| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៦៣. តជ្ជនីយកម្មបដិប្បស្សទ្ធិកថា
263. Tajjanīyakammapaṭippassaddhikathā
៤៤០. ឥធ បន, ភិក្ខវេ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ ហន្ទស្ស មយំ តជ្ជនីយកម្មំ បដិប្បស្សម្ភេមា’’តិ។ តេ តស្ស តជ្ជនីយកម្មំ បដិប្បស្សម្ភេន្តិ – អធម្មេន វគ្គា។ តត្រដ្ឋោ សង្ឃោ វិវទតិ – ‘‘អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មបតិរូបកេន វគ្គកម្មំ, ធម្មបតិរូបកេន សមគ្គកម្មំ, អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ។ តត្រ, ភិក្ខវេ, យេ តេ ភិក្ខូ ឯវមាហំសុ – ‘‘អធម្មេន វគ្គកម្ម’’ន្តិ, យេ ច តេ ភិក្ខូ ឯវមាហំសុ – ‘‘អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ, ឥមេ តត្ថ ភិក្ខូ ធម្មវាទិនោ។
440. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – adhammena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘adhammena vaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
៤៤១. ឥធ បន, ភិក្ខវេ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ ហន្ទស្ស មយំ តជ្ជនីយកម្មំ បដិប្បស្សម្ភេមា’’តិ។ តេ តស្ស តជ្ជនីយកម្មំ បដិប្បស្សម្ភេន្តិ – អធម្មេន សមគ្គា។ តត្រដ្ឋោ សង្ឃោ វិវទតិ – ‘‘អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មបតិរូបកេន វគ្គកម្មំ, ធម្មបតិរូបកេន សមគ្គកម្មំ, អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ។ តត្រ, ភិក្ខវេ, យេ តេ ភិក្ខូ ឯវមាហំសុ – ‘‘អធម្មេន សមគ្គកម្ម’’ន្តិ, យេ ច តេ ភិក្ខូ ឯវមាហំសុ – ‘‘អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ, ឥមេ តត្ថ ភិក្ខូ ធម្មវាទិនោ។
441. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – adhammena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘adhammena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
៤៤២. ឥធ បន, ភិក្ខវេ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ , ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ ហន្ទស្ស មយំ តជ្ជនីយកម្មំ បដិប្បស្សម្ភេមា’’តិ។ តេ តស្ស តជ្ជនីយកម្មំ បដិប្បស្សម្ភេន្តិ – ធម្មេន វគ្គា។ តត្រដ្ឋោ សង្ឃោ វិវទតិ – ‘‘អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មបតិរូបកេន វគ្គកម្មំ, ធម្មបតិរូបកេន សមគ្គកម្មំ, អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ។ តត្រ, ភិក្ខវេ, យេ តេ ភិក្ខូ ឯវមាហំសុ – ‘‘ធម្មេន វគ្គកម្ម’’ន្តិ យេ ច តេ ភិក្ខូ ឯវមាហំសុ – ‘‘អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ, ឥមេ តត្ថ ភិក្ខូ ធម្មវាទិនោ។
442. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso , bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammena vaggakamma’’nti ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
៤៤៣. ឥធ បន, ភិក្ខវេ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ ហន្ទស្ស មយំ តជ្ជនីយកម្មំ បដិប្បស្សម្ភេមា’’តិ។ តេ តស្ស តជ្ជនីយកម្មំ បដិប្បស្សម្ភេន្តិ – ធម្មបតិរូបកេន វគ្គា។ តត្រដ្ឋោ សង្ឃោ វិវទតិ – ‘‘អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មបតិរូបកេន វគ្គកម្មំ, ធម្មបតិរូបកេន សមគ្គកម្មំ, អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ។ តត្រ , ភិក្ខវេ, យេ តេ ភិក្ខូ ឯវមាហំសុ – ‘‘ធម្មបតិរូបកេន វគ្គកម្ម’’ន្តិ, យេ ច តេ ភិក្ខូ ឯវមាហំសុ – ‘‘អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ, ឥមេ តត្ថ ភិក្ខូ ធម្មវាទិនោ។
443. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammapatirūpakena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra , bhikkhave, ye te bhikkhū evamāhaṃsu – ‘‘dhammapatirūpakena vaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
៤៤៤. ឥធ បន, ភិក្ខវេ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន តជ្ជនីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, តជ្ជនីយស្ស កម្មស្ស បដិប្បស្សទ្ធិំ យាចតិ។ ហន្ទស្ស មយំ តជ្ជនីយកម្មំ បដិប្បស្សម្ភេមា’’តិ។ តេ តស្ស តជ្ជនីយកម្មំ បដិប្បស្សម្ភេន្តិ – ធម្មបតិរូបកេន សមគ្គា។ តត្រដ្ឋោ សង្ឃោ វិវទតិ – ‘‘អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មបតិរូបកេន វគ្គកម្មំ, ធម្មបតិរូបកេន សមគ្គកម្មំ, អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ។ តត្រ, ភិក្ខវេ, យេ តេ ភិក្ខូ ឯវមាហំសុ – ‘‘ធម្មបតិរូបកេន សមគ្គកម្ម’’ន្តិ, យេ ច តេ ភិក្ខូ ឯវមាហំសុ – ‘‘អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ, ឥមេ តត្ថ ភិក្ខូ ធម្មវាទិនោ។
444. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
តជ្ជនីយកម្មបដិប្បស្សទ្ធិកថា និដ្ឋិតា។
Tajjanīyakammapaṭippassaddhikathā niṭṭhitā.
