិសិ។ តត្ថ គតដ្ឋានេ បាដលិពោធិំ ទិស្វា វន្ទិត្វា សម្មជ្ជិត្វា ឯកស្មិំ រុក្ខេ តម្ពវណ្ណំ បុប្ផំ ទិស្វា តំ សព្ពំ កណ្ណិកេ ឱចិនិត្វា ពោធិបូជំ អកាសិ។ តត្ថ ចិត្តំ បសាទេត្វា វន្ទិត្វា បល្លង្កមាភុជិត្វា និសីទិ។ តស្មិំ ខណេ តេ មនុស្សា បទានុបទិកំ អនុពន្ធិត្វា តត្ថ អគមំសុ។ សោ តេ ទិស្វា ពោធិំ អាវជ្ជេន្តោវ បលាយិត្វា ភយានកេ គីរិទុគ្គបបាតេ បតិត្វា មរិ។
Parakammāyaneyuttotiādikaṃ āyasmato tambapupphiyattherassa apadānaṃ. Ayampi āyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle kenaci pure katena akusalakammena duggatakule nibbatto vuddhippatto paresaṃ kammaṃ katvā bhatiyā jīvikaṃ kappesi. So evaṃ dukkhena vasanto paresaṃ aparādhaṃ katvā maraṇabhayena palāyitvā vanaṃ pāvisi. Tattha gataṭṭhāne pāṭalibodhiṃ disvā vanditvā sammajjitvā ekasmiṃ rukkhe tambavaṇṇaṃ pupphaṃ disvā taṃ sabbaṃ kaṇṇike ocinitvā bodhipūjaṃ akāsi. Tattha cittaṃ pasādetvā vanditvā pallaṅkamābhujitvā nisīdi. Tasmiṃ khaṇe te manussā padānupadikaṃ anubandhitvā tattha agamaṃsu. So te disvā bodhiṃ āvajjentova palāyitvā bhayānake gīriduggapapāte patitvā mari.
៧. សោ ពោធិបូជាយ អនុស្សរិតត្តា តេនេវ បីតិសោមនស្សេន តាវតិំសាទីសុ ឧបបន្នោ ឆ កាមាវចរសម្បត្តិំ អនុភវិត្វា មនុស្សេសុ ច ចក្កវត្តិអាទិសម្បត្តិំ អនុភវិត្វា ឥមស្មិំ ពុទ្ធុប្បាទេ វិភវសម្បន្នេ កុលេ និព្ពត្តោ វុទ្ធិប្បត្តោ សត្ថុ ធម្មទេសនំ សុត្វា បសន្នមានសោ បព្ពជិត្វា នចិរស្សេវ អរហា ហុត្វា អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ បរកម្មាយនេ យុត្តោតិអាទិមាហ។ តត្ថ បរេសំ កម្មានិ បរកម្មានិ, បរកម្មានំ អាយនេ ករណេ វាហនេ ធារណេ យុត្តោ យោជិតោ អហោសិន្តិ អត្ថោ។ សេសំ បាកដមេវាតិ។
7. So bodhipūjāya anussaritattā teneva pītisomanassena tāvatiṃsādīsu upapanno cha kāmāvacarasampattiṃ anubhavitvā manussesu ca cakkavattiādisampattiṃ anubhavitvā imasmiṃ buddhuppāde vibhavasampanne kule nibbatto vuddhippatto satthu dhammadesanaṃ sutvā pasannamānaso pabbajitvā nacirasseva arahā hutvā attano pubbakammaṃ saritvā somanassajāto pubbacaritāpadānaṃ pakāsento parakammāyane yuttotiādimāha. Tattha paresaṃ kammāni parakammāni, parakammānaṃ āyane karaṇe vāhane dhāraṇe yutto yojito ahosinti attho. Sesaṃ pākaṭamevāti.
តម្ពបុប្ផិយត្ថេរអបទានវណ្ណនា សមត្តា។
Tambapupphiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ២. តម្ពបុប្ផិយត្ថេរអបទានំ • 2. Tambapupphiyattheraapadānaṃ
