| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
២. តម្ពបុប្ផិយត្ថេរអបទានំ
2. Tambapupphiyattheraapadānaṃ
៧.
7.
‘‘បរកម្មាយនេ យុត្តោ, អបរាធំ អកាសហំ;
‘‘Parakammāyane yutto, aparādhaṃ akāsahaṃ;
វនន្តំ អភិធាវិស្សំ, ភយវេរសមប្បិតោ។
Vanantaṃ abhidhāvissaṃ, bhayaverasamappito.
៨.
8.
‘‘បុប្ផិតំ បាទបំ ទិស្វា, បិណ្ឌិពន្ធំ សុនិម្មិតំ;
‘‘Pupphitaṃ pādapaṃ disvā, piṇḍibandhaṃ sunimmitaṃ;
តម្ពបុប្ផំ គហេត្វាន, ពោធិយំ ឱកិរិំ អហំ។
Tambapupphaṃ gahetvāna, bodhiyaṃ okiriṃ ahaṃ.
៩.
9.
‘‘សម្មជ្ជិត្វាន តំ ពោធិំ, បាដលិំ បាទបុត្តមំ;
‘‘Sammajjitvāna taṃ bodhiṃ, pāṭaliṃ pādaputtamaṃ;
បល្លង្កំ អាភុជិត្វាន, ពោធិមូលេ ឧបាវិសិំ។
Pallaṅkaṃ ābhujitvāna, bodhimūle upāvisiṃ.
១០.
10.
‘‘គតមគ្គំ គវេសន្តា, អាគច្ឆុំ មម សន្តិកំ;
‘‘Gatamaggaṃ gavesantā, āgacchuṃ mama santikaṃ;
តេ ច ទិស្វានហំ តត្ថ, អាវជ្ជិំ ពោធិមុត្តមំ។
Te ca disvānahaṃ tattha, āvajjiṃ bodhimuttamaṃ.
១១.
11.
‘‘វន្ទិត្វាន អហំ ពោធិំ, វិប្បសន្នេន ចេតសា;
‘‘Vanditvāna ahaṃ bodhiṃ, vippasannena cetasā;
អនេកតាលេ បបតិំ, គិរិទុគ្គេ ភយានកេ។
Anekatāle papatiṃ, giridugge bhayānake.
១២.
12.
‘‘ឯកនវុតិតោ កប្បេ, យំ បុប្ផមភិរោបយិំ;
‘‘Ekanavutito kappe, yaṃ pupphamabhiropayiṃ;
ទុគ្គតិំ នាភិជានាមិ, ពោធិបូជាយិទំ ផលំ។
Duggatiṃ nābhijānāmi, bodhipūjāyidaṃ phalaṃ.
១៣.
13.
សត្តរតនសម្បន្នោ, ចក្កវត្តី មហព្ពលោ។
Sattaratanasampanno, cakkavattī mahabbalo.
១៤.
14.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា តម្ពបុប្ផិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā tambapupphiyo thero imā gāthāyo abhāsitthāti.
តម្ពបុប្ផិយត្ថេរស្សាបទានំ ទុតិយំ។
Tambapupphiyattherassāpadānaṃ dutiyaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / អបទាន-អដ្ឋកថា • Apadāna-aṭṭhakathā / ២. តម្ពបុប្ផិយត្ថេរអបទានវណ្ណនា • 2. Tambapupphiyattheraapadānavaṇṇanā
