| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៦៤. និយស្សកម្មបដិប្បស្សទ្ធិកថា
264. Niyassakammapaṭippassaddhikathā
៤៤៥. ឥធ បន, ភិក្ខវេ, ភិក្ខុ សង្ឃេន និយស្សកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, និយស្សស្ស កម្មស្ស បដិប្បស្សទ្ធិំ យាចតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន និយស្សកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ , និយស្សស្ស កម្មស្ស បដិប្បស្សទ្ធិំ យាចតិ។ ហន្ទស្ស មយំ និយស្សកម្មំ បដិប្បស្សម្ភេមា’’តិ។ តេ តស្ស និយស្សកម្មំ បដិប្បស្សម្ភេន្តិ – អធម្មេន វគ្គា…បេ.… អធម្មេន សមគ្គា… ធម្មេន វគ្គា… ធម្មបតិរូបកេន វគ្គា… ធម្មបតិរូបកេន សមគ្គា។ តត្រដ្ឋោ សង្ឃោ វិវទតិ – ‘‘អធម្មេន វគ្គកម្មំ, អធម្មេន សមគ្គកម្មំ, ធម្មេន វគ្គកម្មំ, ធម្មបតិរូបកេន វគ្គកម្មំ, ធម្មបតិរូបកេន សមគ្គកម្មំ, អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ។ តត្រ, ភិក្ខវេ , យេ តេ ភិក្ខូ ឯវមាហំសុ – ‘‘ធម្មបតិរូបកេន សមគ្គកម្ម’’ន្តិ, យេ ច តេ ភិក្ខូ ឯវមាហំសុ – ‘‘អកតំ កម្មំ ទុក្កដំ កម្មំ បុន កាតព្ពំ កម្ម’’ន្តិ, ឥមេ តត្ថ ភិក្ខូ ធម្មវាទិនោ។ ឥមេបិ 1 បញ្ច វារា សំខិត្តា។
445. Idha pana, bhikkhave, bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena niyassakammakato sammā vattati, lomaṃ pāteti, netthāraṃ vattati , niyassassa kammassa paṭippassaddhiṃ yācati. Handassa mayaṃ niyassakammaṃ paṭippassambhemā’’ti. Te tassa niyassakammaṃ paṭippassambhenti – adhammena vaggā…pe… adhammena samaggā… dhammena vaggā… dhammapatirūpakena vaggā… dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave , ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino. Imepi 2 pañca vārā saṃkhittā.
និយស្សកម្មបដិប្បស្សទ្ធិកថា និដ្ឋិតា។
Niyassakammapaṭippassaddhikathā niṭṭhitā.
Footnotes:
