| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
៦. សុត្តវិញ្ញត្តិសិក្ខាបទវណ្ណនា
6. Suttaviññattisikkhāpadavaṇṇanā
៦៣៦. ឆដ្ឋេ វីតវីតដ្ឋានំ យស្មិំ ចតុរស្សទារុម្ហិ បលិវេឋេន្តិ, តស្ស តុរីតិ នាមំ។ វាយន្តា តិរិយំ សុត្តំ បវេសេត្វា យេន អាកោដេន្តា វត្ថេ ឃនភាវំ អាបាទេន្តិ, តំ ‘‘វេម’’ន្តិ វុច្ចតិ។
636. Chaṭṭhe vītavītaṭṭhānaṃ yasmiṃ caturassadārumhi paliveṭhenti, tassa turīti nāmaṃ. Vāyantā tiriyaṃ suttaṃ pavesetvā yena ākoṭentā vatthe ghanabhāvaṃ āpādenti, taṃ ‘‘vema’’nti vuccati.
‘‘ឥតរស្មិំ តថេវ ទុក្កដ’’ន្តិ ឥមិនា វាយិតុំ អារទ្ធកាលតោ បដ្ឋាយ យថាវុត្តបរិច្ឆេទនិដ្ឋិតេយេវ ទុក្កដម្បិ ហោតិ, ន តតោ បុព្ពេ វាយនបយោគេសូតិ ទស្សេតិ។
‘‘Itarasmiṃ tatheva dukkaṭa’’nti iminā vāyituṃ āraddhakālato paṭṭhāya yathāvuttaparicchedaniṭṭhiteyeva dukkaṭampi hoti, na tato pubbe vāyanapayogesūti dasseti.
តន្តេ ឋិតំយេវ អធិដ្ឋាតព្ពន្តិ ឯត្ថ ឯកវារំ អធិដ្ឋិតេ បច្ឆា វីតំ អធិដ្ឋិតគតិកមេវ ហោតិ, បុន អធិដ្ឋានកិច្ចំ នត្ថិ។ សចេ បន អន្តរន្តរា ទសា ឋបេត្វា វិសុំ វិសុំ សបរិច្ឆេទំ វីតំ ហោតិ, បច្ចេកំ អធិដ្ឋាតព្ពមេវាតិ ទដ្ឋព្ពំ។ ឯត្ថ ច កប្បិយសុត្តំ គហេត្វា អញ្ញាតកអប្បវារិតេនាបិ អកប្បិយតន្តវាយេន ‘‘សុត្តមត្ថិ, វាយន្តោ នត្ថី’’តិអាទិបរិយាយមុខេន វាយាបេន្តស្ស អនាបត្តិ។ តេនេវ មាតិកាដ្ឋកថាយំ (កង្ខា. អដ្ឋ. សុត្តវិញ្ញត្តិសិក្ខាបទវណ្ណនា) ‘‘វាយាបេយ្យា’’តិ បទស្ស ‘‘ចីវរំ មេ, អាវុសោ, វាយថាតិ អកប្បិយវិញ្ញត្តិយា វាយាបេយ្យា’’តិ អត្ថោ វុត្តោ, ឯវំ វទន្តោ អកប្បិយតន្តវាយេន វាយាបេតិ នាម, នាញ្ញថា។
Tanteṭhitaṃyeva adhiṭṭhātabbanti ettha ekavāraṃ adhiṭṭhite pacchā vītaṃ adhiṭṭhitagatikameva hoti, puna adhiṭṭhānakiccaṃ natthi. Sace pana antarantarā dasā ṭhapetvā visuṃ visuṃ saparicchedaṃ vītaṃ hoti, paccekaṃ adhiṭṭhātabbamevāti daṭṭhabbaṃ. Ettha ca kappiyasuttaṃ gahetvā aññātakaappavāritenāpi akappiyatantavāyena ‘‘suttamatthi, vāyanto natthī’’tiādipariyāyamukhena vāyāpentassa anāpatti. Teneva mātikāṭṭhakathāyaṃ (kaṅkhā. aṭṭha. suttaviññattisikkhāpadavaṇṇanā) ‘‘vāyāpeyyā’’ti padassa ‘‘cīvaraṃ me, āvuso, vāyathāti akappiyaviññattiyā vāyāpeyyā’’ti attho vutto, evaṃ vadanto akappiyatantavāyena vāyāpeti nāma, nāññathā.
៦៤០. អនាបត្តិ ចីវរំ សិព្ពេតុន្តិអាទីសុ ឥមិនា សិក្ខាបទេនេវ អនាបត្តិ, អកតវិញ្ញត្តិបច្ចយា បន ទុក្កដមេវាតិ វទន្តិ។ អកប្បិយសុត្តតា, អត្តុទ្ទេសិកតា, អកប្បិយតន្តវាយេន អកប្បិយវិញ្ញត្តិយា វាយាបនន្តិ ឥមានេត្ថ តីណិ អង្គានិ។
640.Anāpatti cīvaraṃ sibbetuntiādīsu iminā sikkhāpadeneva anāpatti, akataviññattipaccayā pana dukkaṭamevāti vadanti. Akappiyasuttatā, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni.
សុត្តវិញ្ញត្តិសិក្ខាបទវណ្ណនា និដ្ឋិតា។
Suttaviññattisikkhāpadavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៦. សុត្តវិញ្ញត្តិសិក្ខាបទំ • 6. Suttaviññattisikkhāpadaṃ
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៦. សុត្តវិញ្ញត្តិសិក្ខាបទវណ្ណនា • 6. Suttaviññattisikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៦. សុត្តវិញ្ញត្តិសិក្ខាបទវណ្ណនា • 6. Suttaviññattisikkhāpadavaṇṇanā
